Ruth 2 - Ohiatonhseratokénti

Ruth Tsi Thothéhtaien Ne Boaz Iaʼakoióʼten

¹ Naomi akohwá꞉tsire Boaz ronwá꞉iats, rokwáhtshe tánon akwé꞉ ronwariʼwakwenniénstha ne káti shaʼnihwatsí꞉ra ne ronéhkwe Elimelech.

² Ruth iaʼakotewennontiéhten ne Naomi waʼì꞉ron, “Ahskeríhon ken tsi tkaiénthon nià꞉ke tánon akohrón꞉ko óhere ne rotiióʼte iatenhonatá꞉tere? Orihwí꞉io kón꞉nis tsi ónhkak enhakeríhon ne skátne aionkwaióʼten.” Naomi tontaieriʼwaserá꞉ko, “Wá꞉s kiʼ wá꞉hi konién꞉ʼa.”

³ Sók kiʼ ne Ruth, tsi tkahéhtaien niahá꞉en ratishón꞉ne í꞉ien ronwatíhsere ne rotiióʼte, iakohrónkwas óhere ne iáh thaʼtehonéhkwen. Kwáh nen né꞉ʼe tho nón꞉ iaʼakoióʼten tsi nón꞉ thothéhtaien ne Boaz.

⁴ Ohnakénhkha ó꞉nen sárawe ne Boaz, tsi tkanátaien ne Bethlehem natontá꞉re, waʼtehsakononhwerá꞉ton ne rotiióʼtenion, wahèn꞉ron, “Roiá꞉ner aiesewakwekónhake!” Tontahonnì꞉ron, “Roiá꞉ner ahiaiaʼtatériste!”

⁵ Boaz wahoriʼwanóntonhse ne ohén꞉ton í꞉rate, “Ónhka thí꞉ken kenʼnitiakoiénha iakón꞉kwe?”

⁶ Waʼthariʼwaserá꞉ko ne rón꞉kwe, “Ne kí꞉ken nonhwentsakaionhró꞉non Naomi ískene tsi tionhwentsá꞉te ne Moab.

⁷ Waʼonkeriʼwanóntonhse nakheríhon nahonwatíhsere ne rotiióʼte tánon aiakohrón꞉ko ne óhere. Oronhkéstsi shiiakoióʼte kwáh ón꞉wak kenʼ nikarihwésha tiakotoríshen tsi wahskwáhere.”

^8-9 Sók ne Boaz iahshakotháhrhahse ne Ruth, “Akonʼnikòn꞉ron tiok nahò꞉ten akonhró꞉ri. Tóhsa é꞉ren nón꞉we iaʼsohrón꞉ko ne óhere. Kén꞉ sé꞉shek skátne sewaióʼten ne konnón꞉kwe; tehshekánerak tsi nón꞉ nikontiienthó꞉kwas tánon skátne sewé꞉shek. Waʼkehró꞉ri nakonkweʼtaʼshón꞉ʼa ne tóhsa taiesaʼnikòn꞉raren. Tánon nó꞉nen ensaniaʼtáthen iaháse tsi nón꞉ tkaweroʼkwakè꞉ron tethotihráhton ohné꞉kanos.”

¹⁰ Ruth onhwentsà꞉ke niió꞉re waʼtiontsà꞉kete iahonwatárhahse ne Boaz, “Oh niiotié꞉ren tsi teskwaʼnikónhrhare tánon oh niiotié꞉ren tsi enteskeriʼwaierítshe nonhwentsakaionʼró꞉non?”

¹¹ Boaz tontahariʼwaserá꞉ko, “Akwé꞉kon wakeriwahrón꞉ken tsi nishekweniéns꞉tha ne iesasá꞉wha tsi náhe thawenhé꞉ion ne seniniakón꞉ne. Wakaterién꞉tare tsi shehiatká꞉wen ne iaʼníha tánon saʼnisténha tánon tsi nón꞉ tehsenakeréhkwe, ó꞉ni khé nón꞉ enhsennákerate tsi nón꞉ iáh ónhka tehsheienté꞉ri.

¹² Aiá꞉wens ne Roiá꞉ner tahiariʼwaserakwáhse tsi nisatié꞉ren. Aiá꞉wens káti ó꞉ni kwáh otokén꞉en tahiariʼwaserakwáhse ne Roiá꞉ner Rawenni꞉io ne Israel tsi kén꞉en nontáhse nahiaiaʼtanónhstate!”

¹³ Tontaiaì꞉ron ne Ruth, “Kwáh í꞉ken tsi tisarihwaié꞉ri ne í꞉i akerihwá꞉ke, Sénhsion. Ionʼwé꞉sen tsi skanonhtónnion tsi ní꞉ioht tsi tahshektháhrhahse, aronhátien iáh shaʼtetionkwátʼte ne iesaióʼtenhse.”

¹⁴ Tsi káti iaʼkáhewe tahontská꞉hon Boaz iahshakotháhrhahse ne Ruth, “Kén꞉ nontá꞉se tánon senà꞉tarak, iahàsowh ohnekákeri.” Skátne wahóntien ne rotiióʼte. Boaz waʼrohéstste ne ó꞉nen watenénhonte ká꞉nen Ruth tahshakó꞉ion. Waʼtiontská꞉hon tsi niió꞉re kwáh tokén꞉en waʼakóhtaʼne, tánon shé꞉kon waʼakotekhwatá꞉tenre.

^15-16 Tsi ó꞉nen ionsaiontahsónteren saiakohrón꞉ko ne óhere, Boaz waʼshakohró꞉ri ne rotiióʼte, “Sheríhon naiakohrón꞉ko ne óhere ók ó꞉ni tsi nón꞉ nikakè꞉ron ne kahweʼnonniánion tánon tóhsa thé꞉nen sewèn꞉ron ne taietsítaʼste. Nok ó꞉ni tasewatihén꞉tho ne kaiaʼtakweʼní꞉io óhere tsi kahweʼnonniánion eh tho kaién꞉tak ne taién꞉kwe.”

¹⁷ Ruth káti waʼakohrón꞉ko ne óhere tsi kahéhtaien tsi niió꞉re óʼkarahsnéha, tsi ó꞉nen waʼehwá꞉eke tewáhsen wísk nikakonhtsherá꞉ke niaká꞉ko.

¹⁸ Ionsaiéhawe kaná꞉takon, waʼontatenaʼtónhahse nontatshá꞉wha tsi ní꞉kon waʼerò꞉roke. Tánon ó꞉ni waʼontá꞉tenonte tsi ní꞉kon iakotatén꞉ron nakotennáhtshera.

¹⁹ Naomi waʼontateriʼwanón꞉tonhse, “Kaʼ nón꞉ wahserò꞉roke tsi ní꞉kon ká꞉nen shá꞉wi? Ónhka raoʼhé꞉ta tsi nón꞉ wesaióʼten? Aiá꞉wens káti ne Rawenni꞉io ahoiaʼtatérihste ne rón꞉kwe ne waʼthiarihwásnieʼse!” Ruth waʼontathró꞉ri Naomi, “Tho nón꞉ iakoióʼten tsi nón꞉ thothéhtaien ne Boaz.”

²⁰ Naomi waʼontshennón꞉ni waʼí꞉ron, “Aiá꞉wens Roiá꞉ner ahoiaʼtatérihste ne Boaz! Ne Roiá꞉ner iáh teshoʼnikónhrens nahò꞉ten enhsakohrharátsten ne iakónhnhe ók ó꞉ni ne iakawenhé꞉ion.” Tánon ó꞉ni waʼí꞉ron, “Thí꞉ken rón꞉kwe kwáh ákta tsi tewatatenónhkwe roteriʼwaién꞉ni tashonkenísnieʼne.”

²¹ Waʼí꞉ron Ruth, “Né꞉ ne aonhá꞉ʼa onkwerientí꞉io, wahakhró꞉ri iakkontáhkwe tsi kohrónkwas ne óhere tánon skátne ne ronwaióʼtenhse aiakwé꞉sheke tsi niió꞉re ienhatíhsa tsi ratiienthókwas.”

²² Naomi iaontatharháhse ne Ruth, “Hen, konhién꞉ʼa né꞉ʼe ioiánere skátne aiesewaióʼten ne konnón꞉kwe tsi thothéhtaien Boaz. Tóka nón꞉wa aiesaiesáhton tóka é꞉ren nón꞉ tkahéhtaien niaiesé꞉non.”

²³ Tho káti Ruth skátne wahotiióʼten waʼerò꞉roke tsi niió꞉re tontsháhte ó꞉ni ne teiotikonhstonhrhes tánon ne oná꞉tsa. Tánon taiekontáhkwe skátne kenì꞉teron nonthatshá꞉wha.