Psalms 62 - Ohiatonhseratokénti

Tsiakawetákwen Tsi Rawenni꞉io Tesakónes

Ne Raterenhnathentsátha: to Jeduthun. Né꞉ne Táwit raorénhna.

¹ Kwáh sák thiwakatatón꞉ni né꞉ne Rawenni꞉io ahatiatanónsthateʼ rahonháke nón꞉we nitewètha natiatakenatiéra.

² Rahonhatsíwa thá꞉kenes tánon rakenónstats; rahónha ne tákenes, tánon iáh nonwénhton tsiahionkesénhni.

³ Thóh nakarihwéshonke ne kwáh sewaʼkwékon iatsisewaʼtsiatónhti ne rónhkwe, ne rahónha iáh sénha tehasháste tsi ní꞉ioht ne tehiotenhenraríhon?

⁴ Ne khók rontenikonhrónhnis nahontahonwaʼiáthenhte ne thosénhnate. Né ronhtenikonhrorhiátha ne onówenhs; né ronhthátis ne kahiatateríhtsheras, ók kíʼ né ronhnerhiánes ronhtewenhnatʼsatáhnions.

⁵ Asèken Rawenni꞉io khók rihniahé꞉sen; asèken nakararát꞉tseras rahonháke nón꞉we nitewé꞉tha.

⁶ Rahonhatsíwa thákenes tánon rakenónstats, rahónha ne tákenes; iáh kíʼ nonwénhton tsiahionkesénhni.

⁷ Rahonháke nón꞉we nikáien nakathatewenhniʼiótshera tánon nakatkweniensthátshera; né꞉ne rashaststekówa ne tákenes, rahonháke nón꞉we nikatasehthákwa.

⁸ Tatsisehwethakwénhak ne Rawenni꞉io tiotkonhónwe kénhak, Ó tiónkwe; iatesehwatatʼtsáhak ne rahohénton; Rawenniʼióke séh nón꞉we nitewatasehthákwah. Selah

⁹ Nón꞉kwe ne teshonhtsérens tsi ní꞉ioht ne iahiakotonhniserón꞉ti; tsi niháti ne toʼnatonhkwetatónhnions iáh othènon tehatirihwásthas; nasehkonhtseriháren; né ratikwékon iatahonwaʼtí꞉ieste sénha iáh tehotiʼhiátatste tsi ní꞉ioht ne iotewerahrátses.

¹⁰ Tó꞉sa thóh nón꞉we nontasewethakwénhak ne ratirihwaiesáhtha ne kaiáneren, tó꞉sa sehwaʼrá꞉rek nahisewaianerásthen kén naisehwaʼtsénawasthe ne thènen kanénhskwen; iekaníhare ne sehwaʼkwahséhtshera ne sénha ahontehiáron, tó꞉sa kíʼ ne sewaʼniahesénhak.

¹¹ Nó꞉nenh ne Rawenni꞉io rotatíhon; tehiorihwáke ó꞉nenh kí꞉ken waʼkatʼthonhtéhon: nètho kashaststénhsera Rawenni꞉io nenhʼné꞉e raówenk,

¹² tánon ne iorihwatóken kanoronkwáhtshera í꞉se sáhwenk, Ó Saiá꞉ner. Asèken kwáh kíʼ í꞉se ratikwékon tesehserihwaʼsehrakwénhnis né entsoianénhawe tsi nihotihiothénʼen.