St. Mark 7 - Ohiatonhseratokénti

Tsiatak-haton nateioteriȣasonterakȣen tsini hoiaton ne Roiatatokenti Mark.

¹ Ethone ne Pharisian oni ne ratiiatons Jerusalem nithonenon ȣahonȣateranentakten.

² Nok neh enskat ȣahontkatho tsi iah teshontsiohares ne Iesos raotiokȣa nationstskaon ne kati ȣasakotiriȣasten.

³ Aseken ne Pharisian oni ne Sitaeronon iah nonȣenton nʼiah taonsaontsioharehe ohenton ne taonstskaon, neh enskat ratiriȣenhaȣe noriȣakaion.

⁴ Iah nonȣenton ne iah tahonsahontsioharehe ne tsi iontkerontakȣa natenthonne ohenton ne tahonstskaon. Eso ioriȣake ne ronatatatiaȣenrati, tsiniiot are nʼaietsetohare, aieksohare, aienaktohare oni.

⁵ Neh kati ȣahonni ȣahonȣariȣanontonse, ȣaonniron: ohnihiotieren tsi iah tehatiriȣaierits ne sentiokȣa tsinikaiaton noriȣakaion, iah ȣahi tehontsiohares nonen tehonstskaonne.

⁶ Tontasakoȣennaȣeron, ȣahenron: Akȣa onkeken thoieriton Tsinitsiseȣenni ne Rotokensehakȣe Esai ise ne Seȣakonȣara; ȣaton tsi kaiaton. Ratisene ok ionksennaiens, nok ihnon teiakȣatere tsinonkati ne raoneriane.

⁷ Ok tiioriȣakon tsi ionksennaiens, aseken neok nonkȣesonha akoriȣasonha sakotirihonnienni.

⁸ Aseken ihsi ieseȣation ne Niio raoȣenna, nok neh seȣatienaȣaston nonkȣe akoriȣatatsera; tsiki niiot naietsetohare aieksohare; sekon eso noiasonha tsini seȣaierha.

⁹ Ȣasakaȣenhase oni: Seȣarios ne Niio rahoriȣatatsera, nok neh seȣaskennhen nise Seȣariȣatatsera.

¹⁰ Aseken raȣon ne Moïs: Shekonnienst ne iesaienha: Toka onka kiok enhoriȣakenron ne roniha ok nehens ne ronistenha, renheih.

¹¹ Nok nise seȣaton: Onka kiok enhoriȣakenron neroniha oni ronistenha; Corban tsionni, Seȣentonta atanitenrat, niihne entkaientakȣe ne ensaiatakennha; iahs ens oni tahonnhiseraientane.

¹² Nok enhtsiseȣatiaȣenratse naonsasakoiotense ne ronȣaienha.

¹³ Eh nitiseȣaieratha tsi seȣarios ne Niio raoȣenna, neh seȣasere tsi niseȣatatsenhenni, sekon eso noiasonha tsiniseȣaierha.

¹⁴ Ethone onen iahentiokȣatihentho, nok ȣasakaȣenhase, ȣahenron: seȣataonsatat nok seȣanikonraientann tsinahoten enkiron.

¹⁵ Tsinikon rennekȣanons ne ronkȣe iah othenon takakȣeni nahoiataksate ne ronkȣe; neh tanon tsinikon tkaiakens ne raonhake neh tohiken roiataksata ne ronkȣe.

¹⁶ Onka tenhionhontakarontakȣen naionronke, ionronk.

¹⁷ Nonen kanonskon siieshotaȣeiaton raonhaa oni sisken, ȣahonȣariȣanontonse ne raotiokȣa, nahoten kenton nethon tekariȣakentonkȣen.

¹⁸ ȣahenron: iah oni kenneken oni nise teseȣattokha! iah ken teseȣanikonraientas tsinikon nastste nonkȣati tkaientakȣa tsi rennekȣanons ne ronkȣe, tsi iah othenon takakȣeni nahoiataksate?

¹⁹ Aseken iah raȣeriane tiieȣataȣeiata, rahonekȣentakon niieheȣes, nok eh nonȣe ienskontiiakenne tsinonȣe tioriȣaien, akȣa ne ok nenhahonnhaseronni tsini hokon.

²⁰ Ratonhakȣe kati, neso roiataksata tsinitkaiakens ne raonhake.

²¹ Aseken ne ieiatakon ok ne ens naȣeriane, tkontiiakens ȣanontonniontseraksens, kentesera, onkȣe aiontateriio.

²² Kanenskȣen, aiontatkaronni nonkȣe kaserohensera, kanikonrhaton, askennhatsera, atatkenronniatsera, kanaiesera.

²³ Neh nakȣekon nakon nitkonnes, neh oni iakoiataksatha nʼonkȣe.

²⁴ Ethone ehren sarete neh nonȣe, tsi natehontonȣentsiakhenhatie ne Tyr tanon ne Sidon niiahare; kanonskon iahataȣeiate iah tererhakȣe onka aiakotokens; nok iah teiotonhon nahioteriȣaseton.

²⁵ Aseken skaiatat ne Tsiothonȣisen enskat ioiatasetseraion nʼotkon iotienni, ȣahosennaronke ne Iesos, eh onȣe rasitakta ontiskȣentaren.

²⁶ (Kehiken tsiothonȣisen Grek-Sirophenisian nakanekȣensoten) ronekennihatie naonsahaiatinekenȣe notkon tsi iotienni nakoienha.

²⁷ Iesos tontahaȣennaȣeron ȣahenron: niarekȣe iakohtann neksaokonha; iah se ȣahi tatekarensaron neksaokon akonatarok erhar oȣira akonȣatinonte,

²⁸ Tontahoȣennaȣeron, ȣakenron: Akȣa neneh tokenske, Saianer! nok ki sane nʼerhar oȣira ȣatons ens natekkȣaratserokon aontakonnoronko tsini iakosense neksaokonha.

²⁹ Ethone ȣarenhase: neh ȣakarionni tsini kaȣennoten tasatati, ȣas sasatenti nok tsiakoieȣentaon ne seienha.

³⁰ Ionsonȣe tsi tiononsote, eh niiot tsioiakenhon notkon, tsiakoieȣentaon nakoienha kanaktake ieiationni.

³¹ Eh tontahatenti ne Iesos, Kalile kaniatarakta natontare, ȣatronȣentsiiake ne Decapolis.

³² Eh ȣahonȣaiatheȣe iah tehatati oni tehaontakȣekon ȣaonȣennitenten nahonisnonsaerhase.

³³ Niarekȣe ȣahoiatotarho tsi ionkȣene, ethone iahanisnonsata rahontakon; nok ȣahanistskerarho rasnonke tanon rennasake kenh niiahaiere.

³⁴ Tanon karonhiake iahatkatto, taronniserenne nok ȣahenron: Epphetah, neneh naiahiron, senonteksi.

³⁵ Oksaok ȣatatkakȣeksi, tanon ontnerensi ne rennasake akȣa ki skennen koȣa tahatati.

³⁶ Nok tanon ne Iesos ȣasakotiaȣenratse naontrori, ok eken ne rononha Senha tahatiriȣakenniatane ȣathonteriȣareniate.

³⁷ Akȣa ihken tsi rotinerakȣenhatonskȣe ronton: akȣekon tkaieri tsini hoieren; sesakotsienta ne teionhontakȣekon tsiontatis niah teiontatiskȣe,