Revelation 13 - Ohiatonhseratokénti

¹ Tánon waʼhí꞉ken katsinoniowá꞉nen tahoteskokonhá꞉tie ne kaniatarakeʼkowáhne, oié꞉ri nateonaká꞉ronte tánon tsá꞉ta nihonontsístonte; tánon thóh ranakará꞉kes kaʼhé꞉re oié꞉ri niwanonwarotserá꞉kes, tánon thóh ranontsí꞉nes kasenhnarónhnions ne ronwanikonratsáta ne Ní꞉io.

² Tánon ne kátsi noniowá꞉nen né꞉tho wahí꞉ken ne teshiatiéren ne rorakwarónhnion takós, ne rashì꞉takes kwáh né꞉ne okwá꞉ris, tánon ne tsi rasaká꞉ronhte kwáh né꞉ne kénreks tsi rasaká꞉ronhte. Tánon ne rononwahronhiétha ne kwáh raónha raoshatsténhsera ne tahá꞉wen né꞉tho katsinoniowá꞉nen tánon ne raonitskwá꞉ra tánon ne raokweniá꞉tshera.

³ Énska ne tsi ronontsistónte ne katsinoniowá꞉nen iakorhiotha tsi nihokarehwá꞉ton, ók ionsahakwatáko kíʼ. Tsi nahakonerakwenhá꞉ton ne ohontsakwé꞉kon ne wahonwanonteratséson ne katsinoniowá꞉nen.

⁴ Tánon onkweʼtakwé꞉kon wahonwá꞉senhnaientakwe ne katsinoniowá꞉nen, Asè꞉ken ieokʼkáwen ne raokweniátsera raonhà꞉ke ne katsinoniowá꞉nen, tánon ne wahonwasénhnaien ne katsinoniowá꞉nen, iontón꞉nions, “Ónhka ne tahonsahiatiérenke ne katsinoniowá꞉nen, tánon ónhka aiekwé꞉ni né꞉ne ahiaterí꞉io?”

⁵ Ne katsinoniowá꞉nen Ní꞉io wahorí꞉hon nahatá꞉ti tánon ne wahatatsáte ne tahataterénhsaron tánon nahonikonrakarewáhte ne Ní꞉io, tánon tsi wahonwarí꞉hon né꞉ne á꞉ratste kakweniá꞉tshera né꞉ne kaiéri niwáhsen-tékeni niwenhní꞉takes nikarí꞉wes.

⁶ Tahatáhsawen wahatá꞉ti né꞉ne nahonikonrakarewá꞉te Ní꞉io, rosenhnaiesatonháties ne rahoshén꞉na tánon ne tsi thèn꞉teron, ó꞉ni tsi nihiá꞉kon né꞉tho nón꞉we tsenákere karonhiá꞉ke.

⁷ Kwáh ó꞉ni wahonwarí꞉hon nasakoteriioserónhnien ne roʼtiiatatokéntis tánon nashakosénhni. Tsi thonwá꞉wi ne kaweniá꞉tshera ne entsakororókte niateiakotióhkwakes ó꞉ni nonkweshón꞉as ó꞉ni naronkhátsera ó꞉ni niakahontsakerónons,

⁸ tánon onkweʼtakwé꞉kon nonhontsake ienákere kwáh eniesénhnaien, onkweʼtakwé꞉kon tsi niiá꞉kon ne iáh teiesenhná꞉re nohén꞉ton sontónhni tsi ionwenhtsá꞉te thóh raoiatonhserá꞉kon ne iónhne ne teiotinaʼkarontónha owí꞉ra né꞉tho ronwanonwarià꞉kon ne tsi tsiotonhontsatáhsawe.

⁹ Ánion nón꞉ka teionhontakáronhte iontahón꞉satat:

¹⁰ Tó꞉ka ní꞉se iaiesaiá꞉tenhawe naiesanhó꞉ton, ne naiesanhó꞉ton iaháse, tó꞉ka ní꞉se aiesanonwarià꞉khon asareʼkó꞉wa á꞉honste, asareʼkó꞉waki enwátston tsi entiesanonwarhià꞉khon. Kí꞉ken ne kariwanón꞉tons ne rotiiatatokéntis ne rotinikonkátste tánon thonhnhetákwen.

Ne Tekeníhaton Katsinoniowá꞉nen

¹¹ Eʼthò꞉ne wahí꞉ken ó꞉ia katsinoniowá꞉nen thontaronhontsiót꞉kawe; tékeni teonakáronte tsi niiót ne teonakarontónha tánon thóh niiót tsi roʼtá꞉re tsi tsiiót ne rononwarontiétha.

¹² Ne wáratste akwé꞉kon ne raokweniá꞉tsheras ne thotierénton kátsi noniowá꞉nen ne raónha raorihwá꞉ke, tánon ne waronhniá꞉te ne tsi ionwenhtsá꞉te tánon ne iená꞉keres nahonwashén꞉naien ne thotierénhton katsinoniowá꞉nenh, raón꞉ha ne seréhka aorhió꞉ton ók shokkwatákwen.

¹³ Tsi nahaierá꞉nion ioriwanerakwaténion, iekaní꞉hare ó꞉ni wahariwakwé꞉ni ne karonhiá꞉ke nontontʼtsirí꞉ne ohontsá꞉ke aontonsénhne wahontkathóhseron onkweʼtakwé꞉kon;

¹⁴ tánon tsi nontenestánion né꞉tho kwáh Níio wahorí꞉hon ne ahateriwathéntiate ne raorihwà꞉ke ne thotierénton katsinoniowá꞉ne, washakonikonrataniónhase ne ienakeréhnion tsi ionwenhtsá꞉te, sakororánions nahonwatsiá꞉tonhniserónhnien ne katsinoniowá꞉nen né꞉ne rókʼkarehwathákwen nasarehkó꞉wa tánon kíʼ shrón꞉nhe;

¹⁵ tánon Ní꞉io wahorí꞉hon nahatónhnhete ne ronwahiatonhniseronhniénhni ne katsinoniowá꞉nen ne káti ne katsinoniowá꞉nen nahakwé꞉ni ahatá꞉ti tánon ne akarihón꞉ni tsi niiá꞉kon ne iáh thahonwasénhnaien ne kahiatónhni tsi enhionthatenonwarhià꞉khon.

¹⁶ Kwáh ó꞉ni ne iakokaronhniátha onkweʼtakwé꞉kon, tetsá꞉ron kenknaiesénhnaske ók kheks aiesenhnowanénhake, tetsá꞉ron aiakokwatseháke kheks aiakotentónhake, tetsá꞉ron aiontatewenhní꞉ioke khéks ienáskwah akénhake, ne theniakokiátonke ne tieweientetá꞉kwen nahekenkwará꞉ti,

¹⁷ ne káti ne iáh ónka tahón꞉ton ne thé꞉nen aiení꞉non kheks naiontenhní꞉non tsi niká꞉ien ne iáh tatehiakók꞉iaton, né꞉ne, raosénhna ne katsinonió꞉wanen kheks noiatónhkwah ne raosénhna.

¹⁸ Ne kíʼ iewathí꞉hentʼtos nathokhá꞉tshera: ánion nón꞉ka ne ronikonraién꞉taskon thásek ne raoiatónhkwa ne katsinoniowá꞉nen, Asè꞉ken ne nakoiatónkwa nón꞉kwe. Né꞉ne oiatónhkwa iáh-iak tewenhniáwe iá꞉iak niwáhsen iá꞉iak (666).