Revelation 16 - Ohiatonhseratokénti

Ne Kátshe Sónhas Ne Ní꞉io Raoterhiatitkhóntshera

¹ Eʼthò꞉ne iowénhte wakewenhná꞉ronhke thóh nontá꞉we ononsatokentikó꞉wane iakoró꞉ris ne tsá꞉ta nihá꞉ti ratironhiakeró꞉nons, “Wáhs tánon tasewawéhron ne tsi ionwenhtsá꞉te ne tsá꞉ta nikatshetákes ne raoterhiatitkhóntshera ne Ní꞉io.”

² Sók kíʼ ne thotierénhton raronhioakeró꞉non iahá꞉re tánon taháwehron ne rahó꞉tse nonwenhtsá꞉ke, tánon teiotenonhianì꞉ton tánon ioroniakenthatsá꞉ni wahontiáto tsi nihá꞉ti ne teonwatiiá꞉ton rahoiatónhkwa ne katsinoniowá꞉nen tánon konwashén꞉naiens ne raohiatónhni.

³ Ne tekeníhaton raronhiakeró꞉non tahá꞉weron ne rahó꞉tse thóh kaniatarakeʼkowáhne, tánon thóh naháwenhne tsi ní꞉iot ne akonekwénhsa ne iakawenhé꞉ion oierón꞉ta, tánon tsi nahó꞉ten ne konkonnheniónkwe ne thóh kaniatarakeʼkowáhne wakonhnihé꞉ie.

⁴ Ne asénhaton raronhiakeró꞉non tahá꞉weron ne raótse thóh tsi kaniatarénions ó꞉ni tsi tsionekó꞉ton, tánon ne iatewakté꞉ni onekwénhsa.

⁵ Tánon wahihiathón꞉teʼne ne raronhiakeró꞉non ne tehatnekanónhne wahén꞉ron, “Í꞉se ne tisariwá꞉ieri, O Saiatatokénti, í꞉se nón꞉we í꞉ken, tánon tsi titkénhne, asè꞉ken í꞉se tesaiatoretánion kíʼ nahorihoʼténhsons:

⁶ tiorì꞉wa tsi sakotinekʼkwáhton ne rotiiatatokentískwe ó꞉ni rotitokenséhakwe, í꞉se tesheiá꞉wi nonekwénhsa ahatinekí꞉ra. Eʼtho senateonathéntion!”

⁷ Tánon onkahonshón꞉kote thóh nontá꞉we ietsienharáhkwake wá꞉ton, “Hén, O Saiá꞉ner Ní꞉io, sashatstenhserowanenhkó꞉wa, ne sariwenhthá꞉tseras tsi tkariwaié꞉ri ó꞉ni ioiá꞉nere!”

⁸ Ne kaierihá꞉ton raronhiakeró꞉non karáhkwake ne iaháweron ne raʼotse, tánon onteriwanónwehne ótsire aiakonethentát꞉te nonkwehó꞉kon:

⁹ ne wahakonethentát꞉te ne kwáh í꞉ken ioʼtarí꞉hen, ók wahonwasenhnaiésate ne Ní꞉io, tsi niká꞉ien ne rokweniatsherá꞉ien tsi nokwáh kí꞉ken kanhratariné꞉tsheras, tánon iáh teshonatatrewá꞉ton ó꞉ni nahontahónhion kaiatanerakwáhtshera.

¹⁰ Ne wiská꞉ton raronhiakeró꞉non tahá꞉weron ne rahó꞉tse thóh rahonitskwará꞉ne ne kaʼtsinonhiowá꞉nen, tánon ne raotenhatakweniiotserakén꞉en iatewanonwetsaweronhtáne tsi tetioʼkaraskó꞉wa; nonkwehó꞉kon wahontatenhnasá꞉rike tsi nahatironhiá꞉ken,

¹¹ tánon wahonwasenhnaiésate ne rah Ní꞉io Karonhiá꞉ke thèn꞉teron ne waʼkarihón꞉ni raotironhiakénhsera ó꞉ni tsi nihonatkarewathánion, tánon iáh teshonatatʼrehwá꞉ton tsi nihatiweienó꞉tens.

¹² Ne iaiá꞉khaton raronhiakeró꞉non tahá꞉weron ne raó꞉tse thóh kaniatarakeʼkowá꞉nen Euphrates, tánon nahoné꞉ka ostéske ne nahón꞉ton nahiakohasehrónhnien ne rontinontí꞉ios tsi nenhtón꞉ne tsitʼkarahkwí꞉nekens.

¹³ Tánon waʼkhé꞉ken áhsen nihá꞉ti ne teotinikonrátion tsi ní꞉iot noskwáre thóh tahioiakenhenhátie tsi rahsakáronhte ne rononwaronhtsétha, thóh tkaiá꞉kens tsi rasaʼká꞉ronhte ne katsinonhiowá꞉nen, tánon thóh tkaiá꞉kens tsi ratisakáronhte ne roʼtitokensetseráksens.

¹⁴ Ne kí꞉kens ne rontʼkonseráksens í꞉ken, iatékon tehatiieronhnionhátons, tsik nonwéhsons niehonhnétha tsi thathì꞉teronh ne ronhtinontí꞉ios ne tsi ionwenhtsá꞉te, ne nasakotiiataró꞉roke nahonterí꞉io ne thóh entewenhniserá꞉teke ne wenhniserowá꞉nen ne Ní꞉io rawenhní꞉sera né꞉ne Roshatstenhserowanenhkó꞉wa.

¹⁵ (“Satkáto, tsi nontonkenonhá꞉tie thóh niiót tsi niiót ne ranénskwas! Roʼtaskats nónhka ne rotiewá꞉te tánon rotierónhni, tánon rotienawáston ne tehatewehiarákwas iáh kíʼ teonostóskon tèken tánon naréhneste atehénsera.”)

¹⁶ Tánon wahontiaʼtaró꞉roke tsi tewatená꞉taien né꞉tho ne Hebrew aronkhá꞉tsera konwanaʼtónhkwa Harmageddon.

¹⁷ Ne tsatá꞉khaton raronhiakeró꞉non taháweron ne raó꞉tse thoʼowerá꞉ke, tánon kawenhnowá꞉nen takaiá꞉kenhne nonhnonsatokéntike, thóh nontá꞉we tsi tewanitskwaratseró꞉te, watón꞉nions, “Kwáh iakawehienentá꞉ne!”

¹⁸ Tánon thóh ón꞉we tewaninekarawánions, ioritstáre, iorakaré꞉ni tsi niiowé꞉ren, tánon teiotenonhianì꞉ton tsi watsahontsishónkwe, thóh niió꞉re tsi nateiotenonhianì꞉ton tsi watsahontsí꞉shonkwe.

¹⁹ Ne kanatowanénke watewatekhá꞉si áhsen ní꞉kon iahón꞉ton, tánon ne ronhnonhontsakeró꞉nons raotinatakónshons watewaré꞉ni. Ne Ní꞉io sharehiá꞉rane ne teiotenonhianì꞉ton Babylon tánon tá꞉ron ne otsí꞉tsa-teiontnekontáhkwah né꞉ne raotenakwahwenhrhá꞉tsera ne raoterhiatitkóntshera.

²⁰ Tánon kwáh tsi ní꞉kons kawehnhó꞉tons kakʼtsiá꞉konhne, tánon ne ionhnontowá꞉nens iáh tahonshaietsénri;

²¹ tánon kawishowá꞉nens wahowí꞉sonhti, ne skát꞉tions thó꞉wa énska tewenhniá꞉we nikakontserá꞉ke nihiótstes, tonsénhne karonhiá꞉ke ne watsakohiatorá꞉rake nonkwehó꞉kons, tsi nikarì꞉wes ronwakenhrenserónhnis ne Ní꞉io ne aorihwá꞉ke ne kannratarinéhtseras tsi wahowisónhti, thóh niió꞉re tsi ioteronhtón꞉ne né꞉tho kannratarinéhtsera.