Psalms 78 - Ohiatonhseratokénti

Rawenní꞉io tsi nioiánere tánon Nisrael iáh Teiawenrentí꞉ios

Né꞉ne Asaph raorénhna (Maskil).

¹ Sewaʼtahonsí꞉iosts, Ó akonkwetaʼshón꞉has, naʼkerihonnienhnítseras; sewaʼtahónsatat nowenhnashón꞉has ne tsitsakáronhte entkaiákenhne.

² Tenkastskwéksi nók tenkeriwakéntonkwe; enkerihotasiónko né꞉ne sontontonwentsiónni siʼioteriwaséton.

³ Tsi nahoténsons ne ionkwathontéhon tánon ionkwahterientaráhkwe, né꞉ne tsi nahorihoténhsons ne iethiʼsotʼthonkonhkénhen ionkhiʼróhri.

⁴ Enhiatkhiró꞉ri ne iakhiʼienʼokónha; kwáh enhiatkhiró꞉ri nó꞉ia aterénhseras tsi nòkwah ne Roiá꞉ner raoʼsashaststénhsera tánon ne iorihowánens raohioténhseras tánon ne iorihwanerakwahthénions tsi nihotieránion.

⁵ Tasahkáwen ne kaianerénhseras nonkweshón꞉ha Nisraeronónke tánon natiawenhrátseras tsi wahawatsiratátse ne Jacob, wasakó꞉nhane ne ietisotʼthonhkonkénʼen nahonwatirihónhnien ne sakotiʼiohokónha ne raoʼianerénhseras.

⁶ Né ká꞉ti nahónton nó꞉ia aterénhseras nahonateriénhtaraʼne, né꞉ne ratiksaʼokónhas ne arèko teonahnakeráton, ne ahonterihwathéntsate asakotiʼró꞉ri ne sakotiʼiohokónhas.

⁷ Thóh ká꞉ti kí kén ní꞉ioht ne ronónha tsi entonwéthakwe ne Rawenni꞉io, tánon iáh tahotiʼnikónhren tsi nahó꞉ten rohiothénhen, ók enhontiénawasthe ne raorihwatátsheras;

⁸ tánon iáh tehiówenk ne thóh nahatihiathoténhake tsi ní꞉ioht ne sakotisotʼthonhkonkénʼen, rotiʼnontsistaníron tánon ratirihwaʼnónhwe ronhnónkwe, né꞉ne ónhkwe nakaweriáne iáh tehiorihwatóken, tsi thonwetákwen ne Rawenni꞉io iáh tehiorihwatóken.

⁹ Né Ephraimró꞉nons ahén꞉a tánon kaiénkwires ratihawánion, waʼhontèko ne siakáhewe ne wenhniserátekwe nahonterí꞉io.

¹⁰ Iáh tehonatsenawáston ne Rawenni꞉io raoterihwasehronniátsera, iáh tehonatʼtonhtháton nahontewénnaraʼkwe ne raoianerénhsera.

¹¹ Rotinikonhrénhen tsi nahoténsons roioténhen, tánon ne iorihwanerakwahténions sakonatón꞉ni.

¹² Rahotihéntons ne sakotisotʼthonhkonkénʼen rohioténhen ne iorihwanerákwat thóh tsi ionhontsáien ne Egypt, thóh kahentáke ne Zoan.

¹³ Waʼtatʼkháshion ne kaniatarakhekówa tánon waʼsakoríhon thóh nón꞉we nahontóhetste, tánon né waʼrónhniate nonèkanos tsi ní꞉ioht ne tewasónhtote.

¹⁴ Rawenni꞉io otsáta raotihénton tahaténiete ne tsi niwenhníseres ne ká꞉ti nahonateriénhtarake kaʼnónhwe niaʼhonenonhátse. Tánon ne tsi niwasónhtes né꞉ne watsiakoswát꞉thete ne ótsire aioswatʼthetétsera.

¹⁵ Waʼthasthenʼróren tsi onhtenotónhko thóh nón꞉we ne iahonwenhtsiatkénhake, tánon tsi nontaʼkanekóten ne waʼsakonekánonhte ne rahonkwetaʼshónhas ne nàkon ne tsi ionwenhtsáte nontontʼnekéni.

¹⁶ Waʼkahionhatatiéson tsi nʼi꞉ioht tsi tahanekínekenhwe nostenhráke, tánon ontnékenhte tsi ní꞉ioht ne kaniataratátse.

¹⁷ Nek kík sáka iehotikonhtákwen rotirihwáneren tsi nòkwah ne rahónha, iáh tehonwaʼwenhnarákwah ne Kwáh Éhʼneken Tótʼte thóh nón꞉we ne iahonwenhtsiatʼthénhake.

¹⁸ Kwáh thahónhnere tsi waʼhonwateniénten ne Rawenni꞉io tsi wahatirihwanónton ne kák꞉khwa tsi nihatiʼtkhwanónwatskwe.

¹⁹ Waʼhonwanikonrák꞉sate ne Rawenni꞉io, rontón꞉nions, “Ahakwéni onhtèken ne Rawenni꞉io nahontahát꞉kawe ne kák꞉khwa ne iahonwenhtsiatʼténhake nón꞉we?

²⁰ Iahwerohátien tsi tehotstenhró꞉ren ne nahontaʼkanekóten tánon takanahóten, ahakwéni kén nón꞉neʼe ne kanátaro ahontahát꞉kaʼwe, khés nasakowaranón꞉te ne rahonkwetaʼshón꞉ha?”

²¹ Ne ká꞉ti aoríhwa, nó꞉nen ne Roiá꞉ner sahothónhtene, waʼhotenakwawenhrát꞉tse; iasakotsatón꞉ti ne rahonkwetaʼshón꞉has ótsire wáratsʼte, tánon ne raonakwáhtshera tsi nòkwah ne ronón꞉ha onhtehiáron,

²² tsioríhwa tsi iáh tethonetákwewn rahonháke ne Rawenni꞉io, tánon iáh tethonetákwen tsi ensakononstáteʼse.

²³ Ók kíʼ shé꞉kon sahathénhnaʼne ne éʼneken tsi karonhiáte, tánon tewaʼtenonhónti ne karonhiáke;

²⁴ káhkhwa waʼsakokenhnó꞉reste né꞉ne tahonskáhon, tánon né waʼsakonatsánonte ne karonhiakéka.

²⁵ Né thiʼkánionk ónhkwe kwáh ne sahatít꞉kwah tèken tsi tehonskáhons tsi ní꞉ioht ne ratironhiakeró꞉nons; iawetatʼtsáni tasakoteniéten ne káhkhwa.

²⁶ Tsi karonhiáte Wataweratásehthe ne nàkon nitʼkawerénhas, tánon né꞉ne raoʼshaststénhsera wáʼraste tsi waʼthaweratásete ne éntie nitkawerénhas;

²⁷ tánon tsi nòkwah ne rahonkwetaʼshón꞉has ohʼkwesenhtaríwaʼse tasakoteniéten, thóh nihonatsiókwa tsi ní꞉ioht tsi tekatsinetaró꞉taroh nonesarónhkwah natsatʼtónhtse;

²⁸ thóh nón꞉we natonhtásenhte nokwesenhtaríhwaʼse kwáh asénhnon tsi nón꞉we nihonanátaien, kwáh akwékon waʼthatiwáʼnake tsi niwaʼtohsehrótons.

²⁹ Tánon ká꞉ti nonkweshón꞉ha waʼhatiwáʼrake tánon kwáh kíʼ wahonáthane, asèken ne Rawenni꞉io tasaká꞉wen tsi nahóten ratinón꞉watsʼkwe.

³⁰ Ók shé꞉kon kíʼ ratiwaʼraniónwatskwe; tánon shé꞉kon satehonatskáhonkwe,

³¹ Káhre ó꞉nen ne Rawenni꞉io waʼhoterihonkó꞉then waʼtewateránekare ne raonhakwáhtshera tánon waʼsakononwariakónhnion ne kwáh tatishástes raononkwetaʼshón꞉has, ne kwáh tionkwetí꞉iosʼkwe ne ken nithotiʼhiónsas ne Israeronónke.

³² Iáh kí꞉ken thènen tehiorihontákwen shé꞉kon kíʼ nihotirihwanerakonháties; iáh thethonetákwen kíʼ ken iorihwanerakwahténions tsi Rawenni꞉io éhʼthoh naháiere.

³³ Thóh ní꞉ioht tsi waʼhátonte ne tsi ronatenhniseraténion tsi ní꞉ioht nahonhʼtónniseráton. Tánon ne tsi ronhnónhnhe thontaiawénhstsi watonatserónhnionhse.

³⁴ Né nó꞉nen nón꞉kak tsi niháti ensakononwariákon, ne ronátiakes rahonháke iénhsonhne; enshontatʼréwate tánon ronaterénhnaien thotinikonhrakonthákwen rahonháke.

³⁵ Sahonhnehiáraʼne nètho Rawenni꞉io tsi rahónha séh tesakónes, nètho Roshaststenhserowánen Rawenni꞉io thawénon nahonsakohiatáko.

³⁶ Ók iáh kíʼ tehotirihwatókenʼne; tsi nahó꞉ten enhonhníron iáh kíʼ oriwí꞉io tèken.

³⁷ Né rahonerhiáne iáh kíʼ tehiorihwató꞉kenʼne tsi nòkwah ne rahónha; iáh tehotirihwató꞉kenʼne tsi nòkwah naterihwasehronniátshera ne rónhtison skát꞉ne ne Rawenni꞉io.

³⁸ Ók kíʼ shé꞉kon ne rahónha, tsi rotanitenhrátskon, sasakonikónhrenhse ne raotirihwanerahát꞉tshera, tánon iáh kíʼ tesakotón꞉ton; iotkáthatse tenshá꞉taste ne raonakwáhtshera, tánon iáh tsehotkáwen ne raonakwáhtshera.

³⁹ Tsioríhwa tsi sarehiáraʼne tsi ónkwe khók nahatihiató꞉ten, ne tsi ioweráhre waʼtohétsta tánon iáh kíʼ tatethewák꞉tons.

⁴⁰ Tonihiorihwáʼke waʼhonwaterhiasaníratʼtse ne iahonwenhtsatʼénhake nón꞉we tánon toniʼiorihwáke ronwaʼnikonrakʼsáton!

⁴¹ Waʼhonwateniénten ne Rawenni꞉io thon tahontashaʼwénhʼses, tánon ronhwanakwí꞉son ne rotokénti í꞉ken Israeronónke.

⁴² Rotinikonhrénhen ne raoshaststenhserowanátshera, khés ne tewenniserátekwe nó꞉nen shonsahsakohiatáko tsi nòkwah ne tehontátsionsʼ

⁴³ tánon tsi nahaieránion ne tehiotenonhianítons raohioténhseras tánon ne iorihwanerakwahténions né tsi iohentakwénhrare ne Zoan nón꞉we.

⁴⁴ Ne waʼrónhniaʼte ne raotiniatarashónhas nonekwénhsa ahónton, ne ká꞉ti ne tó꞉sa ahónton nahonsahatinekíra ne tsi kaniatarathátse.

⁴⁵ Ronhtihonwaʼrowáʼnen otsíks iasakoteniétase ne Egyptró꞉nons, ne waʼhonwatiʼhiatakárih, tánon oskwáhre, né꞉ne akwékon waʼhatirihwentʼthó꞉seron.

⁴⁶ Tánon ne rotiʼientʼthó꞉serons ofarare nenhné꞉e tasakáwen, tánon akwékon tsi nahoténsons ne Egyptró꞉nons rotiʼienthó꞉serons ne rahotihentakes tsistárare né wakontetʼkwísa.

⁴⁷ Waʼhowisónhti tsi waʼharihwentʼthó꞉seron tsi rotinenharaientʼthó꞉seron, tánon waʼhosakensehráien ne raotironhtasónhas ne tionionwarontakówa.

⁴⁸ Waʼhonatewisónhti ne raotitsenenhókons tionhnónskwahrons, tánon ne teiotinakaronhtónhas waʼhonatesehrón꞉ti nenhné꞉e.

⁴⁹ Watesakoreniáten ne raotheriaʼtitkónhtshera, kanhakwáhtshera, ateriatitʼkhóntshera, tánon kanikonhraronhiakénhsera, shotitsiókwa ne sakonatón꞉tha ratiʼronhiakerónons.

⁵⁰ Waʼhahahónhnien ne raonhakwáhtshera; iáh tesakonónsthaton tsi nòkwah ne kenhé꞉hion, ók kanratarihtsherákon nòkwah niaʼsakohiasténhaʼwe.

⁵¹ Ratikwékon waʼsakononhwarhiakónhnion ne tonatserénhton ronanakeráton ne rotiskenrákete ne tsi ratiwaʼtsiráiens ne Egypt nón꞉we, tánon tsi niehotwatsiríhnon ne Ham.

⁵² Eʼthóhʼne ó꞉nen sahsakohéntense ne rahonkwetaʼshónhas tsi ní꞉ioht ne teiotinakaronhtónha sakónonʼne, tánon waʼsakonatón꞉hase tsi nieʼiawénon ne iahonwentsiatʼténhake.

⁵³ Kwáh skennenkówat tíken tsi waʼsakohéntenhse, ne ká꞉ti ne tó꞉sa ahotíteronhne; ók kaniatarakhekówa né꞉e thontahiakoróhroʼke ne ronwaʼtíshons.

⁵⁴ Tánon thóh nón꞉we niasakohiaténhawe ne raonontatokentíke, né꞉ne tsi ionón꞉te ne kwáh rahónha rotkwénhnion.

⁵⁵ Waʼsakohiatínekenhwe nonkweshónha né nón꞉we nihatiterónhtaʼkwe nó꞉hen thóh shahónhne; waʼtesakohiakónhase nonhóntsa nahontsénawasʼte tánon thóh nón꞉we nasakóteron Israerʼró꞉nons ne tsi rotinonshó꞉tonkwe ne nón꞉we nihatiʼterónhtaʼkwe.

⁵⁶ Nek kík sáka waʼhonwateniénhten ne Kwáh Éhʼneken Tótʼte Rawenni꞉io, tánon waʼhonwateriasaníratʼtse. Iáh tehonatʼthontáton nahotísehron ne raoianerénhseras,

⁵⁷ ók tonsahontkaraténi tánon iáh othenènon tethonethákwen kwáh kíʼ tsi ní꞉ioht ne sakotisotʼthonhkonkénʼen; thóh nió꞉re tsi iáh othènen tehathirihwástha kwáh né꞉nen tehiotʼwatáse kaiénhkwire.

⁵⁸ Waʼsakoʼnhákwahse ne Rawenni꞉io ne tsi waʼhonnonniánion ne ietsienharákwas ne thikaniʼiosehrátes áhontste; waʼsakotekhétfase né꞉ne raotiʼhiatonhnisónhas waʼkonhtirihónhni.

⁵⁹ Ne Rawenni꞉io kwáh waʼhoteʼnhakwawenhrát꞉tse nó꞉nen sahatkátho, kwáh kíʼ tóh kénʼen tsi waʼsakokénhron ne Israerʼró꞉nons.

⁶⁰ Kwáh kíʼ waʼhatewénhthete tsi nón꞉we nihenterónhtakwe ne Shiloh nón꞉we, né꞉ne tsi rononshó꞉te tsi nón꞉we sát꞉ne nitewanákerekwe,

⁶¹ Waʼsakoríhon ne ionkhíshons nahatiʼiéna Naterihwaseronniátshera Oneróhkwa, né waʼtenientensthakwen ne raoshaststenhsera tánon ne raoiatanerá꞉kwahtshera.

⁶² Sakonákwahse ne rahonkwetaʼshón꞉has, tánon waʼsakoríhon ne ronhwaʼtíshons nahonwatinonwarhiá꞉kon.

⁶³ Né kenhnitiʼtihiónsas tsi waterí꞉io nón꞉we nahonwatinonhwarhiá꞉kon; tánon ne kén nitiotihiónsas iáh ónhka tahiotetʼtiénhri ne rónhkwe nahotíniake.

⁶⁴ Né rothikháres waʼhonwatinonwarhiakhónnion, tánon ne waʼhonateréhonske iáh tekonwatirihwáwiskwe nahiakonatʼtsiónhnionskse.

⁶⁵ Eʼthóhʼne ne Roiá꞉ner waʼthátane tsi ní꞉ioht nonhwát꞉khok saháie; tsi ní꞉ioht ne rón꞉kwe sotʼnekokewenhenhátse.

⁶⁶ Iosáts꞉te tsi ní꞉ioht tsi waʼsakóiente ne ronwaʼshón꞉s, tánon tsi naʼsakohianotási tsi nonsahontèko, tánon tsi nasakotéhate né꞉ne tsi nénhwe enkénhake.

⁶⁷ Ók waʼsakokénron nenhné꞉e tsi waʼhawatsirathátse ne Só꞉se, tánon iáh ne tesakohiatarákwen tsi ratiʼtaráien ne Ephraim;

⁶⁸ Ók ne waʼsakohiataráko tsi ratitáraien ne Judah, tánon ne tsi ionónte ne Zion, tsi nikáien ne kwáh ranorónhkwa.

⁶⁹ Thóh nón꞉we nahanonsónhni ne tiotenón꞉sate raononsatokénti, thóh nihioníron tsi ní꞉ioht ne tsi karonhiáte, tánon tsi ní꞉ioht ne tsi ionwenhtsáte, ne tsi nihokwahtákwen tsi nénhwe enkénhake.

⁷⁰ Né waʼhoiataráko ne raonhátshera Táwit, tánon thóh nón꞉we nonhtahohiaténhawe tsi konhwaʼtiteronhthákwah ne teiotinakaronhtónha,

⁷¹ tsi nón꞉we nisakonikonhrá꞉rakwe ne ionatewíraien teiotinakaronhtónhas iahó꞉nonhke né nasakonikonhraratiésehkes ne rahonkwetaʼshón꞉a Jacob, né Israerʼró꞉nons asakonikonhraratiésehke.

⁷² Né tsi rerhiasí꞉io kwáh kíʼ waʼsakotenhnikonhrá꞉ren, tánon waʼsakohéntenhse raotihénton niaháre ne nasakonatónhase onhní꞉ioht tsi ahonwáʼsehre.