Psalms 59 - Ohiatonhseratokénti

Né Naterénhnaien Ne Skenenkówak Thaʼkénhake

Ne Raterenhnathentsátha: Tsi niiotkwáton ne “Tosa Seriwatont” karénhna. Né꞉ne Táwit raorénhna (Miktam). Nó꞉nen ne Saul iasakotóri Roʼnónhwe nahonthenhnikonraren tsi tononhshote ne Táwit ne nahónton nahonwahnonhwarhià꞉kon.

¹ Sastsiatáko tsi nòkwah ne iónkshons, Ó akeNí꞉io; táskene tsi niháti ne tehotitháhon nahontahionkatsatónhti.

² Sastsatáko tsi nòkwah né꞉ne rotihiótens ne kariwahekénhsera; tsi nòkwah ne ratinekwenhsanón꞉we thatsatanónsthat.

³ Shé꞉kon nón꞉wa nikaháwi ratihiathakwénhtaron tehonanénhraien nahionkenonwarhiákon; ne ratiniakátste ronanitsiokonhnihátse nahontahionkatsatónhti. Iáh né tehiorihwáke tó꞉ka kén knahótenk karihwáneren akénhake khés ne tahonkaterenhtaweriéhon, Ó Saiá꞉ner,

⁴ asèken kwáh iáh í꞉i tewakeríhwa, hiatonhráthate nahonthateweienénhtaʼne.

⁵ Téstann, Saiá꞉ner Ní꞉io ne Sashaststenhserowánen, tánon tá꞉se nastienawáse; kwáh í꞉se satkátho, í꞉se séh Ní꞉io ne Israerʼró꞉nons. Téstann tánon sehré꞉war thí꞉ken kahiatónhni konwasénhnaiens; tó꞉sa ónhka sehnóns꞉tat tsi niháti ne iotʼteronhónwe rontenikonronniánions ne karihwahétken. Selah

⁶ Iatehiokaratseráke tethonnètha, ratiwenhnó꞉te tsi ní꞉ioht ne éʼrhar ronahninówaien tsi ronatenatí꞉thakes.

⁷ Satkátho tsatehotihenrétha, rotiwenhnotí꞉ies tsi ní꞉ioht nasarekó꞉wa asèken “Ónhka ónhte” tsi ronhnontón꞉nions “Kwáh enhionkhiʼiathónteʼne?”

⁸ Ók sesterístha, Ó Saiá꞉ner; í꞉se ratikwékon seienawákon nonkweʼshón꞉ha tsi thisehiéron.

⁹ Sashaststenserákon nón꞉we nikeniáhese, í꞉se tekonkánere ne teskénes; asèken í꞉se, Ó Ní꞉io, nakatenhenraníron í꞉ken.

¹⁰ NakeNí꞉io rakenorónkwah enthakatkenhséra; kwáh kíʼ enhakeríhon ná꞉katerohró꞉ke nó꞉nen ensakosénhni ne iónkshons.

¹¹ Tó꞉sa sehnonwarhiákon, nontsérenk nakonkweʼtashón꞉has ensohtinikónhren; tesehiaré꞉nat sashaststénhsera í꞉sats, tánon tasehiátent, Ó Saiá꞉ner, í꞉se nonkwatrohosthákwah í꞉ken.

¹² Tsi nithontátis ronhnenéstha tsi nihotirihwáneren, aiáwenhs ne aotihiathotáraste tsi nihonthatón꞉ni. Ne tsi nihontenhénhnaras tánon onó꞉wenh tehonterihwareniátha,

¹³ kwáh sehiaʼáton thóh kanakwahtsherákon; kwáh sehiátont tsi ní꞉iore kwáh iáh othènon tahonsahatiʼierónhnike. Eʼthóhʼne kwáh enwenéstonke ne tsi iehiotonhontsioktaníhon nió꞉re tsi Rawenni꞉io seh thoniarótharon ne Israeronónke. Selah

¹⁴ Iatehiokaratsheráke tethonnètha, ratiwenhnó꞉te tsi ní꞉ioht ne éʼrhar tánon ronaninó꞉waien tsi nihonatenatíʼthakes.

¹⁵ Tsi ní꞉ioht ne eʼrhár ratikwísaks, tánon ronahtatenakónhni tó꞉ka iáh tsatahotiʼiérise.

¹⁶ Ók kíʼ ne tekeríhwakwe tsi nisashaststenhserowánen; kwáh iorakaréni tsi tenhkeríhwakwe ne iorihwató꞉ken sanoronkwáhtshera niaʼtehioronhketsheráke. Asèken í꞉se nakatenhenra í꞉ken tánon í꞉seke nón꞉we nikatasehtákwah nó꞉nen thènenh tekanikónhrare.

¹⁷ Kwáh thenkeríhwakwe tánon enkíron, sesháste, Í꞉se, O Ní꞉io, ne teskénes, í꞉se ne iorihwató꞉ken tsi takenorónhkwah.