Psalms 63 - Ohiatonhseratokénti

Aiontatenikonraiewenthote ó꞉ni norihwí꞉io aionnhníhake rahohénton ne Rawenní꞉io

Né꞉ne Táwit raorénhna nó꞉nen thóh nón꞉we sheres ne Judah Iahonwentsathénke.

¹ Ó Sewenní꞉io, í꞉se nakeNí꞉io í꞉ken, konhiatísaks, nakatónnhets ioniatátʼtens í꞉se saská꞉neks; thóh nió꞉re tsi konhiaskáneks thóh ní꞉ioht tsi katʼtókas enwaʼkenikonhrá꞉ton, tsi ní꞉ioht ne iahonwenhtsatʼténhen tánon iáh othènen teskariwástha ne tsi nón꞉we iáh othènen teionekáien.

² Ká꞉ti thóh nón꞉we nakonhiatísake Nononsatokentiʼkówaʼne, nakatʼkátho ne sashaststénhsera tánon ne sahiatanerakwáhtshera.

³ Tsioríhwa ne iorihwató꞉ken sanoronkwáhtshera sénha ne kanóron í꞉ken tsi ní꞉ioht ne tsi iakónnhe, tánon ká꞉ti kwáh tenhkonhnonweráton.

⁴ Kwáh ká꞉ti tenkonhnonweratónhsehke tsi nikaríwes enkónnnheke; né nó꞉nen enkaterénhnaien enkanentʼtsakétsko.

⁵ Kwáh kíʼ enwaʼkerenhtí꞉io tsi ní꞉ioht nón꞉kak iakotekwáhrakwe ne tsi waʼthenhnió꞉te, kwáh kíʼ atʼtsenhnonhniatsherákon tsi tenkonhnonweráton.

⁶ Tsi nitsiatiónhni nakenaktháke í꞉se koniehiáre, asontakwékon í꞉se konhianontónhnions;

⁷ asèken tiotkonhón꞉we í꞉se tatienawasehátse, tánon thóh tsi iotasáhtare ne senerahontsiókon tenhkeríhwaʼkwe natsenhnonniátsera.

⁸ Kwáh akesastenhserakwékon tsi í꞉se koniatienawáston; tsi nikashásts꞉te ne sahtshanáke ne tewaʼkénes.

⁹ Ók tsi nihiákon né꞉ne iakésaks nahiontón꞉te tsi kónnhe kwáh thóh nón꞉we nienhénhien tsi tsohontsáien ne kenhéion;

¹⁰ Kwáh kíʼ tsi waʼterí꞉io nón꞉we enhonwatinonwariákon, tánon ne raotiʼierón꞉tas okwáho nenhné꞉e enhónhneke.

¹¹ Ók kíʼ ne ronhnontí꞉io rahonháke ne Rawenni꞉io nón꞉we nenhatonnáren; tsi nihiákon nenhionrahrátste raosénhnakon ne Rawenni꞉io tsi tehonwaʼnonweráton, asèken Rawenni꞉io nenhné꞉e ensakóskweke ne rotinówenhs.