St. Mark 6 - Ohiatonhseratokénti

Iaiak-haton Teioteriȣasonterakȣen Tsinihoiaton Roiatatokenti Mark.

¹ Iesos sahatenti neh nonȣe, tsi thanakere niionsare, ronȣanonteratie ne rahotiokȣa.

² Nok tsi ȣahaȣentatokentane tahatasaȣen ȣasakorihonnien, ȣasakotati tsi ionterennaientakȣa; kentiokoȣanen ne iakothonte tsi rothare, iakohnerakȣaskȣe oni iontonhakȣe: kah onte nithoriȣenha tsinihariȣaienteris? Tsi oni niȣattokhatseriio tsi rattokha tsi oni niionerakȣatenion ne rahoȣeienna?

³ Iah kenh naha neh teken ne rasȣenkaraketas, Onȣari roienha, Sak, Sose, Jude tanon Simon rontatekenha? Iah oni kenhnaha teiethiienteri ne rotennosenha? Akȣa ki ok tihontateriȣaientatennihakȣe ne raonha raiatatake.

⁴ Nok tanon tahenron ne Iesos: Akȣa se naha ne Rotokense rahonakeraserakon ok ronȣakenronni, raȣatsirake, ieiohe oni nakȣa rahononskon.

⁵ Iah othenon tehoieronnistston ne ioriȣanerakȣat neh nonȣe, tokara ok sane nonsasakotsiente ne iakononȣaktani neok tsi ȣatesakonisnonsaerhase.

⁶ Nok ronerakȣaskȣe tsini honatennoȣentastskon; etho ok kati aktatiesonha tsi ionatakȣenraron sakorihonniennihatieskȣe, oni sakotatiskȣe.

⁷ Ethone oni iasakononke ne tekeniiaȣenre nihati, nok teionkȣetakehatie tsi iasakotori, oni ȣasakokȣeniatseron ne kontinikonraksen kontiiatatake.

⁸ Neok enskat ȣasakoriȣatatse ne tosa othenon iahatiha tsini iohahes, neok ne rahonatennists; tosa ahatiiarenhaȣisek, kanatarok, oȣista aontake ne rahotinatatserakon.

⁹ Neok ne rahonata ahatihaȣi, tosa tekeni tahonatseronniakȣaientake.

¹⁰ Ȣasakaȣenhase oni: kaki ok nonȣe nenhietsiia taȣeiaten, tsiok hentsiseȣatentionhe neh nonȣe tontaseȣaiakenn.

¹¹ Nok nonka kiok iah tatenhietsiiarhotonnire, iah oni taietsiiataonsatate, saseȣarasitokef nonen tentiseȣatenti neh ȣatenientenstakon tsi enhionteriȣaketate. Oriȣiio tsi kȣarori tsi tikenha tsi nensakoteȣeiennatsaniten ne Sodom-ronon oni Gomor-ronon tsiniiot neh nonȣe nihatinakere nonen tentesakoiatoretana.

¹² Ok kati etho iahontasaȣen iaonteȣennoten aonsaiontatreȣate.

¹³ Sasakohnatekȣatanion nʼotkon iakonatienni, sasakotsientanion oni ne iakohnonȣaktanionni.

¹⁴ Kare onen nʼOnontiio Herod ȣahosennaronke ne Iesos, aseken rosennoȣannhaonhatie, ȣahenron kati: tohiken Saȣatis sakonekȣahestakȣe shotonnheton, nese ȣaonni rokȣeniatseraien ne karonhiakekha.

¹⁵ Otiake iontonhakȣe: Elie ȣahi; nok sekon otiake iontonhakȣe: Rotokense, ok ne ens teshiatieron ne Rotokense.

¹⁶ Sahoȣennaronke kati ethone ȣahenron, neh thohiken Saȣatis ne ȣakatannhaon ronȣaniariakon, onen shotonnheton.

¹⁷ Aseken rahonha Herod rotennhaon tsi ronȣaiena nʼe Saȣatis nok ronȣannhoton, ne tsi ok neneh raonhafa sota teniak tennine Herodias konȣaiastskȣe.

¹⁸ Ne kati tsi raȣennihakȣe nʼHerod ne Saȣatis: iah tetkariȣaieri ne tsiatatekenkenha ronekȣe aonsahsatateniakten.

¹⁹ Nese ȣahonni nʼHorodias tehahonnharikhonskȣe, neok oni aoskanektsera nahonȣario, nok iah tiieȣatonskȣe.

²⁰ Aseken nʼHerod rotsaniskȣe ne Saȣatis, roterientare se tsi tronkȣetaieri oni Roiatatokenti, rokonnienstakȣe; iotkate oni tsi roriȣaienniskȣe nok roȣennarakȣakȣe akȣaʼsʼoni raonȣesata nahoȣennaronkhake.

²¹ Kare onen iakaheȣe tsiniieskaes tsinihonakeraton ne Herod, ȣasakotenniothase ne rahosennahokon.

²² Eh ontaȣeiate ne Herodias akoienha nok ȣatkanonniakȣe, akȣa eso tsi tahonikonriione ne Herod oni nʼenskatne ronatekkȣahere, ȣarenhase ne kaiatase: Takeriȣanontons tsinitesaskaneks nok akȣekon entkonhion.

²³ Akȣa ȣahariȣanirate tsi ȣahenron; Akȣekon enkonhion tsinikon tsi ok oni nahoton onskeriȣanontonse, ok onte oni nasennon tsini ȣakonȣentsia.

²⁴ Sakaiakenne, onistenha ionsaioriȣanontonse, nahoten ȣakenron enkeriȣanonton? Tontakenron nonistenha: Saȣatis raonontsi seriȣanonton.

²⁵ Skatakhe ionsontaȣeiate tsi thenteron ne ronontiio, ȣahorori tsi nahoten ȣaskaneks, ȣakenron: ne keriȣanontons nʼaskon akȣa oni oksaok akeratne aontakaratie ne Saȣatis raonontsi.

²⁶ Ȣahonikonranonȣake nʼOnontiio, nok iah tehokȣenion nahaȣennontion ne tsi kentiokoȣanen ronȣathonte tsi nithotati.

²⁷ Saiatat ne rahonnhatsera iahotori, ȣahorihon nahontahahaȣi ne Saȣatis raonontsi.

²⁸ Eh ȣarete, nok tsi iontatennhotonkȣa iahoniariake akeratne taharen, iaharon ne kaiatase, nok ne kaiatase onistenha ionsaiaon.

²⁹ Iahatiriȣaronke ne Saȣatis raotiokȣa, eh ȣahonnete ȣahonȣaiatata.

³⁰ Onen etho sahonneȣe tsi renteron ne Iesos, ne ratikȣekonne, Akȣekon Saonȣarori tsi nahatiieranion tsi oni nahoten ȣasakotirihonnien.

³¹ Sahenron: ostonha niare teȣatotarho tsi nonȣe iah tetionkȣene, nok ostonha aheseȣatorishen; aseken akȣekon iah tehotinak totaskȣe ne tahonstskaon tsini iotiokȣatsanit iontkennisahaskȣe.

³² Kaonȣakon kati iahontita, nok isih niiore niiahonne.

³³ Nok tanon tsi ȣaonttoke tsi sahontenti, kentiokoȣanen oni nahonȣaienterene; akȣekon ok kati ȣationratate atsiaktatie, rononha ratihente; eh kati tkentiokote tsi iahonrarho.

³⁴ Sontahatitako ne Iesos ȣahakahenhion tsini kentiokoȣanen etho iakotkennison; ȣasakotenre, neh tsi eh niiakoiataȣenhon tsi niiot ne teiotinakarontonha ne iah teiotiien nasakohnonna, nok eso are etho nonȣe nasakorihonnien tsi ȣasakotati.

³⁵ Onen siiokarahane nonkȣati, ȣahonȣateranentakten ne raotiokȣa, ȣahonniron: Onen iokara, tanon tsi iah othenon taietsenri ne kentho.

³⁶ Aonsaseiatori kati, aonsaontenti nok iaonsahatininon niieks tsi tionatakȣenraron, aseken iah othenon tehonatennatseraien.

³⁷ Tontahenron: ise ki ȣahi aietsinonte: tontahonniron; Sekon ne kaieri teȣenniaȣe kȣenis aiakȣanataraninonte iah ki akȣekon taiakotane?

³⁸ Tontahenron: toh nikon seȣanataraien? Seȣatkens, nok nonen Saontkense, ȣahonniron: ȣisk, tanon tekentsiake nikentsiasa.

³⁹ Ethone kati onen ȣasakonnhane nasakotirori nakȣekon Ononhonrake aiontien, aionnitiokȣakȣenraron oni.

⁴⁰ Eh kati niiot tsi ȣaontien, skatson teȣenniaȣe, ȣiskson oni niionkȣetassenhatie.

⁴¹ Ethone ne Iesos ȣatrakȣe ne ȣisk nikanatarake tanon ne tekentsiake, ȣahaterennaienhase, ȣathanatariakon, iasakaon ne raotiokȣa, nok nerononha iaonsasakonon nonkȣeokon, akȣekon oni ne tekentsiake ȣahatiiakkon oni neneh.

⁴² Akȣekon ȣationstskaon akȣa oni ȣahakotane.

⁴³ Nok tekeni iaȣenre niȣaterake ȣakanane tsinikon ȣahotatenre ne kanatarok, ostonha oni neneh ȣahotatenre ne kentsionk.

⁴⁴ Neh nahoten ne ȣisk niȣenniaȣehetserasen niionkȣetake ne rotiskenrakete ȣathonstskaon.

⁴⁵ Akȣa neok Sonteȣeiennentane, oksaok ionsasakotori ne raotiokȣa tonsahatiiaiake Betsahida nonkȣatikȣen; nok ne rahonha tonsasakonitiokȣaronkȣate.

⁴⁶ Nok nonen satonsonnitiokȣaronko onontoharake niiahare ȣahaterennaienna.

⁴⁷ Onȣar ok kaniatarhen sihatihonhiontie onen taiokaraȣe, nok ne rahonha rahonhaa oni ehtiioke itres.

⁴⁸ Nok ȣahoni konraientane tsi serenkeneha tihonatentionhatie aseken rotiȣeraraonhatie; nok neh nahoten tsi niiorhenhonhatie eh niiahare onekakesson thire, akȣa oni anio neh nahoten narerheke akeiatoheststen.

⁴⁹ Ȣahonnere neneh tsi ȣaonȣaken aȣenkesson tare, ȣahonkȣatianeronne kati ȣahi, nensok ȣathotihenrete.

⁵⁰ Neh ȣaonni ȣahonateronhienten tsi ratikȣekon ki ȣahonȣaken; nok tanon ne rahonha iasakoȣennarane tahenron: Skennen tikenhak, tosa seȣateronn iise.

⁵¹ Akȣa neok tonteȣenniioste iahatita oksaok ȣatkaȣeriiake, Onen senha ȣahotinerakȣenhaton.

⁵² Aseken tsiniiot neok iah akȣa tatehotiiatoreton ne kanatarok ahoriȣake sotsi sekon nihoneriasatsiioha.

⁵³ Senazaret nonȣe iahatiserenne eh kati nonȣe iahonrarho.

⁵⁴ Ok sishonȣaienterihatie ne ienakere shahatitako.

⁵⁵ Ok kenh tiiahahe ȣateȣateriȣareni tsi ienakere, ok oni khe karatie taiontatiatakareni ne iakohnonȣaktanionnis, etho niieiontatiatenhas tsi nonȣe nenhieriȣaronke enhiahiron eh nonȣe itres.

⁵⁶ Eh kati niiotonhatie tsi niȣa ȣataststekafa, tsi kanataienton, ionatakȣenraron, teienakeraserokenson, kanatakonson oni ok eh nikatensonhatie ne iakohnonȣaktanionni, ronȣanekennis arahona neok oni ne kenniiaieiere raotiataȣitne, nok tsiniiakon ne ieiakoiatoseronskȣe raiatake tsiontonskȣe tsi iakononȣaktani.