Psalms 65 - Ohiatonhseratokénti

Kanonwaratónhtshera Ne Ohóntsa Aohsniétshera

Ne Raterenhnathentsátha. Né꞉ne Táwit raorénhna.

¹ Ó꞉nenh iehióhe ne taiesanonweráton, Ó Sewenní꞉io í꞉ken ne Zion nón꞉we; tánon enhiakwahrihwaʼiérite tsi nihionkwahrahrátston ne shonháke,

² Ó í꞉se ne teserihwaʼserákwas naterénhnaien! Kwáh tsikʼnonwéson nénhtsien nonkweshónha shonháke nón꞉we nenhionterénhnaien.

³ Eʼthohʼsáne nonkweriaʼnéshon titkáhere ne rarihwáʼneren, Í꞉se tsiʼsahrá꞉kewe nonhkwaʼrihwanerahák꞉tsheras.

⁴ Iakotáskats tsi nihiákon ne sehiatará꞉kwen tánon tesehiaténha ákta né niahontáwehiaʼte ne sanonsatokentiʼkówaʼne ne taiesanonweráton tánon naiesahsénhnaien, ne kahiathateríhtseras nonkweshón꞉ha iehiénas ne sanonsatokentiʼkówaʼne nónwe nitewètha, né꞉ne kaiatateríhtseras teskwáwis thóh kanónskon ne Sanonsatokentiʼkówaʼne.

⁵ Í꞉se teskwaʼrihwasehrakwénhnis tsi teskwáwis natesenhniétshera, tánon ronwaʼsenhnakarátat ne Rawenni꞉io ne nonkwahiatakenátshera í꞉ken; í꞉se nonhkwahrahrát꞉tshera í꞉ken kwáh titkakwékton ne tsi iehiotonhontiotʼtaníhon nió꞉re iéken tánon ne ahinónhson nió꞉re tkaʼniataré꞉nions ne kaniatarakekowát꞉tsions.

⁶ Né꞉ne sashaststénhsera sáston tsi sahnontonhniánion; né tsatontákwen ne kashaststénhsera.

⁷ Í꞉se skénnonk thisehshónhnis tsi natekaweratáses ne kaniatarakekó꞉waʼne tsi niʼionontakwarontónties, tsi nihiakorítstare nonkweshón꞉ha.

⁸ Ohontsakwékon í꞉iete tsi nihiakonikonríhnekenʼen ne iorihowánens tsi nihsahtieránion; í꞉se sónhnis tsi niwaʼterihwathéntses noronkenéha tánon nokarasnéha tenhiakohénrete natsenhnonniátshera.

⁹ Sehnéstha tsi natesehriwásnie ne tsi iohontsáte tsi tesahteniétha nokenhnorésera, kwáh í꞉ken tsi iawetowánen tsi nishanerástha; tesehiatʼkawénhnis nonkweshónha nonátsa, asèken né꞉ne kwáh í꞉se thóh nisahkwahthákwen.

¹⁰ Í꞉se tesahteniétha ne iawetowáʼnen nokenhnorésehra tsi nón꞉we nikatarakaratʼthósehron ne kahentákes, satewatnekátate tsi natehioronhnionhniánion tsi nikentarakarát꞉thon ne kahentákes, tasahthéniete nokenhnorésehras ne nakanétskate nononhónras, í꞉se waʼshatatériste nokénra tsi waʼsón꞉ni ne kaientʼthótsera nahontakánio tánon ahontehiáron.

¹¹ Né tsi nitisarihwaʼiéri iawetowáʼnen taskwatkáwen nahiakwaientʼwá꞉ko; né sá꞉sehre wenhnísehres iatehiahosehrénhen tsi nikakakwenhtaieronnihátse tsi nihiokenranètska nék ne tsotakenhraténion ne tsi iokakwénhtonhte.

¹² Né kahentowaʼnénhke kwáh titkontíhere kontitsénenhs, ne sónhnis ne tsi ionhniarón꞉nions kwáh né꞉ne ónhkwe ahiakotonnárake,

¹³ Né kahentákes ne titkontíhere teiotinakarontónha, akwékon nahonrákwakons kwáh onátsias iotón꞉ni, orihwaʼkwékon kí꞉ken tsi nihiókwats thóh ní꞉ioht kwáh né꞉ne ónhkwe tehiakohenré꞉tha tánon tehiakorihwáʼkwen tehonwaʼnonweratónhnions Rawenni꞉io.