Revelation 7 - Ohiatonhseratokénti

Ne 144,000 Nihá꞉ti Ne Ní꞉io Raonkweʼtashón꞉as

¹ Sontóhetste kí꞉ken Wakhé꞉ken kaié꞉ri nihá꞉ti ratironhiakeró꞉nons thóh ronhné꞉te ne kaié꞉ri natekaiosá꞉iens ne tsi ionwenhtsá꞉te, skonwaktátha ne kaié꞉ri nikawerá꞉kes ne tsi ionwenhtsá꞉te ne káti ne tóhsa othé꞉non nowé꞉ra nahón꞉ton takaweratá꞉se ne tsi ionwenhtsá꞉te khéks kaniatarakeʼkowáhne khéks ne tsi ioronthótons.

² Wahí꞉ken ó꞉ia raronhiakeró꞉non thóh nontahawenonhátie tsiʼkarahkwí꞉nekens, ne rahá꞉we ne ratsikwentáhkwa ne ronhnheón꞉we Ní꞉io, tánon wahatewenhnhowá꞉nate tsi iasakoná꞉ton ne kaié꞉ri nihá꞉ti ratironhiakeró꞉nons né꞉ne ronónha thonwaná꞉wi ne kaʼshatsténhsera ne ahatikarónhni tsi ionwenhtsá꞉te o꞉ni ne kaniatarakeʼkowáhne,

³ rontónhnions, “Tó꞉sa sewakarónhni ne tsi ionwenhtsá꞉te khéks ne kaniatarakeʼkó꞉wa khéks ne tsi keríhtons, tsi niió꞉re tenhiatkhiiá꞉ton ne raonhatserahó꞉kons nonkwáh Ní꞉io tsi enhiakhitsikwénhte ratikenkwahrá꞉kes nón꞉we.”

⁴ Tánon wahonkró꞉ri tsi niiá꞉kon ne ronwatitsikwénhton, énska tewenhniá꞉weh kaié꞉ri niwáhsen kaié꞉ri niwenhniaweheʼtsheráhsen nihá꞉ti, ronwaʼtitsikwénhton kwáh tsi niateothitará꞉kes nonkwé꞉shón꞉as ne Israerró꞉nonhke:

⁵ Ne raothiʼtará꞉kon ne Judah tékeni iawénhre tewenhniaweheʼtsheráhsen nihá꞉ti ronwathitsikwénhton, ne raothiʼtará꞉kon ne Reuben tékeni iawénhre tewenhniaweheʼtsheráhsen nihá꞉ti ronwathitsikwénhton, ne raothitarákon ne Gad tékeni iawénhre tewenhniaweheʼtsheráhsen nihá꞉ti ronhwathitsikwénhton,

⁶ ne raothiʼtará꞉kon ne Asher tékeni iawénhre tewenhniaweheʼtsheráhsen nihá꞉ti ronhwathitsikwénton, ne raothiʼtarákon ne Naphtali tékeni iawénhre tewenhniaweheʼtsheráhsen nihá꞉ti ronwathitsikwénhton, ne raothiʼtarákon ne Manasseh tékeni iawénhre tewenhniaweheʼtsheráhsen nihá꞉ti ronhwatitsikwénhton,

⁷ ne raothiʼtará꞉kon ne Simeon tékeni iawénhre tewenhniaweheʼtsheráhsen nihá꞉ti ronhwatitsikwénton, ne raothiʼtará꞉kon ne Levi tékeni iawénhre tewenhniaweheʼtsheráhsen nihá꞉ti ronhwatitsikwénhton, ne raothiʼtará꞉kon ne Issachar tékeni iawénhre tewenhniaweheʼtsheráhsen nihá꞉ti ronhwathitsikwénhton,

⁸ ne raothiʼtará꞉kon ne Zebulun tékeni iawénhre nihá꞉ti ronhwatitsikwénhton, ne raothiʼtará꞉kon ne Só꞉se tékeni iawénhre tewenhniaweheʼtsheráhsen nihá꞉ti ronhwatitsikwénhton, ne raothitará꞉kon ne Benjamin tékeni iawénhre tewenhniaweheʼtsheráhsen nihá꞉ti ronhwatitsikwénton.

Tsi Niiakotsiokwahtsáni Ne Niateiakahontsá꞉ke

⁹ Shontóhetste kí꞉ken iakatkáto, tánon wakhé꞉ken kwáh í꞉ken tsi kanenhrowá꞉nen né꞉ne iáh thaón꞉ton nahonwanaséhte, né꞉ne kwáh tsi niateiakahontsá꞉ke, né꞉ne kwáh tsi niateiakotará꞉kes ó꞉ni nonkwehó꞉kons ó꞉ni nakoronkhá꞉tsheras, thóh ronhné꞉te ohén꞉ton tsi wanitskwaratseró꞉te ó꞉ni raohén꞉ton ne teiotinaʼkarontón꞉ha owí꞉ra, teonateweiá꞉here kará꞉ken, ne rathihawáhnion ne ionerá꞉tes onenhrashón꞉as.

¹⁰ Teotihenréhtha tsi natehatiwenhnakaré꞉ni, ronhtón꞉nions, “Ne Kaiatakená꞉tshera ne raó꞉wenk nonkwáh Ní꞉io tsi raónha thóh renskó꞉te nanitskwá꞉rahne, ó꞉ni raónha ne teiotinaʼkarontónha owí꞉ra!”

¹¹ Tánon ratikwé꞉kon ne ratironhiakeró꞉nons ronhné꞉te teonakwataséhton tsi wanitskwahratseró꞉te tánon teowanakwataséhton ne rotikstenhokón꞉as tánon ne kaié꞉ri háti ronhnonhénion kahtsé꞉nens, tánon wahatiiatsénenhne tsahatikonsó꞉tane ohén꞉ton tsi wanitswaratseró꞉te tánon wahonwashén꞉naien Ní꞉io,

¹² teotiriwákwen, “É꞉tho niiá꞉wen! Kaiatateríhtshera ó꞉ni kaiatanerakwáhtshera ó꞉ni kanikonró꞉wanatsera tánon kanonwaratónhtsera ó꞉ni kakwenienstensera tánon kakwenient ó꞉ni kaʼshatsténhsera raonhà꞉ke nonkwáh Ní꞉io tsi nienhén꞉we ó꞉ni tsi nén꞉we enkénhake! É꞉tho niiá꞉wen.”

¹³ Ethò꞉ne saiá꞉ta ne roksténha wahat꞉tháhrase, ratón꞉nions, “Ónhka ne kí꞉kens, teotiweiáheres kará꞉kens, tánon kaʼnón꞉we nithonéhnon?”

¹⁴ Wahiiénhase, “Sénhshon, í꞉se khók saterièn꞉tare.” Ethò꞉ne wahakénhase, “Né꞉ne ronón꞉ha tontahonhnótkawe ne tsi nateiotenonhianì꞉ton tsi niioteriwatiérenhkwe; shotinhoharéhnion ne teontewehiarákwas tánon sahatirakénste thóh raonekwénhsake ne teiotinaʼkaronhtónha owí꞉ra.

¹⁵ Asè꞉ken ne kíʼ aorì꞉wa thóh rón꞉nete ohén꞉ton tsi rotenitskwaratseróte ne Ní꞉io, tánon ronwashénh꞉naiens tsi niwenhní꞉seres ó꞉ni tsi niwashón꞉tes raonónskon raononsatokentikó꞉wahne, ó꞉ni tsi niká꞉ien né꞉tho renskwáhere nanitskwaráhne kwáh enteshá꞉kone.

¹⁶ Kwáh iáh nonhwén꞉ton shé꞉kon tahonsahontonhkárahke, tánon iáh shé꞉kon tahonsahotinisatákʼten; ne entieʼnekhéka karáhkwa kwáh iáh tahiakokaronhniá꞉te, khéks ne khahó꞉tent ne kwáh iotsataʼtsáhat;

¹⁷ séken ne teiotinaʼkarontón꞉a owí꞉ra ne thóh í꞉res nashén꞉non tsi niwanitskwaratseró꞉te kwáh raónha enshekonónhna, tánon raónha kwáh iensakohéntenhse ne tsi tioné꞉kote ne iónhne, tánon Ní꞉io kwáh enshakokaseró꞉kewe ne niatekakahserá꞉ke ne ratiká꞉rakes.”