Psalms 77 - Ohiatonhseratokénti

Rawenni꞉io Teiotenonhianíton tsi nihoieránion Sawehiarane.

Ne Raterenhnathentsátha: tsi niohriò꞉ten ne Jeduthun. Né꞉ne Asaph raorénhna.

¹ Waʼtewatkénhrete tsi watkaséntʼto rahonháke ne Rawenni꞉io, waʼtewatkénhrete rahonháke ne Rawenni꞉io, né nahónton nahakatʼthónhtene.

² Né nó꞉nen thènen tewaʼkanikónhrare rahonháke ne Roiá꞉ner ienkaterénhnaien; ashontakwékon waʼkanentʼtiakaratáton waʼkaterénhnaien; ók ne Rawenni꞉io iáh kíʼ tehakoriséntʼtose.

³ Riʼianontónhnions ne Rawenni꞉io, tánon wakonséhnen; waʼkanontónhnionwe, tánon waʼkanikonrók꞉ten. Selah

⁴ Ashontakwékon ratiéwaʼte; thóh nió꞉re tsi tewaʼkanikónhrare iáh tewátons nakatáti.

⁵ Iáh nék khók tèken tsi kehiáre ne tiotenhniserohesthánion, ók kwáh sakatatehiarákwen ne tiothoserohesthánion ne waʼhónhnise tkènhne.

⁶ Sakehiárane sés nó꞉nen tenkeríhwakwe nokarasnéha; Saʼkanontónhnionwe, tánon kén nahó꞉ten waʼkataterihwanónhtonhse:

⁷ “Né Roiá꞉ner enshonkwatewénhtete kén tsi nénhwe enkénhake, tánon iáh nonwénhton thatahontahorihwaiérihke?

⁸ Né iorihwaʼtó꞉ken raonoronhkwáhtshera iehiotsiákstsi ken? Tsi nihorahráts꞉ton iehiotokʼtáhon kén ne tsi nénhwe í꞉ken?

⁹ Né Rawenni꞉io ronikonhrénhen kén tsi rotaniténhron? Né raonakwáhtshera ne kén tetsonatʼthakwénhni ne raoʼtanitenráhtshera?” Selah

¹⁰ Eʼthóhʼne waʼkíron, “Tsi nahó꞉ten ne kwáh wakʼkarewátha tsi né kíʼ ken— Né kwáh tót꞉te Rawenni꞉io iáh ó꞉nen thènen tesahiéra nonkwahrihwáʼke.”

¹¹ Kwáh ienskanontón꞉nionʼwe ne iorihwanerakwahténions, nètho Roiá꞉ner tsi nihoieránion ne tsiotohesthánion.

¹² Kwáh akwékon enskanontónhnionwe tsi nihotieránion.

¹³ Ó Sewenní꞉io ne saweiénhna tsi iotokénti í꞉ken. Ónhna kaniʼioseróten thóh natahotenonhianítonke tsi ní꞉ioht ne Sonkwaʼwenhní꞉io í꞉ken?

¹⁴ Í꞉se Sewenní꞉io sahiótens ne iorihwaʼnerakwahténions; onhkwetakwékon senesténhni ne sashaststénhsera.

¹⁵ Né꞉ne sashaststénhsera sáston tsi sesehnónstaton ne shonkwetaʼshónhas, né tsi nitonatwatsiríhnon ne Jacob tánon Só꞉se. Selah

¹⁶ Kwáh tsi ní꞉ioht nónkwe nenhiontkáto, sahesáken ne tsi kaniatarénions, Ó Sewenní꞉io, ne tsi kaniatarénions waʼhotíteronhne; ne kwáh tsonó꞉tes ne kaniatarakhekó꞉wane waʼhówake tsi ní꞉ioht nón꞉kwe iakoteronhienhténhni.

¹⁷ Ne tsi iotsikerariónhnions tonhwerónhtaʼne tsi nahokénhnore; waʼkáwere ne tsi karonhiáte; tánon kwáh tsitʼnonhtaʼkaierahtánion tsi waʼtewaninerakawáʼnion.

¹⁸ Né tsi iowé꞉renh kwáh né꞉ne iokakwenhtakárere thóh tsi tehioweratáse; né sáwenk tewaʼninekaráwas ohontsakwékon tsi watʼkaswátʼtheʼte; ne tsi ionhwenhtsáte waʼhówake tánon waʼtsiowísonhkwe.

¹⁹ Tsi ionontaʼkwaronhtháties nón꞉we niaháse; waʼteshiáhiake ne kaniatarakhekó꞉wahne, ók kíʼ iáh tehiontkáthos kanón꞉we natasasitaierónhnike.

²⁰ Waʼsehénhthense ne shonkwetaʼshónhas tsi shí꞉ken ní꞉ioht ne kattsénen sakó꞉nonhne né꞉ne Mahís tánon Aaron ronaterihwatsteríston.