St. Mark 9 - Ohiatonhseratokénti

Tioton-aton teioteriȣasonterakȣen tsini hoiaton Roiatatokenti Mark.

¹ Ratonhakȣe oni tsi sakororihakȣe: Oriȣiio tsi kȣarori otiake kentho ratiiatare ne iah tahonniheie ohenton naontkatto aonȣe ne Niio Raonakerasera aosaststensera.

² Iaiakhaton nonta onakenke, onontoharake niiasakoiatenhaȣe ne ne Tier, Sak tanon San eh nonȣe iathatteni rahotihenton.

³ Nok ne raotseronniat ȣateȣateronronten ehoni nakenrakenne tsi niiot noniete, iah ki taontetsenri nonȣentsiakeronon naiekȣeni etho naierakenste.

⁴ Etho oni ȣasakotiken Eli tanon Moïs, Iesos tehotitharakȣe.

⁵ Ethone Tier tahatati, iahenron tsi nonkȣati ne Iesos: Saianer! ioianere ne kentho aeteȣenterontake; Asen kati naheteȣatoseroten, enskat ise saȣenk, enskat Moïs nok nʼenskat Elie.

⁶ Tsiniiot niah tahoterientarake nahoten raton; Aseken esoki tsi ronateronhientenni.

⁷ Nok eh iotsikeraratie ȣahakorhoroke; nok eh takaȣenninekenne ȣaton: neneh Riienha Rinoronkȣa Koȣa; hetsiseȣaȣennarakȣak.

⁸ Ȣathontkatonnionȣe naktatie, nok iah onka nakoren tesakotiken, raonhaa ne Iesos eh renteron.

⁹ Nok nonen Sishonanontastsnentonhatie ȣasakotiaȣenratse nasakotirori onkakiok akenhake tsiniiot tsi ȣaontkatto, tsi tanon onen enshotatonnheton nonkȣe Roienha.

¹⁰ Akȣa kati ok taonteȣeientonkoȣa neh nikaȣennoten, neok teshontateriȣanontonni oh nahoten neneh naonsaiontonnhete kenheiatne.

¹¹ Ȣahonȣariȣanontonȣe, ȣahoniron: oh niiotieren tsi ronton ne ratiiatons tsi Elie enthahente?

¹² Tontasako-ȣennaȣeron nok ȣahenron: etho neneh, Elie rahentene oriȣakȣekon enshakȣatako; nok kenh kaien tsini kaiaton nonkȣe Roienha raiatatake iatekakonte tsi eso enharonhiaken, nok enhonȣakenron.

¹³ Nok nʼii kȣarori tsi onen rokȣathon ne Elie, etho oni nihonȣaierase tsinithatinonȣes, tsiki niiot tsi kaiaton.

¹⁴ Nok nonen sonsahonneȣe tsi ratiteron notiake raotiokȣa Kentiokoȣanen tehonȣatinenronni nok ratiiatons tohotiriȣatironte.

¹⁵ Nok akȣekon ok ȣahakonerako nonen siionsaonȣaken tontare; ȣathonȣanonȣeronnion.

¹⁶ Ȣasakoriȣanontonse ne ratiiatons, ȣahenron; oh nahoten teseȣariȣatirontakȣen?

¹⁷ Saiatat tahatati ȣahenron: Kentho riiatte riienha neh notkon rotienni.

¹⁸ Skanorons ens iatahontkontakȣe nonen enhoiena takaȣaststotonnion ens rasakon oni tenhennokaraniehon ne kati ȣakheneken nesentiokȣa naonsakonȣaiatinekenȣe nok iah tehotikȣenion.

¹⁹ Tontahenron ne Iesos: Kanoron ki oni tsini seȣatennoȣentastskon: toh nekenhakȣa nenȣe enteȣakȣekonhatie? ok oni tenȣakeron iaȣeronhatie? kenh nontatsiatenhaf.

²⁰ Eh nontahoiatenhaȣe, akȣa neok ȣaoken ne Iesos, nensok nʼotkon ȣahoronhiakente ne raksaa, ehtake ȣahoiatonti akȣa neok ne Skaontsi.

²¹ Iesos ȣahoriȣanontonse ne raksaa roniha: toh nahe eh siiot? tontahenron ok eh siiot Sarennakerate.

²² Eso ioriȣake otsirake, aȣenke iehohiatontion nahorio; ne kati nothenon askȣenieseke takȣaiatakennha, aontesanikonkararen tsini ionkȣentent.

²³ Tontahenron ne Iesos: ne ki naontasetakȣe; oriȣakȣekon niieiakotonse ne tiakaȣetakon.

²⁴ Ok eh katsitaratie tsi tontahenron ne raksaa roniha: Teȣaketakȣen, Saianer! Takienaȣas akenikonrastotserakon.

²⁵ Sahatkatto ne Iesos tsi akȣekon ok etho nontaiakaȣenonhatie ethone ȣahateȣennatsaniten notkon, ȣarenhase: Satkon iah tesatati iah oni tesaronkas, ii, ȣakonrori tontatsiakenn ne kenh raksaa raiatakon tosa oni nonȣenton ionsasataȣeiat.

²⁶ Teiohenretane tsi tontaieiakenne notkon nok eso ȣahoronhiakente, akȣa ki eh nahoiataȣen ne raksaa tsiniioh nʼiakaȣenheion; nese ȣaonni ȣaontonnion raȣenheion.

²⁷ Nok ne Iesos tahonentsa, sahokestsko, oni sahatien.

²⁸ Nonen kanonskon siiehenteron ne Iesos, ȣahonȣariȣanontonse ne raotiokȣa, ȣahonniron: oh niiotieren tsi iah nii teionkȣakȣekon naonsaiakȣaiatinekenhon nekenh Otkon?

²⁹ Tontahenron: tehiotonȣentsiohon naionterennaien aiakaȣentontiete oni nakonȣasenni neh niȣatkonseroten.

³⁰ Onen are ehren sahonnete neh nonȣe, ȣathatiiaiake ne Galile; rerhakȣe ne Iesos ok iah onka taiakotokense.

³¹ Sakorihonniennihakȣe sane ne raotiokȣa raton-hakȣe: iatekakonte nonkȣe Roienha tsi ȣahonȣateȣentete rahotisnonke ne rotiriȣaneraakskon, enhontennhane enhonȣario; nok ki tanon nonen enhaȣenheion, asenhaton nenȣata enshatatonnhete.

³² Iah othenon tehotinikonraientaskȣe neh nikarihoten, tanon ratitsaniskȣe ne tahontaonȣariȣanontonse.

³³ Nonen Siiahonneȣe Kafarnaiimke, kanonskon oni sihatiteron, ȣasakoriȣanontonse; nahoten tonteseȣariȣatirontatiene ohahakeson?

³⁴ Iah onka tetiotati: neh rotitharakȣenne onka onte senha enkaiatanoronke oni enhakoȣanen.

³⁵ Nonen sahontientakȣentho, iasakohnonke ne tekeni iaȣenre nihati, nok ȣasakaȣenhase: Toka onkakiok raskaneks nahaiatanoronke raonnaa natentraska oni enhonȣannhatseronni.

³⁶ Raksaa iahononke rahotinenrihen ȣathotaste, ȣahokitarho nok ȣahenron:

³⁷ Onkakiok tenhiontatarhoton neh niieksatoten ii aksennakon akȣa ii tehakarhotons; nok iahse ii tataionkarhoton ne tenhionkarhoton neh tanon ne takatennieton.

³⁸ Ethone San tahatati, ȣahenron: Saianer! iakhiken otiake ne Skonȣanatekȣatha nonatkon nise Sasennakon tanon iah teteȣes; Iakhinnhese kati netsi iah enskatne teteȣes.

³⁹ Tontahenron ne Iesos: tosa ietsinnhes; aseken iah onka taiekȣeni ne ioriȣanerakȣat tsi naieiere nii aksennakon nok akte aiakotentiatonhatie.

⁴⁰ Aseken ne iah teionkhiriȣasȣase ionkhiriȣaȣaseki.

⁴¹ Nok oni ne skaȣisa onekanos onkakiok aietsinekanonte netsi Keristos raonkȣeta, oriȣiio tsi ȣakȣarori tsi iah tehotonsere ne tekariȣaserakȣen.

⁴² Nok tanon nonka enshakoriȣaientaten enskat niieksatasa oni tiakaȣetakon naksennakon, senha ioianere kanenhioȣanen ahonȣanenhianiake nok kaniatarhen iahonȣaiatonti.

⁴³ Toka Sasnonsa Sariȣaientatenni, itsiak; senha ioianere neiah tatasesnonsontake Karonhiakon asataȣeiate, tsiniiot ne tasesnonsontonke nok asatetsirate tsinonȣe ne tiotekhaonȣe.

⁴⁴ Tsinonȣe, niah tekonniheions nahotitsinonȣa oni iotekhaonȣe.

⁴⁵ Toka oni Sasita aesariȣaientaten, itsiak; senha ioianere atsinokotatie asataȣeiate karonhiakon, tsiniiot ne tetsiaron tasasitontake, nok otsirake aiesaiatonti tsi nonȣe niah teȣasȣas:

⁴⁶ Tsinonȣe niah tekonniheions nahotitsinonȣa, oni iotekhaonȣe.

⁴⁷ Toka Sakara sariȣaientatenni, stako: senha ioianere skati aesakaratake asataȣeiate Niio raonakeraserakon, tsiniiot, ne tetsiaron taskaratake, nok otsirake aiesaiatonti.

⁴⁸ Tsinonȣe niah tekonniheions nahotitsinonȣa, nok iotekhaonȣe.

⁴⁹ Aseken akȣekon skastson oni otsire tenhiontatiotsistarhoste; nok akȣekon tioiotsis tenkaiotsistarhoston ne Niio raoriȣanoronsera.

⁵⁰ Iaȣekon ne tioiotsis, nok tanon nenhiotaksenne, oh nahoten entsiaȣekonhontseron?

⁵¹ Iseke kati tkaientak ne tioiotsis, nok skennen tikenhak tsi natetsion.