Zechariah 3 - Ohiatonhseratokénti

Ne Rotokénhse Wahotéttsen Ne Ratsihenstowá꞉nen

¹ Ne ó꞉iah atettsénsehre ne Roiá꞉ner wahakenaʼtónhase ne Ratsihenstowá꞉nen Joshua í꞉rahte rahohénton ne Roiá꞉ner rahoronhiakeró꞉nonh. Tánon é꞉tho ne rahiatákʼta ne Joshua í꞉rate ne Sakoriwaros, rothatehweiennenhtà꞉on nahorihwáhro.

² Ne Roiá꞉ner rahoronhiakeró꞉nonh wahawénhase ne Sakoriwaros, “Aiá꞉wens ne Roiá꞉ner ahiaré꞉wahte ní꞉se, Seriwaros! Aiáwens ne Roiá꞉ner ne ranoronhkwa ne Jerusalem, ahiaré꞉wahte. Kí꞉ken rónkwe ne teskaieróntahre ne kánia tsiakahonthákwen notsírake.”

³ Joshua thóh rahtáhkwe, tehiokweniáhtion rotʼtseronhniáton.

⁴ Ne raronhiakeró꞉nonh wahsakawénhase ne raonhatsherahó꞉kons ne karonhià꞉ke, “Ahé꞉ren sehwahá꞉wit ne tehiokweniáhtion kí꞉ken rónkwe rhotieronniáhton.” Ethò꞉ne wahawénhase ne Joshua, “héren wahkhá꞉withe ne sharihwaneraháktshera tánon akweniáhse tentʼkónhion nahonshasháste.”

⁵ Wahoró꞉ri ne ranhá꞉tshera né꞉ne iotkwéniens atenonhwarahnákstha sattsishewanonhwaró꞉rok ne Joshua. Káti thóh nahatí꞉iere, tánon ethò꞉ne ahkwéniahse shahonwasehronniáhte thóh náhe ne Roiá꞉ner raoronhiakeró꞉nonh thorahthákwe.

⁶ Ethò꞉ne ne raronhiakeró꞉non wahohró꞉ri ne Joshua né꞉tho

⁷ ne Roiá꞉ner Roshatstenhserowá꞉nen tsi ráhwen: “tóka enshatewenhnhárahkwe natianerénhsera tánon ne enshateriwahténtiahte ne kahioʼténhsera tsi nitkonhiá꞉wi, ethò꞉ne ki ienskóntahkwe nahshateriwatsté꞉riste Nahkenonhsatokenhtí꞉ke ó꞉ni nahotenáhthake, tánon enwahkatʼthónteke ne shaterennahienthátsheras, kwáh tsi ní꞉ioht tsi niwakatʼthónte ne ratironhiakeró꞉nonhs rahonahterennahienthátsheras ne akʼkhénton rón꞉nete.

⁸ Shatahónshatat káti Joshua, i꞉se ne tsihenstowá꞉nen: ki shatahónshatat, i꞉se tánon ne sewahtenroshón꞉a ne kén꞉en skátke sehwenhtskó꞉ton, i꞉se ne tiónkwe ioiánere ne thé꞉nen iahisehwariwáhken: Enhihiathotáhsi nakhenhátshera, né꞉ne Onénhra ronwáhiats!

⁹ Rahohénton ne Joshua skanénhia éntien né꞉ne tsá꞉ta nateiohiosohkéronte. É꞉tho entierón꞉nitste enkʼkhiáton, tánon tókok sewenhní꞉sera ahé꞉ren entkhá꞉withe ne karihwáneren ne kén꞉en iowenhtsá꞉te.

¹⁰ Nó꞉nen enwáhwe né꞉tho enhní꞉sera, kwáh tsi sewahiatáttion enhiettsihónkaron ne tesehwanonhshanéken nahontahón꞉ne tánon nahontónnharen ne skén꞉non ó꞉ni ne ioriwahní꞉ron, ne tehiowá꞉nenh ne onénhare ó꞉ni ne wisonkó꞉wahs karontaʼshón꞉as.”