Psalms 5 - Ohiatonhseratokénti

Ronwaniahes Rahonháke ne Rawenni꞉io Nahonsahiontsiatotarisi tsi Nòkwah ne Tehiontatʼtsions

Ne Raterenhnathentsatha: ne áhonste iehiontónhries waterenhnotákwa. Né꞉ne Táwit raorénhna.

¹ Satahón꞉satat nakewenhnaókon, Saiá꞉ner; sathahonsíhiost tsi niwakerihwakathénʼen.

² Saʼtenhnikonhráren tsi ní꞉ioht tsi tekaséntʼthos ne nastsié꞉nawase, nakenontí꞉io tánon akeNí꞉io, asèken shonháke nón꞉we niwakaterénhnaien.

³ Saiá꞉ner, noronhkéne enskewénhnaronhke; tsi nonhtahiorakwinekenhenhátie enkonhianithéntase nakerihwashónhas ne shonháke, tánon enkateráhrate ne tekarihwasehrákwen.

⁴ Asèken í꞉se né Ní꞉io iáh ne teserihwanírats ne karihwahetkénhsera; ne ronhnonkwetaʼkéntkens iáh tahónton ne skát꞉ne aisewenhterónhtake.

⁵ Iáh tesherihwáwis ne ionhthatónhni ne sahénton ahonhnétake; kwáh ratikwékon séhshons ne wahétken tsi nihontsiérha.

⁶ Shehiathóntha tsi nihiákon ne iakonó꞉wenhs; ne Roiá꞉ner sakó꞉sons ne sakonaséhtha tánon ne ratinikonráhtha.

⁷ Ók Ní꞉i ne tsi nikanánon ne kwáh iorihwató꞉ken sanoronhkwáhtshera, ienkatáwehiate ne sanonshatokentikówane, kwáh tenkatiákete ohénton ne iotokénti sanonsatokentiʼkówa tsi nenkonsénhnaien ne tsi kontsánis.

⁸ Tatkéntens, Saiá꞉ner, né꞉ne sarihwakwahrihʼshiontsherákon tsioríhwa tsi niháti rontírare nahionkenenhrénten; stakwahríhsi ne tsi saháte nakerihwáke.

⁹ Asèken ne ronhnónha iáh tehontró꞉ris norihwí꞉io í꞉ken; né raoneriáne ne kanánon né atkaronhniátsera í꞉ken; ne tsi iehonʼnekwahnátha né꞉ne tehiotskaràhwen otsatónhkwahʼ ronhtenhnaʼsihióstha.

¹⁰ Shehiónhnien nahontháwa ne raotinhí꞉tshera Ó Sewení꞉io; sheríhon né꞉ne ahontahotiʼhiáthenhte tsi nihonthenikonhrónh꞉nis ne kariwahét꞉ken; sehiatèkwat tsioríhwa tsi niwéso rotí꞉ien ne karihwahetkénsera; asèken wahesaterahiatákwen.

¹¹ Ók sehríhon ratikwékon né í꞉seke nón꞉we nihonatekwáhsen nahiontonnáhren; sehríhon tsi nènhwe tahotirihwákwen natsennonhniátsera. Sheiaskwahéras né theshén꞉nes, né ká꞉ti tsi nihiákon ne ieshasenhnanorónhkwah nahonatʼtsenhnonhníhake.

¹² Asèken oriwiʼiohónwe sehiathaterístha ne iakoiánere, Saiá꞉ner; kwáh tsi ní꞉ioht ne teioniatasthákwa ne tesehwánen tsi niʼioiánereh ne saienawasétsera.