Psalms 69 - Ohiatonhseratokénti

Aterénnaient Naonsaiontiatotaríhsi Tsi Nokwáh Ne Iontateronhiakéntha

Ne Raterenhnathentsátha: tsi niiotkwáton ne “Otsítsas” karénhna. Né꞉ne Táwit raorénhna.

¹ Tatiatanóns꞉tat, O Sewenní꞉io, asèken nonékanos ó꞉nen tsi tewakniasóhare nió꞉re níwes.

² Onawatstókon iahontiathenhenhátie, tánon iáh tewáʼtons nahionhontsanirónhake kaʼnón꞉we iakeráhtaʼne; Thóh nón꞉we níkes tsi nón꞉we nihionó꞉tes, tánon ne ionontakwaronhtontses skanórons ahonkéskote.

³ Kwáh tewatwisenhéion tsi natekaséntʼthos; tánon watniasanónwaks. Waʼkatkaróhnion rihrá꞉re Nakení꞉io nahatiénawaʼse.

⁴ Tsi nihiákon ne iónk꞉shons sénha ne ronatsokowánen tsi níkon waʼkenonkwiseróhte ne kenontsíne né tsi nihiákon iónkʼshons né꞉ne kwáh iáh othènen tetsiorihonhníhon; né ró꞉natsiokowanen satehatinón꞉wes nahionkatonhte, né iónkshons onó꞉wenhs tsi nihionkerihwáros. Nahóten ne iáh tewaʼkenénskwen ónen né énstsien?

⁵ Ó Sewenní꞉io, sateriéntare tsi natewaʼkatenonhwaroríhtonhte; tsi natewaʼkaterienhtaweriéhon iáh kíʼ tesatherihwaʼsehténhni.

⁶ Tó꞉sa satthóntat tsi nihiákon ne í꞉seke nón꞉we nitsiakawethákwen nahionthatéhate ne í꞉ih akerihónhni, Ó Saiá꞉ner í꞉se ne Sashaststenhserowánen; tó꞉sa satthóntat nahiontatʼtsenhnátsate tsi nihiákon ne í꞉seke nón꞉we nihionterénhnaiens ní꞉i akerihónhni, O í꞉se Sehní꞉io Israeronónke.

⁷ Í꞉se sarihwáke tsi nihionkenikonhratsáton, tánon ne thitewakeró꞉ron natehénsehra.

⁸ Thóh nitsiató꞉then tsi ní꞉ioht ne kenkʼtahontonhkenónhke tsi nòkwah ne iakwahtatekenhokónhas, tsi ní꞉ioht ne thiʼwakonhontsáte akénhake tsi nòkwah ne akwáʼtsire.

⁹ Né꞉ne Sanónsa aokwéniat ontsiatakári; tsi niháti iesanikonraksátha í꞉i sewák꞉ras.

¹⁰ Eʼthàke waʼkatatónhni tsi onhkenhtón꞉tiete, tánon nonkweshón꞉has waʼhonkenikonratsathánion tsi thóh nátiereh.

¹¹ Nó꞉nen ne waʼkatakwenónhniate ne káiare, né waʼhonhkónhniate ne thahionkewenhnónhni ne ronnónha.

¹² Í꞉ih tiókonte otsahonskwáhkon iontʼtharákwen tsi nihiákon ne tsi iothenhenrakáronhte ne kanatowanénhke iétskote, tánon ne ratinekakás꞉tha né ronhterenhnonniátha ne tsi kónhnhe.

¹³ Ók né iatetsiáti, shonháke nón꞉we nikaterénhnaiens, Ó Saiá꞉ner. Né nó꞉nenh ienkáheʼwe, Ó Sewenní꞉io, né tsi nihiawetatʼtsáni ne iorihwató꞉ken sáwenk sanoronhkwáhtshera, teskerihwasehrákwas. Né꞉ne kenikwékon ne iorihwató꞉ken sahiatakenáhtsera

¹⁴ saskeniákent né꞉ne tó꞉sa akatenónhwaien tsi nihionawatstanótes; saskeniákenk tsi nonhnihónnes ne iónkshons tánon tsi nón꞉we ne kwáh tionó꞉tes.

¹⁵ Tó꞉sa seríhon ne tsi ionontakwahronhtónhtses nahontonhkeróhroʼke, khés tsi nihionó꞉tes nahonkeskó꞉te, khés ne tsi iotʼtsiónwaien ne kenhé꞉ion nón꞉we iatsiátenhne.

¹⁶ Teskerihwaʼserákwas, Ó Saiá꞉ner, asèken ne sanoronhkwáhtshera ne iorihwaʼtóken tsi nihioiánere; ne tioianénhaf tsi niʼiawetowáʼnen ne senhténhrat, takwatkátho.

¹⁷ Tó꞉sa tsiatkonhsaséhten ne sanhá꞉tshera, asèken tewaʼkanikonró꞉kwe tesasteríhen teskerihwaʼsehrákwas.

¹⁸ Ákta í꞉set tsi nón꞉we níkes, sastsiatáko, saskatatewenhniʼióseron ne ratirihón꞉ni ne iónkshons.

¹⁹ Sateriéntare tsi nió꞉re tsi ionkenikonhrakarewáʼton, tánon ionhkatéhaton ó꞉ni iontʼsenhnaksáton; ne iónkʼshons ratikwékon sehientérih.

²⁰ Tsi nihionkenikonrakarewáʼton ne iónkshons ne waʼkerhiasanonwát꞉tha, ká꞉ti iáh testiewénhtas. Karohtónhtsera kèsasks, ók iáh teketsénhries; tánon nón꞉kak ahionkenikonraniráton, iáh kíʼ nonʼné꞉e tekhehiatatʼtsénhrion.

²¹ Nónen sakatonkárhiake kanonkwatserák꞉sen waʼhonkènonhte, tánon tsi onhkeʼniatátʼthen iotsitsiát꞉ken waʼhonknékanonhte.

²² Aiáwenhs tsi nihonathénhniote ne ahontakarihónhniaʼte tsi ahonwanateristaiénhase; aiáwenhs tsi nihonatekwáhere skát꞉ne ne ronhtenhroshónhas né ahontakarihónhniaʼte tsi ahonwaʼtisénhni.

²³ Tesehrón꞉wek né꞉ne tó꞉sa ahonsahatikénhake, tánon ne ratishinakésons iahiokontakwénhake tahotisinishónkwahke.

²⁴ Tasawé꞉ron ne sanakwáhtshera ne ronónhake, ánion tsi nisanakwénhen rotinonhtérha.

²⁵ Aiáwenhs ne tsi ronathatosehrótons kariwaiesátshera iahónton; kwáh tó꞉sa ónhka sheríhon nahatiterónhtake ne raonatosehrakónshon.

²⁶ Asèken sakotinaskónhnis tsi nihiákon ne sehrewáʼton, tánon tsi nihiákon ne sehkarewathánion, sénha kíʼ ieshatiʼiéstha tsi nisehsakotikarewáʼtha.

²⁷ Iahá꞉tsest tsi nihotiníkon; tánon tó꞉sa sehríhon nahonsahontatewenhní꞉ione.

²⁸ Sehrón꞉ko ne tsi ratisénhnare ne ionnhéhonwe kahiatónhsera; tó꞉sa skát꞉ne ratisénhnarat ne thonnonhkwetaiéris.

²⁹ Ók waʼkeronhiáken tánon wákanikonroktáhon; tatsiatakará꞉tat, Ó Sewenní꞉io, tánon saskenónstat!

³⁰ Kwáh karenhnáke tsi tenkatenonweráton ne Rawenni꞉io raosénhna; kwáh enhisenhnakarátaʼte tsi tenhkatenonweráton.

³¹ Né kí꞉ken enthonikonhraiérihte ne Roiá꞉ner sénha tsi ní꞉ioht ne tionhnónskwaron teonákares khés nahiʼiateskóntʼthase ne rotehiáron tionhnónskwaron rátsinn.

³² Ánion ne ionhthateronhiakéntha iontʼkátho tánon ionhthonnáren; í꞉se ne tsi sewaʼhiatísaks ne Rawenni꞉io, sasehwaʼnikonhranírah.

³³ Asèken ne Roiá꞉ner sakokʼthón꞉te ne iakonoronsthénhnis, tánon iáh kíʼ tesakohiatanikónrens ne rahonkwetaʼshónhas ne ratinhó꞉tons.

³⁴ Ánion orihwaʼkwékon tsi nihioterihwaʼthéntion ne tsi karonhiáte ó꞉ni ne tsi ionwenhtsáte tehonwaʼnonweráton, ne kaniatarakhekowáne tánon kontikwékon nètho nón꞉we nikonhnónnhe.

³⁵ Asèken ne Rawenni꞉io enhanónsthate ne Zion tánon ensanatonhniánion ne Judah nón꞉we; tánon ne raonhatserashón꞉has kwáh kíʼ thóh nón꞉we nenhonhnónnheke tánon enhontsénawaste nonhóntsa;

³⁶ ne sakotihiohokónhas ne raonhatserashón꞉has ne enshonawenhkónhweke, tánon tsi nihiákon ne ienorón꞉kwah ne raosénhna thóh kíʼ nón꞉we nenhienákereʼke.