Psalms 85 - Ohiatonhseratokénti

Né Naterénhnaient Naonsakakwahtakwénhke ne Rawenni꞉io Rahiataterítshera

Ne Raterenhnathentsátha. Né꞉ne Korahites raotirénhnas.

¹ Saiá꞉nehr, kwáh í꞉ken tsi tisáwehron ne kaiataterítsera ne shonhonhtsáke; sahʼsónhnien ne Israel nahonsahiokwáhtshene shé꞉kon.

² Sehsenikónhrenhse ne shonkwetaʼshónhas raotirihwanerahák꞉tseras; saró꞉ron akwékon ne raotiriwanerahák꞉tshera. Selah

³ Tethisatihéntʼton akwékon ne sanakwáhtshera; tánon watéstaste tsi nisanakwénhenhne.

⁴ Shé꞉kon saskwariwaʼkwatákwas, Ó Sewenní꞉io í꞉se nonkwaiatakenátsera í꞉ken, tánon éhʼren sá꞉wit tsi nahó꞉ten ne iáh teserientí꞉ios nontionháke.

⁵ Kwáh ken tsi nénhwe askwahnákwaseʼke? Kwáh ken tsi nénhwe ensenákwahseʼke ne tahatinekwenhsatátse?

⁶ Shé꞉kon saskwasasténhseron, né ká꞉ti nahónton ne shonkwetaʼshónhas nahoʼnatonnárake shonháke?

⁷ Takwanatón꞉has ne iorihwaʼtó꞉ken sanoronhkwáhtshera, Ó Saiá꞉ner, tánon tátion ne sáwenk iakonónstats kahienawaʼséhtshera.

⁸ Waʼkatahónsate tsi nahoténhsons ne Roiá꞉ner ratón꞉nions, asèken né enshakotaʼtsiáten ne skénnon ne rahonkwetaʼshón꞉ha, tsi nihiákon ne iakorihwaʼtó꞉ken, ók tó꞉sa kíʼ thonisatí꞉ier tsi nithatiʼweienhnák꞉senhne.

⁹ Oriwiʼiohónwe tsi rotateweienhnenhtáhon nasakonónsthaʼte tsi nihiákon ne ronhwakwenhnaráhkwa, kwáh enhataténesʼte nontionháke tánon enshonkwaiatanónsthaʼte Nisraeronónke nón꞉we.

¹⁰ Né iorihwaʼtó꞉ken kanoronkwáhtshera tánon ne orihwiʼiohónwe skát꞉ne ienhtsáton; né karihwaʼkwahrihshón꞉tshera tánon ne skénnon kwáh kíʼ thentsatatséna.

¹¹ Né rón꞉kwe raoriwaʼtokentítshera ohontsáke nón꞉we nenhwatʼtharátate, tánon ne Rawenni꞉io raorihwaʼkwarihshón꞉tshera kwáh karón꞉hiake nón꞉we tetkaká꞉nere.

¹² Né Roiá꞉ner kwáh nenhné꞉e ne entʼtháhawe nahó꞉ten ne kaiatateríhtshera í꞉ken, tánon nontsionhóntsa kwáh nenhné꞉e enhiokwáts꞉thonke tsi enkaientʼwákwen.

¹³ Né karihwaʼkwarihshón꞉tshera kwáh raohénton nienhénwe, tánon enhohahónhnien tsi nienhén꞉reh.