Psalms 7 - Ohiatonhseratokénti

Anitentetshera ne kaienawashetsera ne sakok꞉konte ne Sakoronhiakentha

Ne Naterenhnotátshera né Táwit raorénhna tsi natehorihwákwahse né Roiá꞉ner tsi nithó꞉ha né Benjaminró꞉non Cush ronhwáiatsʼkwe.

¹ Ó Saiá꞉ner akeʼNí꞉io, shonháke nón꞉we niwakateʼkwáhsen; sastiatáhko tsi nòkwah ne ratikwékon ne hiontséres, tanon tatsatanónstat,

² tó꞉ka iáh kwáh kí tsi ní꞉ioht ne kénreks kwáh enhiontiatarahtiónko; tánon iáh ónhka taiekwéni nahonsahiontiatáko.

³ Ó Saiá꞉ner akeNí꞉io, tó꞉ka kí꞉ken thóh nahonkatiérenhke; khés tó꞉ka thènenh nahiotón꞉hake ne kanatshaná꞉kes,

⁴ Tó꞉ka ne ahonsakhekhárhiakse nakateró꞉sehra ne karihwahetkénhsera khés nahonsakhehiatákwen ne tehiakwahtátʼtions ne iáh othènen tetiorihonníhon,

⁵ Ehʼthóhʼne kíʼ sehríhon ne tehiatiatátʼtions nahióntʼsehre tánon nahiontiéna, tehonskwahsehrón꞉kwat ne tsi kónnhe nonwenhtsáke, tánon thóh kaiénhtak natierónhta nokenráhke. Selah

⁶ Téstann, Ó Saiá꞉ner, thóh ne sanahkwatserákon. Tashanhákwen tsi nòkwah ne raotinahkwáhtshera ne iónkswenhs; í꞉tie, ní꞉ih akerihwáke; seríhwent ne karihwenhthátshera né sherihwisenhénhni.

⁷ Sehríhon ne tsi kanakeraseraʼkérons nahonhnitiokwahró꞉rohke né tsatátha, tánon shasástien ne sanitskwárahne éhʼneken tsi nón꞉we nihónhnes.

⁸ Ne Roiá꞉ner tesakohiatorèhtha nonkweshónha; testsiatóret, Ó Saiá꞉ner, né tiohianénhaf tsi iáh tewakeníkon tsioríhwa tsi kwáh iaothènon tewastónhton. Í꞉se né éhʼneken satohesthakʼwen.

⁹ Ó sehríhon ne raotirihwahetkénhsera ne rotirihwaʼnerenhákskon niahontókʼten, ók sahserihwaʼkwahthákwas ne iakoiánere, í꞉se ne sehiatenikonrát꞉kenhse tánon sehiaterhiakʼsátkenhse, Ó saiánere Ní꞉io.

¹⁰ Rawenni꞉io sèh rahkatrenhóstha, rahónha sakohiathákwas né iakawerhiasí꞉io.

¹¹ Rawenni꞉io sèh ne tkarihwaiéri tsi rarihwénhtha, tánon iatewenhniseráke tsi roʼnhakwénhen.

¹² Tó꞉ka né ónkwe ne iáh tahonsahiontatréwataʼne, Ne Rawenni꞉io kwáh kíʼ enhahiothí꞉ie ne raosarekówa; tehosák꞉ton ne raohénhna ne niaharónhthate;

¹³ roweienhnenhtáhon náraste ne iakoriótha ionterihiosthákwah, tsi nòkwah né iáh tetiontatrewátha,

¹⁴ Satkátho tsi ní꞉ioht tsi tehatiwíriaks ne karihwahetkénsera, tánon ne sakonatewéton ne athakonta꞉tshera íken, tánon né sakonatewétons noʼnhó꞉wen.

¹⁵ Raʼshonhiónhnis, kwáh rashonwèstha, tánon thóh iahahiáthenhne tsi rosonhiónhni.

¹⁶ Tánon né shotíras ne raothakontátshera, tánon né kakaronhniátshera nakóren sakorakwénhni ranontsíne saká꞉rane.

¹⁷ Kwáh entíhion ne Roiá꞉ner ne kanonhweratónhtsera nahontakaiérihke tsi nòkwah ne raorihwaʼkwahrishión꞉tsera, tánon tenhkeríhwakwe ne kanonweratónhtsera raosénhnakon ne Roiá꞉ner né kwáh éʼneken tót꞉te.