Romans 6 - Ohiatonhseratokénti

Tsionʼnhe Rahonháke Ne Kerístos

¹ Nahóten káti aihtewénron, khére káti kén? Tehiothonwentióʼon iaihtewatasónteren kariwanerahaktserákon nón naihtsiónʼnheke ehnahontáwe ahontehiáron ne Rawenni꞉io rahoténrat?

² Oriwihioʼónwe iáh! Ionkwenhéion tsi nióre ne kariwaneraháktsera ahioriwaiéntake, onʼní꞉ioht tsi ahónton ne iaihtewatasónteren ne kariwáneren non naihtsionʼnhétie.

³ Kwáh oriwihioʼónwe sewateriéntare kí꞉ken ne setewahtenekwáheste iehionkwakwékton neh Kerístos Ié꞉sos, tsi ionkwatenekwahéston iehiokwékton tsi rawenhéion.

⁴ Tsi ionkwatenekwahéston, nekáti, wehtewénheie tsi ní꞉ioht neh skát꞉ne ne raónha, tánon skát꞉ne ionkihiatháten, neh nahontáwe, kwáh tsi ní꞉ioht tsi sonwakhéskwen ne Kerístos ne kenheiát꞉ne, neh tsi niʼioriwanerákwat ne rahosatsʼtensera ne Kahnísera, neh nahónton náse nahonsiʼtsiónʼnhe꞉ke.

⁵ Tóhka énskat iehionkwatónʼon ne raónha tsi thoʼní꞉ioht tsi ionkwehéion tsi ní꞉ioht ne raónha, kwáh nesáka entewakwekónhake nahonsahionkihʼiónnhete tsi kíʼ ní꞉ioht ne raónha.

⁶ Tánon ionkwateriéntare nonkwahiathakáion konwarhio skát꞉ne ne Kerístos ne rahohiásake, neh nahontáwe nahosatsʼténsera ne kariwáneren ne iaʼteiehiáti nahónton akariwathónʼton, nehʼne tóhsa iahontasontaráke nahionkwanaskón꞉nike ne kariwáneren.

⁷ Asèken nónen entewénheie, entsitewathatewenʼnihió꞉ne tsi nòkwati nahosatsʼténsera ne kariwáneren.

⁸ Tóhka Kerístos skát꞉ne ionkwenhéion, tsionkwethákwen tsi ó꞉ni skát꞉ne entsitsiónʼnheke.

⁹ Asèken ionkwateriéntare ne Kerístos sonwakhétskwen ne kenheiát꞉ne tánon iáh nonwénton tahonsarénheie—ne kenhéion iáh nonwénton tahonsahotiathakweníʼioste.

¹⁰ Kwáh ne saoríhwa non níse tsi aihsewathatenontónnionse tsi ní꞉ioht naihsewenhéion, tsi nhióre iekéntons ne kariwáneren; nók tionʼnhétie ó꞉ni tewakwekonhátie neh Rawenni꞉io rahonháke ne Kerístos Ié꞉sos.

¹¹ Kwáh éhʼthoh ní꞉ioht tsi aihsewatatenonthónʼnionse tsi síken ní꞉ioht naihsewenhéion, tsi nhióre ne kariwáneren ahwérheke, nók tionʼnhétiek ó꞉ni sewakwekónhak ne Rawenni꞉io rahonháke ne Kerístos Ié꞉sos.

¹² Kariwáneren iáh thetióien ne sékon ahonsontsiathakweʼní꞉ioste neh sewahiathakónsons, nekati naihsewaiénhase tsi nitkanónwes ne sewaierónkes.

¹³ Tóhsa ó꞉ni sewatiakwaríshas ne kariwáneren tsik nahiotónhake ne tsionhakésons nehʼne ahónston ne kariwaneraháktsera. Khèkenk, Rawenni꞉io tatʼtsítsion ne tsiʼtión꞉nhe, tsi nihiáwenhe nhótiake tsi sonnatonʼnhéton, tánon kwáh sewahiathakwékon sewahtiakwarísi rahonháke nehʼne ahʼhónston tsi nòkwa ne kariwakwarishóntsera aoriwáke.

¹⁴ Ne kariwáneren iáh thatehiotonwentióhon naihsewatsathakweniʼiósten; níse iáh kaianerenserákon non thetionnhétie nók neh꞉ne Rawenni꞉io rahotenratserákon nón nitionʼnhétie.

Rathiʼnháskwa Tsi Nòkwah Ne Kariwakwarishóntsera

¹⁵ Nahóten, káti ónen? Ahitewariwaneráke kén, tsioríhwa tsi iáh kaianerénsera thehionkwaiatóron, nók Rawenni꞉io rahoténrat ionkwaiatóron? Iáh neh thekéntons!

¹⁶ Oriwhihioʼónwe tsi sewahteriéntare nónen ensewahtiakwarísi ne hiatesewaiáti naietʼtsinaskón꞉ni nónkak akóren aietʼtsiwenʼnarákwe, íseh ne kwáh thóʼkenske sewahnáskwa wesewáton tsi watsisewawenʼnahrákwe neh wahtsisewatsiathakwenihiósten—kaknikáien khék ne kariwáneren ensewawénʼnarakwe, neh kíʼne tkáhas ne kenhéion, tòhka ó꞉ni Rawenni꞉io tsisewahwénʼnarak neh꞉ne tkáhas nahonsehsewahiáneren꞉ne neh rahonháke.

¹⁷ Nók tahonwanonweráhton ne Rawenni꞉io! Iawerohátien tewenniseráthekwe kariwáneren ahotshé꞉nen kén꞉ne, kwáh káti seriasakwékon tsi wasatewennarákwe, ó꞉ni washéna ne tkariwaiéris ne washetʼtsénri tsi nahesarihónnien.

¹⁸ Sahʼsathatewenniʼió꞉ne tsi nòkwati ne kariwáneren tánon nehʼne kariwakwarishontserákon nonh nonsaiesateʼnaskónniate.

¹⁹ (Neh kástha ne iáh tewatewennhatóres ne niatewenniseráke tsioríhwa tsi nihiotsihióha ne sewanikonraienthátesras.) Tewenniseráthekwe kwáh tokénhen wesewahtsiakwarísi tsi sewanáskwa kén꞉ne tsi nòkwati ne iáh tehiotkwéniens tánon ne wanontonniontserákʼsens neh꞉ne ahorihónniat ne kariwahétkens. Tánon kwáh satèhiot ónenk tsi kwáh tòken hen ensewatsiakwarísi tsi ní꞉ioht tsi sewanáskwa sewahiótens nahoténsons ne tkariwaiéris, nók ne sasewahióten ne iotokéntis ahoriwasónhas.

²⁰ Ne kariwáneren sisewahnaskónʼni, iáh tesewateriwaiénʼni꞉ne ne thoʼnaihsewáiere tsi natehothonwentióniʼne ne Rawenni꞉io.

²¹ Kwáh oriwihioʼónwe iáh thènen tesewaienáhon onhnahóten nahioʼiánereke tsi naʼohrihoténsons nónwa tsi sewatéhens? Kenhéion iewathihénthos neh naohrihoténsons!

²² Nók kíʼ nónwa ónen tsi sewathotaríshion ne kariwanerenhákʼkonke, tánon kíʼ ónen thóhʼnon nitsisewanáskwa tsi nòkwati ne Rawenni꞉io. Enkanánon natónʼnhets tensewaténtsa tsi nensewariwatóken꞉ke ne rahonháke, tánon ne iehiokwékton natonʼnhes ne ionʼnheónwe.

²³ Naohkarhiátsera ne kariwáneren neh꞉ne tsi nieʼhiotʼthahínon ne kenhéion; nók ne Rawenni꞉io kwáh iáh ohthènen tehakaráiens tsi tatʼkáwas neh ionʼnheónwe atónʼnhes, neh tsi ratikwékon ne Kerístos Ié꞉sos Sonkwaiáner.