St. Mark 8 - Ohiatonhseratokénti

Satekon-aton nateioteriȣasonterakȣen tsini hoiaton Roiatatokenti Mark.

¹ Kentiokoȣanen are nethone ronȣanonteratieskȣe ne Iesos, tanon iah othenon tehotiien niieks, nese ȣaonni iasakononke ne raotiokȣa, Sahenron!

² Oriȣiio tsi khetenre kehiken teȣakanitiokȣaton, onen asen nonta shiionkariskonton, iah oni othenon tehonatennatseraien.

³ Tanon nakaȣentakon aonsakheiatori enhiakonoronse tsiniiohahes aseken otiake ihnon nitiakaȣenon.

⁴ Tontahonȣaȣennaȣeron ne raotiokȣa, ȣahonniron: ionikonrokta kiȣahi naiakȣanataratsenri ne kenhnonȣe tsinikon iatakaieri naiakotane.

⁵ Ȣasakoriȣanontonse, ȣahenron: toh nikon Seȣanataraien? Tontahonniron: tsiatak.

⁶ Ethone ȣasakorori nonkȣeokon akȣekon ehtake aiontien, ȣatrakȣe ne tsiatak nikanatarake, ȣahaiatateriste, ȣathaiakkon iasakaon ne raotiokȣa nok ne rononha onkȣeokon iaonsasakohnon.

⁷ Sekon tokara nihotitsiaientakȣe, eh kati oni neneh nahaiere ȣahaterennaienhase nok ȣahenron: ietsiion oni neneh.

⁸ Ȣatonstskaon kati, nok akȣekon oni ȣahonatane, tanon tsiatak niȣasenontserake ȣakanane tsinikon ȣahotikkȣine.

⁹ Neh nahoten ne kaieri niȣenniaȣehetserasen niionkȣetake ne ȣatonstskaon; ethone onen tonsasakoreniate.

¹⁰ Nok oksaok ne raonha oni ne raotiokȣa tonsahatiiaiake Dalmanutha niiaonne.

¹¹ Ethononh nathontatken Pharisian ȣathatiriȣatirontonko, nok ȣathonȣanikonraserakȣe ȣahonȣaneken enskat asakonatonhase ne ioriȣanerakȣat karonhiakeka.

¹² Nok ne Iesos rahonikonrakon tontaronniserenne, nok-ȣahenron: Oh nahoton kariȣanontontta ne ioriȣanerakȣat kehiken niionkȣetoton? Oriȣiio tsi kȣarori tsi iah taontkatto.

¹³ Ok eh tasakotkaȣe nok ionsahatita oni tonsahatiiaiake.

¹⁴ Ok iah tehoneiaraon nahotinataraninonke onen enskatok sishotinataraien.

¹⁵ Kenh kaien enskat ȣasakotiaȣenratse; ȣahenron: Seȣatsanisek ne Pharisian oni ne Herod raonattenkȣatta.

¹⁶ Rontonhakȣoe ne rononhake; neh ȣahi tsi iah teionkȣanataraien.

¹⁷ Nok ne Iesos roterientaratsion tsinahoten ronnere, ȣahenron: nahoten neneh seȣatroriaton tsi iah teseȣanataraien? iah ken teseȣakahenhions, iah oni kenh teseȣanikonraientas? Sekon oni kenh oni nise tetiseȣanikonrakaras.

¹⁸ Teseȣakarat nok iah teseȣatkattos? Teseȣaontakaronte nok iahkenteseȣaronkas? iah oni ken teseȣaien naonseseȣeiarane?

¹⁹ Toh niȣaterake ionanonhon ne rotikkȣihon Sahatinatarake neȣisk nihonniaȣehetserasen ne ȣisk nikanatarake kheiakhonni? Tontahonniron tekeni iaȣenre.

²⁰ Nok ne tsiatak nikanatarake, toh neneh nikon rotikkȣihon ne kaieri nihonniaȣehetserasen? tontahonniron tsiatak.

²¹ Tontahenron oh katine kenh niiot tsi iah teseȣanikonraientas tsi nahoten kiton.

²² Nok nonen sihiaharaȣe Betsaïda eh ȣahonȣaiatheȣe saiatat teharonȣekon ȣahonȣennitenten nahotsiente.

²³ Iahonentsa nok ȣahoiatotarho tsi ionkȣene tsiniiore iatekanatakte, ok neneh raostskeri ȣaharho rakarake nok ȣahonisnonsaerhase, nok ȣahoriȣanontonse nothenon ahatkattoseke.

²⁴ Ȣahenron ne ronkȣe tsi ȣathatkatonnion, eh niiot tsi khekens nonkȣe ihiens tsiniiot ne karonta akenhake,

²⁵ Sekon ne Iesos iatonsahanisnonsaren rakarake, nok ȣahorori tahonsahatkathonnion; onen iakaierine akȣa oni tehakariios.

²⁶ Ethone tsi thononsote ionsahotori, nok ȣahenron: tosa kanatakon niionsase tosa oni onka sherori.

²⁷ Ethone are onen sahontenti neh nonȣe tsi tionatakȣenrare ne Cesare-Philipp niiahonne. Tsi niiohahes eh ȣasakoriȣanontonse ne raotiokȣa, tsi nahoten aiontonheke nonkȣesonha ne raonha raiatatake?

²⁸ Tontahonniron: otiake ionton ise ne Saȣatis, otiake, Elie; nok notiake ionton Rotokense.

²⁹ Tontahenron: onka kati nise iseȣere nʼii? Tier tahatati, ȣahenron: ise ne Keristos.

³⁰ Ȣahateȣennakȣisron tsi ȣasakotiaȣenrastse neh niiot tsi asakotirori onkakiok oni akenhake.

³¹ Ethone oni onen ȣasakonikonraientaten tsi iatekakonte eso enharonhiaken nʼOnkȣe Roienha, tsi enhonȣateȣentete ne ratiianerenseronni, ratitsihenstatsiokon nok oni ne ratiiatons, enhonȣario, nok ki tanon tsi ensatonnhete nasenhaton nenȣata.

³² Akȣa iah othenon tehoriȣarhoron tsi neh rotharakȣenhatie; nese ȣahonni ne Tier ȣahoriste nok ȣahoriȣasten.

³³ Tontahatkarhateni ne Iesos ȣasakotkathoseron ne raotiokȣa, ȣahoteȣennateten ne Tier nok ȣahenron: ehren iset ne kiatakta Satkonseraksen; aseken iah tehonikonraientas ne Niio raoriȣasonha neok nonkȣe akoriȣasonha.

³⁴ Iasakononke nonkȣeokon oni ne raotiokȣa nok ȣahenron: Onkakiok enhienrheke rinonieratie, akȣa niare ratateȣentet nok terak ne raoiasa nok rakser.

³⁵ Aseken nenhionskennha tsi iakonnhe, enhiakotonsoe; nok nii akeriȣake, oni aksennakon enhionteȣentete neh enkonȣaniakente.

³⁶ Nahoten nah oni aionstste nonȣentsiakȣekon taiontentsa, nok aiontetsirate nonakenke?

³⁷ Ok ne ens, oh nahoten tahatataȣistakȣe ne ronkȣe ne raotonnhest?

³⁸ Aseken onka enhionkatehase, ok ne ens nakeȣenna, kentho tsi ionȣentsiate kariȣaneraakserakon, enshotehase oni noneh nʼOnkȣe Roienha nonen tentre enthoiatanerakȣatonhatie Roniha raoiatanerakȣatsera oni ne raoronhiakeronon okon.