Romans 7 - Ohiatonhseratokénti

“Kaniáktsera Ahoʼianerénsera”

¹ Kwáh thoʼkén꞉en ensanikonraiéntaʼne tsi nahóten enkíron, tewatenrosónhas, ne tsi sewakwékon sewaianerenseraʼientéri. Ne kaianerénsera tokʼkhók nióre iakotiatakweniʼióstha nonkwesónhas tsik nikaríwes iakónʼnhe.

² Ne ioniákon, tekariwaráston, neh ioneriénsthon ne kaniáktsera kaianerénsera tsi nòkwa ne róhne tsi nikaríwes enrónʼnheke, nók nónen enrénheie, sontatewenʼní꞉ioʼne tsi nòkwa ne kaianerénsera ne teiakonerénstonʼne ne rhothiniákonʼne.

³ Nekáti, tòhka ohiaʼtheshiatsiásete ne rónkwe neh sékon rhothiniákon neh róhne, ne enkonwanathónkwaʼke watenakwaiesátha; nók kíʼ tòhka enrénheie ne róhne, kwáh kaiatanánon sontatewenní꞉ioʼne tánon iáh ó꞉ni teioriwanerahakténnis ne kaniáktsera tòhka óia ensewatateniátʼten.

⁴ Ne aoríwa thonónnise ní꞉ioht ne tionhakéson, tewatatékens. Tsi shíken ní꞉ioht naihsewenhéion, tsi nióre iekéntons ne kaianerénsera, ne tsi éhʼtho sewahiatanentánon ne raiatátake ne Kerístos; ónen káti rahónha rahonkwéta sewatónʼon tsi nikáien ne sonwákheskwe ne kenheiátne ehnahontáwe khnahótenk aihtewarihontáko natsitewahiótense ne Rawenni꞉io.

⁵ Tóhka thoʼní꞉ioht tsi entewathonʼnhaténti tsi nahitewanonwésekes ne iatethewaiáti, ne kaianerénsera hiontionniénʼnis naihtewariwánerake, káti kí꞉ken naskanéktseras neh enhiontiónnien nahitewénheie.

⁶ Nónwa, tsi niʼiáwenhe, Rawenni꞉io sesonkwanerénshon, neh tsi aionkwenhéion tsi nióre ne kaianerénsera aoriwáke, neh ionkwaneréktonʼne. Iáh ónen thóhʼnon thetionkwataténron noriwakáion tsi nikahiatónʼnionkwe ne kaianerénsera, nók neh nonikonráses.

Kaianerénsera Tanon Ne Kariwáneren

⁷ Nekáti kén aihtewénron, ne iatekaiáti ne kaianerénsera kwáh aóskon kariwáneren? Kwáh káti iáh thotèhiot! Nók kíʼ kaianerénsera onkehnésten nahóten nen꞉ne ne kariwáneren. Tóhka iáh ne kaianerénsera tahiáwen, “Tó꞉sa sehiaskà꞉nek nakorénhson nahó꞉ten ahiakoiéntake,” iáh nonwénton tahontienteráhon neh niwaskanektierhóten.

⁸ Nók tsi nikéntons natsiawenrátsera wahiotesenʼnaiénthaʼne ne kariwáneren ne tahonkenikonráren kwáh tsik nahorihohténson nahonkathetʼtséntake ó꞉ni nahonkaskanékten nakonháke. Nahiotáron ne kaianerénsera, ne kariwáneren kenhéion íken.

⁹ Í꞉i ne iatetiáti tewenniserátekwe thóhʼnon nikonnetiénekwe kwáh iáh thènen tèkenʼne neh kaianerénsera, nók sontsiatorén꞉ne neh ahtsawenrátsera, ne kariwáneren onthónʼnhete.

¹⁰ Tánon wakíheie. Tanon nahtsawenrátʼtsera tsi neh kéntonskwe nahontahióha nathónʼnhets, nók neh wakarihón꞉ni naʼonkréwahte nakíheie.

¹¹ Kariwáneren wahkatʼtsénri nahiotesenʼnaiéntaʼne, ó꞉ni tsi nikéntons nahtsawenrátʼtsera neh onkenikonráhten ó꞉ni onkerí꞉io.

¹² Thoʼkáti, ne kaianerénsera iotokénti, ó꞉ni nahtsawenretiéra iotokénti nón꞉ne, tkaiéri, tánon ioiánere.

¹³ Nók neh kén kéntons tsi nahóten ne ioiánere ne wakarihón꞉ni onkéʼrhiote? Iáh neh tekéntons! Kariwáneren thoʼnakásha; neh wakaniáhese ne ioiánereh, kariwáner en takáhawe ne kenhéion nakonháke, ehʼnahontáwe tsi niʼiorenʼnáhon ne kariwáneren nahiotáshon, Tanon káti, tsi nikéntons natsawenréhtsera kariwáneren wakonwéneste tsi sénha tehiotenonʼianíthon ioriwahtsáni.

Tsi Nahteionkwatatenikónrare

¹⁴ Ne kaianerénsera neh kéntons nonkwanikónra; nók iáh tekonʼnhéhonwe, ionkatenʼnínon tsi shíken ní꞉ioht ne rahnáskwa ne kariwanerenháktsera.

¹⁵ Kwáh iáh tewakenikonraiéntas tsi nikatiéra; Asèken iáh thotetiéra tsi nikaskáneks tsi nátiere, nók nehʼhe ken nietiéra tsi nahóten ne íkshons.

¹⁶ Tsi neh ken nietiéra tsi nahóten ne iáh neh tèkereh ne kén niátiere, neh kíʼ wenéstha tsi keriwanónwes ne kaianerénsera tsi tkaiérits.

¹⁷ Kwáh káti iáh iʼtèken kíʼ neh nitiérah; nekáti ne kariwáneren tsi nihión꞉nhe nakweriáne.

¹⁸ Wahkateriéntare nahoténsons neh iotkwéniens iáh teiakenikwékon—neh tsi niʼiohrenʼnáhon ne tierónke. Iawerohátien tsi wákrhe naskanéktsera neh thoʼnátiere nahóten neh iotkwéniens, iáh tatkwéni neh thonátiere.

¹⁹ Iáh neh kén tsientiéra neh tkariwaiéris; óʼias, neh꞉ne kariwáksens kén nietiéra iáh nènʼne neh tèkerhe.

²⁰ Tóhkaʼ ne ehʼnéntiere tsi nahóten ne iáh tèkereh, neh kíʼ kéntons iáh ónen í꞉i éhʼtho testiérah, nók neh kíʼ ne kariwáneren neh wahkatewehiaténʼni.

²¹ Éhʼtho káti ní꞉hiot tsi ketʼtsiénries kí꞉ken kaianerénsera tsi iohiothátie; neh káti ónen ìkereh neh thoʼnátierhe ne tkariwaiéri, nahóten neh kariwáksen nek khók wáhtsien.

²² Nakweriáne kwáh wahtsiennonʼniathákwa tsi nitkáhas neh Rawenni꞉io rahohianerénsera.

²³ Nók katʼkáthos kwáh thikaianerénserate iohióte natiéronke—kaianerénsera neh꞉ne iórhios neh kaianerénsera tsi niwakeriwaniráton nakenikónrake. Wahkonʼniénʼnis nahonkatenaskónniate ne kariwáneren ahoianerénsera tsi niʼióhiote natiéronke.

²⁴ Tsi ní iáh tewakhastsenʼnón꞉ni kí꞉ken kónkwe! Ónka éntion keniákenteh kí꞉ken oierónta hiahontiatenhawitonhátie neh kenheiátʼne?

²⁵ Tehonwanonweráton neh Rawenni꞉io, tsi kíʼ ehnihaiérah rahonháke ne Ié꞉sos Kerístos! Kí꞉ken, tsi iehiotéson, tenkeriwáhraste; kwáh hiatetiáti akʼkwéni natiótense neh Rawenni꞉io rahohianerénsera nek iekénha nakenikónra, nók tsi nihiorenʼnáhon ne tiéronke iohiótense ne kariwáneren kaianerénsera.