Ruth 3 - Ohiatonhseratokénti

Ruth Waʼenahkwahtshén꞉ri

¹ Ohnakénhkha káti Naomi iaontatharháhse ne Ruth, “Ó꞉nenk tsi enkonnahkwahtshenriá꞉se ó꞉nen kiʼ nen né꞉ʼe ensanonhsó꞉taʼne.

² Sehià꞉rak. Ne kí꞉ken rón꞉kwe Boaz tewatatenónhkwe; ne kí꞉ken konnón꞉kwe ronwaióʼtenhse skátne sewaióʼtehkwe. Satahónhsatat. Ón꞉wa ioʼkarahtsherá꞉te enhatiwá꞉eke ne teiotikonhstónhrhes.

³ Satá꞉wen tánon iontiaʼtakonstáhkhwa satéhrho tánon satiaʼtahserón꞉ni kwáh tioiá꞉nere sá꞉ien ahtsherón꞉nia. Thó꞉ne eh tho iénhse tsi nón꞉ thahwá꞉ʼeks nok kiʼ tóhsa ráttok tsi tho í꞉ses tsik enhó꞉taʼne tánon tsi rohnekì꞉ren.

⁴ Orihwí꞉io són꞉ni tsi nón꞉ nenhà꞉rate, tánon nó꞉nen ienhótaʼwe, eh tho iahá꞉se tánon tahshará꞉tat ne róhere tánon rahsiʼtákta enhsá꞉rate. Raónha enhiahró꞉ri tsi nénhsiere.”

⁵ Ruth tontaieriʼwaserá꞉ko, “Akwé꞉kon tho néntiere tsi nahò꞉ten waʼshekhró꞉ri.”

⁶ Tho káti Ruth niaʼhá꞉en tsi nón꞉ thatihwá꞉ʼeks eh tho naié꞉iere tsi nahò꞉ten waʼontathró꞉ri nontatshá꞉wha.

⁷ Tsi ó꞉nen Boaz wahótaʼne ó꞉ni tsi rohnekì꞉ren, kwáh í꞉ken ionʼwésen tsi ranonhtónnion. Tho niahá꞉re tsi nón꞉ tioʼtón꞉iote teiotikonhstónhrhes eh tho wahá꞉rate tánon wahó꞉taʼwe. Ruth kwáh skenén꞉ʼa tho niahà꞉en taiehará꞉tate ne róhere tánon tho waʼón꞉rate rasihtákta.

⁸ Tsi káti niwahsón꞉tes thontaiawénstsi wahá꞉ie, wahatʼkarháhtho wahonehrá꞉ko tsi iakón꞉kwe ieiaʼtión꞉ni rasihtákta.

⁹ “Ónhka ní꞉se”? wahariʼwanón꞉ton. Tontaieriʼwaserá꞉ko, “Sénhsion, Ruth kí꞉ken ne tsi ákta tsi tiatatenónhkwe, í꞉se káti saterihwaién꞉ni taséksnieʼne. Ahsathontátsheke káti naionkení꞉niake.”

¹⁰ Wahèn꞉ron, “Roiá꞉ner ahiaiaʼtatérihste. Wéne senestonhá꞉tie tsi sénha seriwakweniéns꞉tha ne kahwá꞉tsire tsi nihsatiérha nón꞉wa, tsi niʼsheiatierá꞉se iesasá꞉wha. Aiotónʼon aiesesá꞉kon sénha kenʼnithoiénha tóka rokwáhtshe tóka niʼ ró꞉ten nek tsi iáh kiʼ tho tesaié꞉ren.

¹¹ Tóhsa káti tesatateʼnikòn꞉raren Ruth. Akwé꞉kon tho néntiere nahò꞉ten wahseriʼwanón꞉ton aséʼken akwé꞉kon tsi niiá꞉kon nonkwaná꞉takon ronaterién꞉tare kí꞉ken són꞉kwe tehsonkweʼtaié꞉ri.

¹² Tokénske tsi ákta tewatatenónhkwe tánon wakaterihwaién꞉ni ne takónsnieʼne. Nek tsi rón꞉kwe sénha ákta tsatatenónhkwe tsi ní꞉ioht ní꞉ʼi.

¹³ Kén꞉ʼen sé꞉shek tsi niwahsón꞉tes tánon ohronʼkè꞉ne enteniriʼwahtshén꞉ri tóka kenʼ enharihwanón꞉weʼne ne raónha tahiásnieʼne. Tóka enharihʼwanón꞉weʼne ioiá꞉nere, tóka iáh taharihwanón꞉weʼne, enkerihwaní꞉rate káti raohénton ne Roiá꞉ner tsi í꞉ʼi ki wakaterihwaién꞉ni takónsnieʼne. Ken sé꞉shek tánon sà꞉rat tsi niió꞉re ohronʼkè꞉ne.”

¹⁴ Tho káti waʼòn꞉rate rahsitákta, waʼontkétsko ohénton tsi niió꞉re watioswathéhne ne tóhsa ónhka aiontátken ne tsi iáh thatehotonwentsó꞉ni ónhka aiakotókenhse tsi eh tho í꞉ienskwe.

¹⁵ Boaz washakohró꞉ri, “Seríhsi ne sateweiá꞉ra kén testákwarit.” Eh tho kiʼ naʼé꞉iere. Sók ki tahàweron teiotikonhstónhrhes, tóka wísk niwáhsen nikakonhtsherá꞉ke tánon waʼshakosnié꞉nen iehnenhsà꞉ke taha꞉ren. Ionsaiéhawe kaná꞉takon nionsá꞉ien.

¹⁶ Tsi káti ó꞉nen ionsaión꞉we ontatshá꞉wha waontateriʼwanón꞉tonhse, “Oh káti niahesarì꞉wawen konién꞉ʼa?” Ruth akwé꞉kon waʼontathró꞉ri tsi naʼshakotié꞉raʼse ne Boaz.

¹⁷ Saiaì꞉ron, “Wahakhró꞉ri tóhsa taontá꞉ke ne iáh thé꞉nen thakhá꞉wi ne káti kí꞉ken niiawé꞉ta teiotikonhstónhrhes wahá꞉kon.”

¹⁸ Naomi waʼì꞉ron, “Satenòn꞉na Ruth, tsi niió꞉re iatenkarihwaién꞉taʼne. Iáh thahatoríshen nón꞉wa wenhniserá꞉te tsi niió꞉re enharihwakwatá꞉ko.”