Psalms 88 - Ohiatonhseratokénti

Né Naterénhnaien Nahiontatsénawaʼse Tsi Waʼhonnikonró꞉ten

Né꞉ne Korahites raotirénhnas. Ne Raterenhnathentsátha: tsi niorihwanonwéhon né Mahalath Leannoth. Né꞉ne Ezraró꞉non Heman raorénhna (Maskil).

¹ Ó Saiá꞉ner, í꞉se Sewenní꞉io natiatakená꞉tsera, Nó꞉nen, ienhiókaraʼwe, Iathenkaséntʼtho shonháke,

² Seríhon nakaterénhnaient, iahónwe ne sahénton; satahónsatat tsi naʼtekaséntʼthos.

³ Tsi niwé꞉so ne kanikonraronhiakénsera wakráhon, tánon ákta í꞉kes nakí꞉heie.

⁴ Nónkwe thóh ní꞉ioht tsi ionkanontón꞉nionse tsi ní꞉ioht ne rawenhé꞉ion; thóh nitiató꞉ten tsi ní꞉ioht nónkak iáh tetsakoʼshaststenhseráien,

⁵ kwáh ionkatewenhthéton ne nakí꞉heie, thóh ní꞉ioht tsi katʼtókas tsi ní꞉ioht ne ronhterí꞉ios ronwaʼnawéntʼthonh tánon ratikwékon sewatʼtsatónkwat tsi ronwatiʼiatháten. Tsi ní꞉ioht ní꞉se kwáh ó꞉nenh iáh ónka tesehshé꞉hiare, iáh ó꞉nen thènen tesehʼsheʼiéhnawaʼse.

⁶ Thóh iestsiatón꞉tion tsi teweheiontakéron ne ronenhéion, tsi nón꞉we ne kwáh tetsiókaras tánon tsioshón꞉wes.

⁷ Né sanhakwáhtshera tsi nihióks꞉te tsi ní꞉ioht tsi wakráʼhon, tsi niskenákwahse thóh ní꞉ioht tsi shí꞉ken ní꞉ioht ne kaniatarakhekówa ionnontakwaronhtáties ne tewakniotákwas. Selah

⁸ Í꞉se waʼsehrihónhni nakatorosehrashón꞉has nahionkatewénhtheʼte; né waskónhniaʼte nakheʼhionhnák꞉sate. Hionkenóton né꞉ne tó꞉sa akʼkwéni nahonsaʼkeniákenhne;

⁹ waʼkatʼkarónhnion tsi niwaʼkenikonrák꞉sens. Kwáh niatewenhniseráke tsi iekonhnáton, Ó Saiá꞉ner; iewaʼkanentʼtiakétskwen shonháke.

¹⁰ Iáh othènen tesehionhniénhnis ne iorihwanerakwahténions niakawehé꞉ion, tánon iáh thatetontkétskwas ne taiesanonweráton. Selah

¹¹ Ne iorihwaʼtóken sanoronhkwátshera iáh nonwénhton tekathará꞉kwen notsathonkwákon, tánon iáh ónka teiehtharákwa ne sarihwaʼtokentíʼtsheras tsi nón꞉we nikáien ne karihwaʼiesátshera.

¹² Iáh ónka tehiontká꞉thos ne sáwenk iorihwaʼnerakwahthénions tsi nón꞉we ne tetiókaras, khés nasehiénawaʼse ne tsi tionhontsáien ne kanikonhrénhen.

¹³ Ók ní꞉i, Ó Saiá꞉ner, shonháke iatekasénhtos; noronhkenéha nakaterénhnaien sahénton niewé꞉tha.

¹⁴ Ó Saiá꞉ner nontsérenh tsi tatʼkenrónh꞉ni? Nontiéren tsi takatkonsahsethénhni?

¹⁵ Waʼkithentʼkó꞉wa tánon ákta iatkwáhto nakí꞉heie né꞉ne kwáh shiʼtewaʼtiónha thóh shí꞉hiot, waʼkatakatstháton ne tehiotenonhianítons tsi nistiéraʼse; iáh ó꞉nenh takʼkwéhni nahonsakatakáts꞉taʼte.

¹⁶ Ne sanhakwáhtshera tewaʼtiatoráhrats; tsi natehiotenonniaʼníton teskatsiatón꞉tses tewaʼtiataríhtha.

¹⁷ Tewaʼkatiatháton kwáh thóh ní꞉ioht tsi ní꞉ioht ne iawenó꞉ton tsi niwenhnísehres; kwáh tsík nitsiotseratánion tsi tiaták꞉ta iawetonhátie.

¹⁸ Í꞉se waʼserihónhni ne kwáh ákta onhkwahthénros nahionkatewénhtete; kwáh tsi nienkatiérate tsi tetsiókaras í꞉ken.