Revelation 11 - Ohiatonhseratokénti

Ne Teniiá꞉se Waniriwaní꞉rate

¹ Ethò꞉ne taiónkon iontenientenstáhkwa kwáh né꞉ne aténhnits, tánon waontró꞉ri, “Káts tánon sateʼnién꞉ten ne raononsatokentikó꞉wa ne Ní꞉io ó꞉ni ne ietsienharáhkwa tánon tsi niiá꞉kon né꞉tho nón꞉we niiaʼkoterén꞉naien,

² ók tó꞉sa sateʼnién꞉ten naotenhenrá꞉kon nononsatokentikó꞉wa; thóh ne niiotónhak, asè꞉ken né꞉ne ronwaná꞉wi ne ronhnonhontsakeró꞉nons, tánon kwáh enhatirathatsésons nhonatatokénti né꞉ne kaié꞉ri niwáhsen tékeni niwenhnì꞉take nikarí꞉wes.

³ Tánon enkhé꞉ion ne teniiá꞉se ne ionkeriwanirá꞉tis kakweʼniá꞉tshera nianirí꞉waken né꞉ne énskat tewenhniaweheʼtsheráhsen tékeni tewenhniáwe iá꞉iak niwáhsen niwenhniserá꞉ke nenkariwésonke, ne enhonatseronhniáton ká꞉iare.”

⁴ Ne kí꞉ken ne tekarón꞉takes iakeniewá꞉tha tánon ne tékeni wathaseroharákwahs ne né꞉tho kanió꞉te raohénton ne Roiá꞉ner tsi ionwenhtsá꞉te.

⁵ Tánon tó꞉ka ónhka aionteʼnién꞉ten nahonwatikaʼrehwá꞉te, ótsire entewawerónhtane tsi rathisakaʼronhte tánon eniakotsatatʼtsahate ne ronwatíswenhs ó꞉nenk tsi enhonwatinonwarià꞉khon ne kíʼthóh nenhiotónhake.

⁶ Rothikweniatsherá꞉ien nahninhó꞉ton tsi karonhiá꞉te, ne káti iáh thaiokennhó꞉reh tsi nikarí꞉wes ienhniriwakénsheke, ó꞉ni rotishatstenhserá꞉ien tsi nokwá꞉ti nonekasónhas né꞉ne anón꞉niate oʼnekwénhsha, ó꞉ni nanikarehwá꞉te tsi ionwenhtsá꞉te ne kwák tsík niatekanhrotensons, kwáh tsi niiót꞉kate tsi nenhiaská꞉neke.

⁷ É꞉thone nó꞉nenh shaʼní꞉sa tsi shiatateriwiiosténhnis, ne karhió꞉tatsen né꞉tho tharát꞉tens tsi nón꞉we ne iáh tetkanonhkwáhre ioshonwaká꞉ronhte kwáh ensakoteriioserónhnien tánon enshakosénhni ó꞉ni ensakononwarhià꞉khon,

⁸ tánon ne iawenhé꞉ion raotiierón꞉tas kwáh thóh enkaién꞉take tsi iohatátse ne kanaʼtakwení꞉ioke ne kanatowanénhke ne né꞉tho iekariwáken konwanaʼtónhkwa Sodom tánon Egypt, thóh nón꞉we ne Sakoiá꞉ner natehonwaientenhnárenh.

⁹ Asè꞉ken áhsen nenhwenhtá꞉ke tsiatesewasénhnonh ne ratiiá꞉tarons nonkwehó꞉kons ó꞉ni ne roohtitióhkwas ó꞉ni ne raonharonkhátsheras ó꞉ni ne ronhnonhontsakeró꞉nons kwáh tsatenhotikarotáon ne iawenhé꞉ion raotiierón꞉tas tánon iáh thaontónhtate nahonwatirí꞉hon nahonwatiiatá꞉tha;

¹⁰ tánon ne ratiná꞉kere ne tsi ionwenhtsá꞉te kwáh enhonerientí꞉io tánon enhontenhnikonhró꞉ri tánon tenhonthatáwion, tiorì꞉wa kí꞉ken teniiáse rotitokenséhakwe tsi nisakotironhiakéntakwe ne ienákere tsi ionwenhtsá꞉te.

¹¹ Nok nenhwatóhtste ne áhsen tsiatesewasénhnon niwenhniserákekwe, nahonhní꞉sera natónhnhets tsi nitewé꞉tha ne Ní꞉ione entsakotaweiáten, tánon thensní꞉tane, tánon tsi niiá꞉kon nenhonwaʼtí꞉ken tsi nenhiakotéronhne.

¹² Eʼthò꞉ne wahiwenhná꞉ronhke karonhiá꞉ke nontá꞉we iakohró꞉ris, “Kén꞉en tasheniratʼten!” Tánon thóh otsikerakéhson nionsahiatʼtaráthate karonhiá꞉ke é꞉thó nénhne ne ronwatí꞉sons ronwanateró꞉ron.

¹³ É꞉tho nikaʼhá꞉wi teiotenonhianì꞉ton tsi watsaontsí꞉shonhkwe, tánon noierí꞉haton niekanónshote ne kaʼná꞉takon wakanonshiénnenhne; tsá꞉ta natehonhnenhniawehetsheráhsen niiá꞉kon wahakononwarhià꞉khon tsi wahatsaontsíshonkwe, tánon ne ronátiaʼkes tsi nahotiʼterónhne tánon taʼhón꞉ion ne kaiatanerakwáhtshera ne Raní꞉io ne karonhiá꞉ke.

¹⁴ Ne tekení꞉haton kariwaieshá꞉tshera ontóhetste. Nasénhaton kariwaieshátshera tá꞉we kwáh iostó꞉re.

Ne Tsá꞉taʼkhaton Iehonrawátsta

¹⁵ Eʼthó꞉ne ne tsá꞉takhaton rarón꞉hiakeronon wahá꞉tatiste ne raowenk iehonrawatsta, tánon tsi nontontsaró꞉ko ne karonhiá꞉ke, rontón꞉nions, “Naonhnontiió꞉tshera ne tsi ionwenhtsá꞉te ne iahón꞉ton rahonhnontiiótshera ne Sonkwahiá꞉ner tánon ne Roiatarákwen, tánon raónha enthaniarotároke tsi nén꞉we ó꞉ni tsi niénhwe enkénhake.”

¹⁶ Ethò꞉ne ne tewáhsen nihá꞉ti ne thotí꞉ions né꞉tho raonanitskwaráhne ratitskó꞉tons raohén꞉ton ne Ní꞉io wahatiiatsenénhne tsiahatikonsó꞉tane tánon waonwashén꞉naien Ní꞉io,

¹⁷ teotirihwákwen, “Tekwanonwerá꞉tons, Saiá꞉ner Ní꞉io Shatstenhserowá꞉nen, í꞉se ne sonhnheón꞉we tánon tokonhónwe són꞉nhekwe, Asè꞉ken í꞉se washé꞉neste ne shatstenhserowanenhkó꞉wa tánon tashá꞉tasawen nasát꞉koraste.

¹⁸ Ne ronhnonhontsakeró꞉nons waonatenakwahwenhrát꞉tse, ók saterhiatitkhóntsera ón꞉we, tánon iaʼká꞉hewe ne tasheiató꞉rehte ne ronenhé꞉ion, Asè꞉ken ne nasekariatseniónhase ne sanhatseraó꞉kons, ne ne rotitokénhse ó꞉ni ne rotiiatatokéntis tánon ratikwé꞉kon ne ratikweniénstha sasénhna, tetsá꞉ron né꞉ne kenk naiesenhnáske ó꞉ni naiesenhnowanénhake, tánon ne naseiatón꞉te tsi niiá꞉kon ne iakohetkénton tsi ionwenhtsá꞉te.”

¹⁹ Ethò꞉ne ne Ní꞉io raononsatokentikó꞉wa ne karonhiá꞉ke ontehnhotónhko, tánon ne raoneró꞉kwa nateriwaseronhniá꞉tshera wahontkáto thóh káien kanónskon nononsatokentikó꞉wane; tánon tsi natewaninekarakwáhnion, iowé꞉ren, tentsawénhstsi enkawé꞉re, teniahontsí꞉sonkwe, tánon wé꞉so tsi enhiowisónti.