Revelation 3 - Ohiatonhseratokénti

Né꞉ne Konwateriwanhó꞉tani Ne Sardis

¹ “Tánon raonhà꞉ke ne Raronhiakeró꞉non thóh nón꞉we nononsatokenhtí꞉ke ne Sardis shiá꞉ton: Ne kíʼ ne raoteriwanhothátshera ne raónha tesakoniarotá꞉ron ne tsá꞉ta niwatonhnhetsherá꞉ke ne ronwahiò꞉tense Ní꞉io tánon raónha rahá꞉we ne tsá꞉ta nikatsistóhkwake: “Wakaterièn꞉tare ne sahioʼténhsera; wakaterièn꞉tare tsi ní꞉iot nashón꞉neke, ók senhé꞉ion.

² Í꞉tie, tánon sheshatsténhseron tsi nahó꞉ten iothaténron tánon ne skaʼnó꞉ronks iakenhé꞉ie, asé꞉ken iáh tewaketsén꞉ron ne sahioʼténhseras niaiotéshonke raohén꞉ton nakení꞉io.

³ Sheiá꞉rak káti tsi nahó꞉ten saiená꞉on ó꞉ni sarónhken; saʼtewénhnarat, ó꞉ni sashatatré꞉wak. Tó꞉ka iáh tahonsáshie, kwáh thóh ní꞉iot tsi ténke tsi ní꞉iot ne ranénskwas, tánon ní꞉se kwáh iáh toh nenhiowistáheke enkonhiató꞉renhne.

⁴ Thosà꞉ne ní꞉se shé꞉kon toká꞉ra nihionkwè꞉takes thóh nón꞉we ne Sardis iáh aré꞉kho thateotitiónston ne raonhatierónhnias; ronón꞉ha kwáh skátne tenhiakwahtekháhakwe, ne enhonaʼtserón꞉niaton kará꞉ken, asè꞉ken teonhaténtion.

⁵ Tó꞉ka enshateshén꞉ni, ní꞉se kwáh thóh ní꞉iot tsi ensatierónhnike tsi ní꞉iot ne ronónha né꞉ne wakó꞉ses í꞉ken, tánon ní꞉i kwáh iáh thaonsakonhsenhnará꞉ko ne kaiatonhserá꞉kon ne iónhne; tánon ní꞉i kwáh enkeriwaní꞉rate ne sashén꞉na raohén꞉ton ne Rakeʼní꞉ha ó꞉ni raotihén꞉ton ne raoronhiakerononó꞉kons.

⁶ Ánion ónhka ne teionhontaká꞉ronhte iontaonsátat tsi nahó꞉ten ne Roʼnikonriióston ratónhnions ononhà꞉ke tsi ionterenhnaientáhkwas.

Ne Nateriwanhothátsheras Thóh Nón꞉we Ne Philadelphia

⁷ “Tánon raonhà꞉ke ne raronhiakeró꞉non ne tsi ionterenhnaientáhkwa ne Philadelphia shiá꞉ton: Ne kí꞉ken ne raowenhnaó꞉kons ne Roiatatokénhti í꞉ken, ne ne orihwiioʼón꞉kwe í꞉ken, raónha rahá꞉we ne raonontónhkwa ne Táwit, raónha ranontónhkwas tánon iáh ónhka taiekwé꞉ni nahonsaienhó꞉ton, raónha ranhó꞉tons tánon iáh ónhka taiekwé꞉ni nahonsaienhotón꞉ko:

⁸ “Wakaterièn꞉tare ne saioʼténhseras. Satkáto, Wakonién꞉hase sahén꞉ton ne tekanonhóntion, né꞉tho iáh ónhka taiekwé꞉ni ahonsaienhó꞉ton. Wakaterièn꞉tare tsi kenk nishashatsténhsera, tánon kíʼ satienawátston nakewén꞉na ó꞉ni iáh tesatonhní꞉en natsén꞉na.

⁹ Ní꞉i kwáh enkeiónhnien tsi nihiá꞉kon ne thóh nón꞉we niiehiá꞉tare ne Ótkon raotióhkwakon tsi nihiá꞉kon né꞉ne iónton ratisitaheró꞉nons tánon iáh thóh tehatiiató꞉ten, ók ronhnowénhtha—ní꞉i kwáh enkheiónhnien ethò꞉ne tánon tenhontenʼtsó꞉ten sahén꞉ton ne shasità꞉ke, tánon enhatiweientè꞉thaʼne né꞉tho ní꞉i tsi konorónhkwa.

¹⁰ Tiorì꞉wa ní꞉se tsi satienawátston nakewén꞉na ne ioʼnikonhkátste tekawishátste, Ní꞉i kwáh enkonhnónsthate nó꞉nen enwá꞉we ne tsi nikawistá꞉hets né꞉tho taionhnikón꞉raren tsi nontaiawenonhátie ohontsakwé꞉kon ne nahiakoteʼnién꞉ten ne ronhnonhontsakeró꞉nons.

¹¹ Ní꞉i kwáh ióstre tón꞉take; senónstat tsi nahò꞉ten sá꞉ien, ne káti ne tóhsa ónhka aiesá꞉kwa ne sanón꞉warore.

¹² Tó꞉ka ní꞉se ensatesénhni, Ní꞉i kwáh ne enkonhionhniá꞉te ne kanawaháta thóh raononsatokentikó꞉wane nakení꞉io; ní꞉se kwáh iáh nonhwén꞉ton thataontahshiá꞉kenhne. Ní꞉i kwáh thenkonhiá꞉ton ne raoshén꞉na nakení꞉io, tánon tsi niiosenhnó꞉ten ne naoná꞉ta nakení꞉io, né꞉ne ná꞉se Jerusalem ne né꞉tho entewasnénhte tsi nénhtewe nakení꞉ione entkaiá꞉kenhne karonhiá꞉ke, tánon ne kwáh Í꞉i aksén꞉nase.

¹³ Ánion nónhka teionhontaká꞉ronhte iontahónsatat tsi nahó꞉ten ne Ronikonrí꞉ioston sakawénhni ronón꞉hake ne tsi ionterenhnaientákwahs.

Ne Nateriwahnotháhtshera Ahonhà꞉ke Ne Laodicea

¹⁴ “Tánon raonhá꞉ke ne raronhiakeró꞉non ne tsi ionterenhnaientáhkwa thóh nón꞉we Laodicea shiá꞉ton: Ne nowenhnaó꞉kons ne é꞉tho naiá꞉wenhne, né꞉ne ioriwató꞉ken ó꞉ni norihwiioʼón꞉we kariwahní꞉rats, tsi nitsotasawáhnion tsi nahoʼténhsons ne Ní꞉io rosaʼhánion:

¹⁵ “Wakaterièn꞉tare ne saioʼténhseras; ní꞉se kakniká꞉ien aiowiostóhake khek naiotarihénhake. Kaská꞉neks né꞉tho ní꞉se kakniká꞉ien akénhake iowísto kheks ioʼtarí꞉hen.

¹⁶ Káti, ne kíʼ aorí꞉wa ní꞉se tsi kwáh nek khók ne iá꞉ken tsi ioʼtarí꞉hen, tánon kák niká꞉ien iowísto kheks ioʼtarí꞉hen, í꞉i ó꞉nen thó꞉wa aiontakonianitskerónhti ne tsitʼsakáronhte.

¹⁷ Asè꞉ken ní꞉se sá꞉ton, ní꞉i wákwatse, ní꞉i waʼtsanerasténhni, tánon iáh othé꞉non thatewakatonhontsó꞉ni. Ní꞉se iáh tesató꞉kas né꞉tho ní꞉se tsi nishonhnatʼsénhskwah, iothatiténrat, senténhtha, teserón꞉wekon, tánon sanheoskonkthí꞉ken.

¹⁸ Ne kíʼ kí꞉ken aorí꞉wa wakoniatenikónron nasetní꞉non nowistanó꞉ron né꞉ne kwáh owistanorontseróskon í꞉ken né꞉ne notsí꞉rake iotohétston ne káti ní꞉se naón꞉ton aisakwasé꞉ne; tánon kará꞉ken waʼkó꞉ses aiesaseronhniá꞉te tánon tó꞉sa awenéston tsi sanhéhonk thí꞉ken ne tó꞉sa ónhka aiesá꞉ken; tánon né꞉ne ratináskwa aiesakaróhkaf ne kíʼ nahón꞉ton nasatkatóhseke.

¹⁹ Enkheiaʼtewenhnaién꞉tonhwe tánon enkheriónhnien tsi niiá꞉kon ne khenorónhkwa. Kwáh kíʼ tasewaʼnikonrakontakwénhak, ne aorí꞉wa, tánon sasewatatré꞉wat.

²⁰ Satahón꞉satat! Thóh í꞉kete tsi kanonkáronhte, wakenhoháien; tó꞉ka ensathón꞉teʼne nakewén꞉na tánon tensanonhónti, Kwáh ní꞉i ienkoniatawehiáten tánon tentiatónhte, ó꞉ni ní꞉se skátne ní꞉i.

²¹ Né꞉ne tsi niká꞉ien nenhatesén꞉ni enhinákton skátne ní꞉i enhiatiá꞉tsen nakanitskwá꞉rane. Kwáh tsi ní꞉iot ní꞉i tsi wakatesén꞉nion tánon wakaʼtsien ne Rakeʼní꞉ha raonitskwáhrá꞉ne.

²² Ánion nónhka tehionhontakaron꞉te naiakothonhtè꞉ne tsi nahó꞉ten ne Ronikonriióston saʼkawénhnis ne tsi ionterenhnaientáhkwas.”