Revelation 4 - Ohiatonhseratokénti

Thonwahsén꞉naiens Karonhiá꞉ke

¹ Onakénhke kíʼ wakatkáto, tánon tho karonhiá꞉ke watewatenonhón꞉ti! Tánon ne tontié꞉renhte nowén꞉na, tsi ne né꞉tho onkathón꞉teʼne wakʼthará꞉ni kwáh né꞉ne ieonrawátstha, wá꞉ton, “Kén꞉en taserákthen, tánon í꞉i enkonhnatónhase tsi nahó꞉ten ó꞉nenk tsi thóh nenhiá꞉wenhne nonakénhke kí꞉ken.”

² Kwáh oksaók tsi ní꞉iot tonkasátenhne, tánon thóh karonhiá꞉ke wanitskwaratsérote, saiá꞉ta thóh renskwá꞉here nanitskwárane!

³ Tánon tsi niká꞉ien ne thóh renskwá꞉here ne teskaierón꞉tare tsi niwahshoʼkó꞉ten natʼthésa nikanenhióten tánon ne hioteherarónhnion, tánon ne tsi wanitskwaratsérote neh teiokwataséhton iorón꞉rote ne teskaieróntare ne teioshó꞉kwatʼte nohón꞉te.

⁴ Tsi teiokwatá꞉se ne tsi wanitskwaratseró꞉te thóh wanitskwaratseró꞉ton tewáhsen niwanitskwaratsherá꞉kes, tánon ne thóh ratitskó꞉tons tsi wanitskwaratseró꞉tons né꞉ne tewáhsen nihá꞉ti ratirihowá꞉nens ratirehtsá꞉rons, ne ronatseronhniá꞉tons ne kará꞉kens wakó꞉ses, owistanó꞉ron í꞉ken ne raonahnonwaró꞉res.

⁵ Thóh nontaiawenonhátie tsi wanitskwahratsérote tewaktsiraríhkons tewaninekarawánions, tánon iowerenhá꞉ties tánon iorakaré꞉ni tsi iowéren, tánon thóh ohén꞉ton tsi wanitskwaratseró꞉te iotékha tsá꞉ta ní꞉kons ne iotón꞉kote wathaserothákwas, né꞉tho né꞉ne tsá꞉ta niwatonhnhatserá꞉ke ronwaiò꞉tenhse ne Ní꞉io;

⁶ tánon nohén꞉ton tsi wanitskwaratseró꞉te khaótenk thóh ká꞉ien kwáh né꞉ne kanià꞉taro ne ioniá꞉ton ne ió꞉kent otsí꞉sera kwáh né꞉ne ó꞉wise. Ákta ne tsi wanitskwaratseró꞉te, tánon ne skatí꞉shon nokwá꞉ti tsi wanitskwaratseró꞉te, thóh rón꞉nete kaié꞉ri nihá꞉ti ronónhne, okaróskon í꞉ken ohén꞉ton tánon rathishón꞉ne:

⁷ ne tiotierénhton ne rón꞉nhe kwáh né꞉ne kénreks, ne tekení꞉haton rón꞉nhe kwáh né꞉ne teoná꞉kares tionhnónskwaron, nashén꞉haton ne rakonsontákwen ne ón꞉kwe akokónhsa, tánon ne kaierí꞉haton rónnhe kwáh né꞉ne rátse á꞉kweks.

⁸ Tánon kíʼ kaié꞉ri nihá꞉ti ronón꞉nhe, ne sathiiatatʼtions iáh-iak natehatinerahontióntons, kwáh okaróskonk thí꞉ken kwáh teonakwataséhton tánon ne rathinerahontsó꞉kons. Nenhtsekè꞉nes tánon nasonténhne kwáh iáh thatehatí꞉tas tsi teothiriwákwen, “Roiatatokénhti, roiatatokénhti, roiatatokénhti, ne Roiá꞉ner Ní꞉io ne Roshatatenserowá꞉nen, raónha ne tkénhne tánon nón꞉wa tánon tsi nénhtewe.”

⁹ Tánon ne nó꞉nen ne ronónhne entontkáwe ne kaiatahnerakwáhtshera ó꞉ni ne tekarénhsaron ó꞉ni kanonweratón꞉tsheras tsi niká꞉ien ne renskó꞉te nanitskwará꞉ne, raónha ne ronhneón꞉we ne tsi nén꞉we ó꞉ni tsi nienhen꞉we,

¹⁰ ne tewáhsen kaiéri nihá꞉ti ratirehtsá꞉ron wahatiiataién꞉taʼne raohén꞉ton tsi niká꞉ien né꞉tho renskó꞉te anitskwará꞉ne, tánon wahonwashén꞉naien tsi niká꞉ien ne raónha enrónhneke tsi nén꞉we tánon tsi nén꞉we enkénhake; thóh wahatí꞉ien ne raonanonwaró꞉re ohén꞉ton tsi wanitskwaráhserote, tehothiriwákwen, nónen thoh nenhotí꞉iere,

¹¹ “Í꞉se ne kakwenienstháhtshera í꞉ken, Onkwaiá꞉ner ó꞉ni Ónkwa Ní꞉io, nashé꞉na ne kaiatanerakwáhtshera ó꞉ni ne tekarénhsaron ó꞉ni kaʼshatsténhsera, asè꞉ken í꞉se norihwakwé꞉kon shasahánion, tánon né꞉ne tsi nitisanikonhrí꞉ioʼon kwáh wakaién꞉taʼne ó꞉ni ontón꞉nhete.”