Psalms 64 - Ohiatonhseratokénti

Ne Naterénnaient Nahontaiontatéhne Tsi Nokwáh Ne Teiontátshons

Ne Raterenhnathentsátha. Né꞉ne Táwit raorénhna.

¹ Tewaʼkanikónhrahre, Ó Sewenní꞉io satahón꞉satat nakaterénhnaien! Khetsánis ne iónkshons senóns꞉tat tsi kónnhe.

² Táskene tsi nihontenikonrónhnis ne ronhnonkwetaʼhétkens tsi nòkwah í꞉i, tsi nòkwah ne kén tsiokwátʼsenhs ne ronhnonkwetaʼhétkens raotiʼtsiókwahs,

³ Né ronhnasáke thóh niiohiotí꞉ie tsi ní꞉ioht nasarekówa, thóh ní꞉ioht tsi thatiwenhnínekens ne kawenhnákʼsenhs tsi ní꞉ioht ne ahionrón꞉thate ne kanonkwahtsherák꞉sen iehióhare ne kaienkwirakénhiate,

⁴ tesakonarón꞉tats iáh othènen tehiakoníkon tsi nónhwe thóh nataséhton; thentsawénhstsi enhonrónhthate tánon kwáh iáh othènen tehothíterons.

⁵ Tehontatenikonhranírats tsi niwaʼhét꞉ken tsi nihontenikonhrónh꞉nis; né rothitharákwen kaʼnónhwe nenhatikéron ne ionteristaienthákwahs, tsi ronhnonthónhnions “Iáh ónhka tahonwaʼtíken.

⁶ Ónhka aiekwéni aietʼtsénhri nonkwaterihwatón꞉tshera? Ionkwanonthonhniónhon ne kwáh tkanikonhraiéri karihwák꞉sen.” Asèken nónkwe akawéri tánon nakonikónhra tsi teiotserón꞉nion í꞉ken.

⁷ Ók Rawenni꞉io iensakorónhtate ne raoiénkwires; kwáh thentsawénhstsi enhotikaré꞉wate.

⁸ Kwáh ensakó꞉thonhte ne enkarihónhni ne thóh owenhnashónhas; ratikwékon nenhonwaʼtíken kwáh enhotihiatíshonkwe tsi nenhotíteronhne.

⁹ Eʼthóhʼne kíʼ kwáh onhkwetaʼkwékon tsi enhiakó꞉teronhne; kwáh kíʼ enhontró꞉ri tsi nahó꞉ten ne Rawenni꞉io taháhawe, tánon enhotinikonhraiéntaʼne tsi nihotséren.

¹⁰ Ánion ne tionkwetaiéri iontonnáren rahonháke ne Roiá꞉ner tánon rahonháke nón꞉we nihiontáset. Áhnion ratikwékon ne iakoiánere kwáh tehonwaʼnonhweráton.