Revelation 18 - Ohiatonhseratokénti

Tsi Nakaiathá꞉ton Ne Babylon

¹ Shontóhetste kí꞉ken sahí꞉ken ó꞉ia raronhiakeró꞉non tahosnentonhá꞉tie karonhiá꞉ke, kwáh í꞉ken tsi rokweniatserowá꞉nen; tánon ne tsi ionwenhtsá꞉te ne watsoswatéten tsi nihohiatanerákwat.

² Tontahohénrehte kwáh tsi nihawén꞉na, “Teioréhnion, teioréhnion seh ne Babylon né꞉ne kashennowá꞉nen! Ne iehiotónhon thóh nón꞉we nihathiʼterón꞉ton ne rontʼkonserát꞉sens, thóh nón꞉we nihontsientáhkwa ne ratnikonrahétkens, thóh nón꞉we nikontsientáhkwa ne katsitenserátsens, thóh nón꞉we nihontsientáhkwa notsitenokónhas ó꞉ni ne tsonewárat katsinonwáksens.

³ Asè꞉ken ratikwé꞉kon ne ronnonhontsakeró꞉nons rotinonwaratónhon ne rotinekí꞉ren naoné꞉ka otsí꞉tsa né꞉ne aterhiatitkhóntshera nahó꞉wenk kentétshera, tánon ne roʼtinontí꞉ios ne tsi ionwenhtsá꞉te ne wahonteriwathentsiá꞉te kentétshera skátne naón꞉ha, tánon ne ronatenhninonseró꞉tons ne tsi ionwenhtsá꞉te kwáh í꞉ken tsi waotikwahtshéne thóh nontá꞉we ahoshatstenhserá꞉kon naó꞉wenk iorá꞉ses.”

⁴ Eʼthó꞉ne ó꞉ia sakewenhná꞉ronhke thóh nontá꞉we karonhiá꞉ke watón꞉nions, “Tasewaiá꞉ken nahonhá꞉ke, akonkweʼtashón꞉as ne káti ne tó꞉sa ní꞉se ahisewatiá꞉taren naoriwanerahatsherá꞉kons, tánon káti né꞉tho ní꞉se tó꞉sa ahisewaienʼtá꞉rane thóh aokraó꞉kons;

⁵ asè꞉ken naoriwanerahák꞉tsheras iotonhióte thóh nitsót꞉te tsi tkaronhiá꞉te, tánon ne Ní꞉io sarehiá꞉rane naoterenhtawenhriétsheras.

⁶ Thóh nonsatiéras nahón꞉ha tsi ne niiakoiérase nakorénhsons, tánon tetsá꞉ser tsi saská꞉rhias tsi ne niiotiéren ne ahón꞉ha; tétsests sénha kanekashátstet nahoriwà꞉ke kaksákon nahón꞉ha teioiéston.

⁷ Tsi ne natewathatsatanerá꞉kwate tánon tsi nihiónnhe tsi niiókwats, sók kíʼ ontathá꞉ton tsi ní꞉iot onstón꞉ha ne karonhiakénhsera tánon kaʼnikonhratsénhtsera. Tsi ná꞉he nawehrientá꞉kon watón꞉nions, ‘Wakatró꞉raston tsi ní꞉iot nahonkenontí꞉ioke; Ní꞉i iáh tewakateréhons, tánon iáh nonhwén꞉ton thatenhtserá꞉ne kaʼnikonraksénhtshera,’

⁸ né꞉se wahón꞉ni nahohrashón꞉as kwáh enwá꞉we ne nón꞉we sewenhniserák꞉khok enkénhake— kahnrhaó꞉kon tánon nahiontʼtiónhnion tánon natonkarhiá꞉kon— tánon ne raón꞉ha kwáh kíʼ enkonwatsiatatʼtsáhate otsirá꞉ke; asè꞉ken roshatstenhserowá꞉nen seh ne Roiá꞉ner Ní꞉io raón꞉ha rariwenhtáse.”

⁹ Tánon ne rotinontí꞉ios ne tsi ionwentsá꞉te, ronón꞉ha ne teonatnérenh ne kentéhsera tánon kwáh í꞉ken tsi iókwats tsi thóh rononhetiè꞉ne skátne naón꞉ha, kwáh kíʼ tenhonséntʼto tánon tenkonwasentʼtose nó꞉nen enhontkáto noièn꞉kwahra ne konwatsataʼtsahathákwen;

¹⁰ ne ronón꞉ha ahí꞉nonh nió꞉re thentatí꞉taʼne, ne rotiteronkwénhnis nahoronhiakénhsera, tánon rón꞉ton, “Iotenhtá꞉sere, iotenhtá꞉sere, ne kashennowá꞉nen kanatowanénhke, Babylon, né꞉ne ioshatstenhserowá꞉nen kanatowá꞉nen! Asè꞉ken tsi niió꞉re nénkak enkawistáheke ne sariwenhthátshera enwá꞉we.”

¹¹ Tánon ne ronatenhninonseró꞉tons ne tsi ionwenhtsá꞉te watonséntʼto tánon wahkonwatiónhnionse, ne tsi iáh ónhka tetsení꞉nons ne raonatkeronhtátsheras,

¹² natkeronhtá꞉tsheras ne owistanó꞉rons, kawistará꞉kens, owistanoronhshón꞉as, ne wahniatarí꞉ios, ariwakonhnéha, káneks tánon nonekwentá꞉ras, tekontʼtihánion ne kaientakénre, niatekonshón꞉as ne oná꞉kares, niatekonshón꞉ahs ne kaientanó꞉rons, owá꞉sas, karístatsi, tánon ne teionenhiastarát꞉tes

¹³ ionawatsistathén꞉en iontekhwakonhonstákhwa, iontsiatakonhonstáhkwa, wehienanó꞉rons, kaienkwarákon, otsí꞉tsa, iakeniewátha kénhie, kateserí꞉io tánon onátsa, tionónskwarons tánon teiotinaʼkaronhtón꞉as, akoshá꞉tens ó꞉ni otiónhkwa ká꞉seres, nónkwe ronwahtiié꞉nen tsi waterí꞉ios tánon iekaní꞉hare tsi iakonnhénion nónkwe.

¹⁴ “Akwé꞉kons ne iotonhní꞉sons kaienthóhserons ne né꞉tho tsi shón꞉nhe waskáneks kakʼtseiawé꞉non, akwé꞉kon tsi nahoʼténhsons ne ahishonkweʼtí꞉ioste iesatonténhni, iáh nonhwén꞉ton shé꞉kon tahonsakatsénhrion!”

¹⁵ Ne rontkérons kíʼ ionstá꞉sonhas, ronón꞉ha ne rotikwatiéhons tsi nitsawénon nahonhà꞉ke, kwáh kíʼ ahí꞉non niió꞉re thentatí꞉taʼne, enhotiterónhseke nahoronhiakénhsera, tehonsentósheke tánon enkonwatiónhnionhse enhotiwénhteke,

¹⁶ “Iotenhtáhsere, iotenhtáhsere, ne kanatowanénhke, ne iotserón꞉niaton ne kaniatarí꞉ios, ne ne ariwaʼkonhnéha tánon onekwénhtara niwashokó꞉tens, ne iorasestáhkwen nowistanó꞉ron, owistanoronhshón꞉as, ó꞉ni nonekó꞉ras!

¹⁷ Asè꞉ken ne énskak wahkawistáheke kí꞉ken kaʼkwasétshera kakʼtsá꞉he!” Tánon ratikwé꞉kon ne ratihonwehiakwení꞉ios tánon ne kahonwá꞉kon ratiiathitakenóntie, rontsirók꞉tha tánon ratikwé꞉kon tsi nihá꞉ti ne kaniatarakeʼkowáhne nón꞉we nihonathaʼtonhnakénen, ahí꞉non niió꞉re tonthahatí꞉taʼne

¹⁸ tánon tsiathotihenrehtekó꞉wa tsi nahontkáto noienkwára ne iotsatatekháton, “Nakanató꞉ten ne kanatowá꞉nen tahonsakaieronhtá꞉rake ne kashenhnowá꞉nen kanatowanénhke?”

¹⁹ Tánon ne tahoná꞉ti ne wahkenrón꞉takwen okénra ratinontsí꞉ne, tsi nathonsénto tánon wahontiónhnionwe, tsiatehotihenrehthakó꞉wa, “Iotenhtháhsere, iotenhtáhsere, ne kashenhnowá꞉nen kanatowanénhke, kanihón꞉nes ratikwé꞉kon ne rotihonwahién꞉tons ne kaniatarakeʼkowáhne ne wahotikwaséststen naón꞉ha ahotsokowátsera! Asè꞉ken enskak wakawistáheke kakʼtsá꞉hahe.

²⁰ Satonhná꞉heras, o karonhiá꞉ke, í꞉se ne sewaiatatokéntis tánon ne sewateriwanhótha tánon ne iesewahriwákens! Asè꞉ken ne Ní꞉io thokáwen ne kariwenhthátsera ní꞉se ahisewatʼkónten naón꞉ha.”

²¹ Eʼthó꞉ne rashatsteʼkó꞉wa raronhiakeró꞉non waʼthanenhiákwe ne teskaieronhtá꞉re ne kaʼthétha onénhia tánon thóh iahonenhiónti kaʼniatarakeʼkowáhne, ratónhnions, “Ne tsi niwahteriioseranónhwe ne Babylon ne kashennowá꞉nen kanatowá꞉nen kwáh kíʼ enkonwariwahtónhte, tánon iáh nonhwénhton shé꞉kon tahonsakonwáhken;

²² tánon ne raterennhókta nonhowakó꞉wa ó꞉ni ne ratirenhnaienté꞉ris ó꞉ni ne ohó꞉rota waterennhó꞉tha ó꞉ni ne ieonrawátstha kwáh iáh shé꞉kon tahonsaiesathahonsáthate; tánon ne rotihiotenhserarenhnáons niatekaiotenhserá꞉ke kwáh iáh shé꞉kon tahonsaonwatiiatatʼtsénri ne satenátake; tánon ne taiontonhárake ne kathé꞉ta onénhia kwáh iáh shé꞉kon tahonsaiakotón꞉teʼne ne satenátake;

²³ tánon ne wathasheranihiontháhkwa kwáh iáh shé꞉kon thatahonsakaswát꞉tete ne satená꞉take tánon ne raotiwenhnaókons ne rotiiákhons ó꞉ni ne iotiniátkhons kwáh iáh shé꞉kon tahonsaonwatiwenhná꞉ronke ne satená꞉take asè꞉ken ne shonkweʼtashón꞉as ne rontkérons ronón꞉ha ne ratisennhowanénskwe ne tsi ionwenhtsá꞉te, tánon ratikwé꞉kon ne ronhnonwenhtsakeró꞉nons né꞉ne satenhennarátseras iakonikonraténhniskwe.

²⁴ Tánon í꞉seke nón꞉we nikatsénrion ne raotinekwénsas ne roʼtitokenséhakwe tánon ne rotiiatatokéntiskwe, tánon ratikwé꞉kon ne ronwatinonwarhià꞉khon ne tsi ionwenhtsá꞉te.”