Psalms 49 - Ohiatonhseratokénti

Ne Teiotenonwaro꞉ritonte Naieniahesénhake ne Kakwasétsheras

Né꞉ne Korahites raotirénhnas.

¹ Sewatthóntek kí꞉ken, tionkwetaʼkwékon; sewaʼtahónsatat, sehwaʼkwékon ne tsi ionwenhtsáte sewaʼnákere,

² tsewaʼkwékon ne kén niʼiesenhnáha tánon ne tsiakoksénhhnate, í꞉se ne sewakwatiénions ó꞉ni ne sewenhtenhthénions tsiatesehwaʼtiéston.

³ Iáh né khók takatháti noʼwenhnashón꞉has ne karihwakwarihshión꞉tsera; ók tsi nahó꞉ten ne sénha isiʼnónwe í꞉ken, ne tehionó꞉tes akanontonhnióntshera kwáh enkanikonhraienthátonhke tsi enwatroríheke.

⁴ Thóh nó꞉kwa ienkatahónsathate tsi nokwáne karihonhnienhnítsheras; tánon enkenikonhraiénthate tsi nikéntons tsi niwaʼkaterenhnó꞉te ne karensotarókʼkons onowaʼkówa.

⁵ Onhnontsiéren tsi ahontʼterón꞉ne nó꞉nen thènen tekanikónhrare, nó꞉nen ne ronhnonkwetahétkens ratinikonhrá꞉tha né hionkeʼnhitseráwis tenhionkehonwarón꞉ni,

⁶ né꞉ne ronhnonkwetahétkens né ratiniahésen tsi nihothikwátses tánon tehotirénhsaron tsi nihiawetowánen ne raotikwaséhtsheras?

⁷ Orihwiʼiohónwe kwáh iáh ónhka taiekwéni nakahonhatsíwa khók ahonsahionthatiatáko, kwáh iáh othènen tekakarhiaktseráien nónhka aiekwéni nahonwaʼkárhiakse ne Rawenni꞉io tsi iakónnhe.

⁸ Asèken nahokarhiáktsera natónnhets só꞉tsi kanó꞉ron, tsi nahó꞉ten aiekwéni naiekárhiakte iáh nonwénhton tsatakaiérike

⁹ né nahontahiakohiatónhneke notsatón꞉kwa tánon ahiakoríhon tsi nénhwe ahiakón꞉nheke.

¹⁰ Tsík ónhka aiekwéni nahiontkátho shé꞉kon kíʼ nonʼné꞉e ne ronhtenikonratthókas ronhnihéions kíʼ, kwáh satèhiot ne tehiakotenonwaʼroríhtonhte tánon ne tsiakotónhnokte. Akwékon etʼiekáien ne raonattsiokowátseras ónhkak akorénstsi entsiakohiatatériste.

¹¹ Né꞉ne raonattsiatónhkwa raotinón꞉sa enkénhake tsi nénhwe, thóh nón꞉we nenhatiterón꞉take né꞉ne tsi nénhwe enkénhake, eʼthohʼsáne iehioterátston rononhontsaiénthakwe.

¹² Né rón꞉kwe thóh nahontahottsenhnáteske iáh kíʼ né tahonónsthate ne tó꞉sa arénheie; kwáh kíʼ thóh ní꞉ioht tsi enrénheie tsi ní꞉ioht ne katʼtshénen.

¹³ Sewatkátho tsi nihotihiátawenhs tsi nihát꞉ti ne rononháhak khók ronhthateniahésen, tsi nihonatʼthahítake tsi nihonerienhtí꞉ios tsi nihothikwáhtse. Selah

¹⁴ Kenhé꞉ion ienhiakosárihne; tsi ní꞉ioht ne teiotinakarontónha sakohentenhseháties ne sakó꞉nonhne; né iakoianere enhonwaʼnaterihwát꞉kweni, né raotiierón꞉ta iostó꞉re tsi enhiotken; thóh nón꞉we tsi tsohontsáien ne kenhé꞉ion ahí꞉non nió꞉re iéken ne tsi ratíteron.

¹⁵ Ók Rawenni꞉io kíʼ ensahniá꞉kente nakwatónnhets tsi nòkwah ne kenhé꞉ion ahoshaststénsera, asèken kwáh enshatiéna. Selah

¹⁶ Tó꞉sa sehnó꞉sa nó꞉nen nónhkak wahakokwáhtsene, tánon nó꞉nen sénha waʼotikwáhtsene.

¹⁷ Asèken nó꞉nen enhonhníheie iáh kíʼ thahó꞉ten tahatiháwi; ne raonattsiokowáʼtsera iáh kíʼ tahiakósehre.

¹⁸ Eʼthohʼsane tsi náhe ronónnhekwe akwékon tsehioiánerekwe ne raotirihwáke asèken teiesanonhwerátonskwe nó꞉nen thènen ensaianerásthen—

¹⁹ kwáh iensakotsatárase ratikwékon ne sakosotkénʼen, tsi nón꞉we ne tiókonte tetiókaras.

²⁰ Né rónhkwe thóh nahontahotsenhnáteske iáh kíʼ ne tahonónstate ne tó꞉sa arénheie; kwáh kíʼ thóh ní꞉ioht tsi enrénheie tsi ní꞉ioht ne katshénen.