Psalms 8 - Ohiatonhseratokénti

Rawenni꞉io Raorashetsera tanon Nonkwe Tiakotsenhnate

Ne Raterenhnathentsatha: tsi niʼiotkwáton né Gittith. Né꞉ne Táwit raorénhna.

¹ Ó Saiá꞉ner, onhkwaiá꞉ner, tsi nihiosenhnanerákwat ne sahsénhna nonhontsakwékon í꞉ken! Thóh nón꞉we nisharó꞉ronh ne sahiatanerahkwáhtsera tsi karonhiáte.

² Thóh tsi ratisakáronte ne ratiksaokónha tánon né ronwatistarónhtha ní꞉se sarihwaniráton kashaststénhsera né rotirihonhníhon ne iesáhshons, né nashehiákse né iesanenhrótani.

³ Nó꞉nen ienkatkátho ne tsi sateronhiáte, nahohioténhsera ne sesnonsákes, nasontʼthennéhkha karáhkwah tánon ne tsi iotsistokwahrónhnions í꞉se sakwahthakwenháton;

⁴ Nahóten ne nonkwesónha, O Ní꞉io, né꞉ne ashehianonthónnionwe; kwáh nék khók tsi ónkwe íken, nontseren níse ahshehiatennikonráren?

⁵ Ehʼthóhʼsáne tsi sehiatíshon ostón꞉ha entháke í꞉ken tsi nithonátʼthe ne ratironhiakeró꞉nons tánon ne waʼsehianonhwaróhroke ne kahiatanerahkwáhtsera tánon ne tekarénhsaron.

⁶ Wasehiatakweʼní꞉ioste nahotkróraste tsi nihioiothénhen ne sahtsanákes; raotishaststenhserákon orihwakwékon waskéron,

⁷ thóh kontiʼiátare ne teiotinakaronhtónha tánon ne tehotinákares tionhnónskwahron, tánon ne konhtírios ne kahentáke,

⁸ notsitenhokónhas tsi kontítses né tsi karonhiáte, tánon ne kentionsónhas ne kaniatarahkhekowáne, tsi nikónhti ne tehionatawerienhátie ne kaniatarahkhekowáne.

⁹ Ó Saiá꞉ner, onhkwaiá꞉ner, tsi nihiosenhnahneráhkwat ne sasénhna nonhontsakwékon í꞉ken!