Romans 5 - Ohiatonhseratokénti

Skariwaserónʼni Tsi Nòkwa Ne Rawenni꞉io

¹ Ne káti tsi sénhak tionkwateriwaʼseronnién꞉ni tsi nitióha ne tewetákwen, ionkwaientáʼon ne skén꞉nen rahonháke ne Ié꞉sos Kerístos.

² Rahonháke non niʼionkwariwaienteráhon kí꞉ken ataniténron tsi nitsionʼnhétie, tánon onkwatsenʼnonniatserákon non niʼionkwathonʼnáhe꞉re nahitewaiéna ne Rawenni꞉io rahohiatanerakwátsera.

³ Kwáh ísiʼnon, tsi nihʼionkwatonʼnáhe꞉re non kwaronhiakenserákon, tiehionkwateriéntare ne karonhiakénsera tekawisʼsátste.

⁴ Naiontakátsʼtate tkáhas ne Rawenní꞉ioʼs rahoriwahniráhtsera, tánon ne rahoriwaniráhtsera iónʼnis ne askanéktsera.

⁵ Kí꞉ken naskanéktsera iáh teionkwanikonraténʼni, asèken ne Rawenni꞉io thowéron ne rahononronkwátsera non kweriánes tsi nihorihotáshon ne ronikonriʼióston, raónha ne Rawenni꞉io sonkwáhwi.

⁶ Neh꞉ne sékon iáh sitewasátsʼte, Kerístos wasakawenhé꞉iaʼse ne iakoriwáneren shakáhewe tsi nihorákwen ne Rawenni꞉io.

⁷ Kwáh íken tsi wateriwentóre nónkak ahiontathihéiaʼse neh iakoriwakwaríshon. Sékons ó꞉ni tòhka ónhkak áienreh ahiontathihéiaʼse ne ionkwetí꞉io.

⁸ Nók Rawenni꞉io rawenéston tsi nishonkwanorónkwa—kwáh sékon sihionkwariwáneren neh Kerístos shasonkwenʼhéiaʼse!

⁹ Tsi iehotathatkáwen ne kenheiátʼne ónen tionkwateriwaseronʼniénʼni tsi nòkwa ne Rawenni꞉io; tòhkati áreh sékon níkon, neh raónha ensehsonkwanónstaʼte tsi nòkwati ne Rawenni꞉io rahoʼnhakwátsera!

¹⁰ Tsi tewásonskwe ne Rawenni꞉io, nók washontiónʼnien ne raónha nonkwatéro ahitewáton thoʼnahontáwe ne tsi raweheión꞉ne ne Roiénha. Nónwa neh tsi ónen Rawenni꞉io onkwaténro ionkwatónʼon, tohsékon níkon entionkinónstate ne Kerístos rahothónʼnhets akarihón꞉ni!

¹¹ Nók iáh kíʼ thók tèkon; ionkwatonʼnáhere neh tsi nihoiéren ne Rawenni꞉io rahonháke ne Sonkwaiáner Ié꞉sos Kerístos, rahónha ónen wasontiónʼnien ne Rawenni꞉io aionkwaténroke.

Tsi Natheiatʼtíhe Ne Á꞉ton Tanon Ne Kerístos

¹² Kariwaneren tsawenon tsi ionwentsiate neh꞉ne saiatak khók rorihonʼni꞉on, tánon ne rahoriwanerahaktsera tsioha ne kenhéion. Tsi ehniʼiawenhen, kenhéion watewareni ne kwáh tsi niateiakahontsiake ne iorihon꞉ni tsi kwáh iateionkwetake iakoriwaneren.

¹³ Kaiénthakwe ne kariwáneren ne tsi ionwentsiate nohénton ne kaianerénsera sahonthontʼkáwen; nók kanónwe ne iáh tekahianerenseráien, iáh kanèka tekahiátonkwe nahonteweiénthonke ne kariwánerens.

¹⁴ Nók tsi nióre ne Á꞉ton tánon ne Mahís, kenhéion tsiakoniarotharón꞉ne ne onkwesónhas, iekaníhare tsi niháti ne iáh thotèhiot tsi ahotiriwáneren tsi ní꞉ioht ne Á꞉ton tsi iáh tehowenʼnarákwen neh Rawenni꞉io sahotsiawenrátʼtse. Ne Á꞉ton thóhwa tahonsakaieróntarake tsi nikáien neh táre.

¹⁵ Nók kíʼ teʼnihiáse thaténite. Asèken neh Rawenni꞉io iáh nènʼne thènen tehakaráiens, iáh tsi ní꞉ioht ne Á꞉ton rahoriwaneraháktsera. Kwáh oriwihioʼónwe ronatiokowánen rohnenhéion neh iorihonníʼon ne thóh sahiata rahoriwanerahákʼtsera. Nók kíʼ ne Rawenni꞉io rahoténrat sénha ne kasátste, tánon kíʼ ó꞉ni tsi iáh thènen tehiokaráien kwáh iakotiokowánen nonkwesónha rahonháke niehiakawénon, ne Ié꞉sos Kerístos.

¹⁶ Tanon kwáh kíʼ thetsiatʼthíhen neh Rawenni꞉io rahothatawítsera tánon neh saiátat rahoriwaneraháktsera. Sahariwaneráke neh Á꞉ton Rawenniʼio watoʼiatórete tsi rhoníkon; nók kíʼ tsi niʼiakotsiokowánen iakoriwáneren Rawenni꞉io wasakawehnésten ne rahothaniténrat ráthon, “Iáh tesewahníkon!”

¹⁷ Kwáh thóske tsi saiátat wahariwaneráke neh kenhéion thontásawen wahakotiatakwení꞉ioste neh rahorihónniat nètho saiátat rónkwe. Nók thóh ónhte niwéso sénha ioriʼowáhnen tsi nihokanón꞉ni nètho saiátat rónkwe, Ié꞉sos Kerístos! Tsi niʼiákon neniehiéna neh kwáh kanhánon Rawenni꞉io rahoténrat ó꞉ni kwáh thikénhak tiakotatewennihió꞉on tsi tiakoiánere tsi nateiátereh eniehiatakwení꞉ioke tsi enhiakónʼnheke rahonháke ne Kerístos. Ne tsi nihoriwakanón꞉ni ne Kerístos

¹⁸ Ne kátiken, nètho énskat kariwáneren iakorewáthon nonkwetaʼkwékon, kwáh ne sákat nénskat kariwakwarishíontsera tiakówis nathatewennihiótseras nonkwesónha ó꞉ni tshiakahónʼnhets.

¹⁹ Tanon kwáh tsi ní꞉ioht nonkwesónha tsi iontateriwanerahaktén꞉nis ne tsi nihoiérehn nètho iáh tehotewennarákwen, kwáh éhʼthoh ní꞉ioht tsi entiontateriwiʼiósten tsi nòkwáh ne Rawenni꞉io ne tsi nihoiéren neh Ié꞉sos Kerístos.

²⁰ Tsi tewatkáwen ne kaianerénsera nehʼne ahontehiáron ne aterientawenriétsera; nók tsi nónwe ne kariwáneren wahtewatsisá꞉sere, sénha iawehthowánen ne Rawenni꞉io rahoténrat tsi onhtehiáron.

²¹ Kwáh káti, tsi ní꞉ioht ne kariwáneren wakaiatakwenihió꞉ne ne kenhéion, thóh káti nòn꞉ne ní꞉ioht ne Rawenni꞉io rahoténrat tsi kaiatakwení꞉io neh kariwakwarishóntsera, thóh niehionkwahiaténhas tsi nónwe ne ionnheónhwe natónnhets rahonháke ne Ié꞉sos Kerístos sonkwaiáner.