Psalms 37 - Ohiatonhseratokénti

Karesaróntshera Naiakonikonri꞉ióhake O꞉ni Nahonwaniahesénhake

Né꞉ne Táwit raorénhna.

¹ Tóhsa teshatatenikonráhrak ne rotiriwahneraʼákskon ahatirihónni; tó꞉sa saskanékset thóh nahisaiéntake tsi nahoténshons ne ionkweʼtahét꞉kens rotí꞉ien,

² Kwáh iostóre enhonatashókwahse tsi ní꞉ioht nonékeri; tánon iostatʼthénhen tsi ní꞉ioht ne kaienthó꞉tsera.

³ Tatʼtsetakwénhak ne Roiá꞉ner tánon kaiotensherí꞉io tsi shaióthen; tánon éhʼtho ensehnákereʼke ne tsi ionwentsáte tánon kwáh skénhnonk thenkénhake.

⁴ Thóh nón꞉we naʼshesák ne sátʼtshennonniatiéra raonháke ne Roiá꞉ner, tánon éntʼhion tsi nahó꞉ten ne kwáh tesatonhontsóni.

⁵ Roiá꞉ner thá꞉tion ne tsi shónne; tatietakwéhak, tánon enhiasniénon.

⁶ Né enrónhniathe ne shariwahkwarihshióntshera thóh nataioswát꞉theke, tsi ní꞉ioht nó꞉nen éntie nón꞉we nikaháwi nikará꞉kware.

⁷ Sák tasahthatón꞉ni raohénton ne Roiá꞉ner, tánon sanikonkáts꞉te tsi tsiateráhrat tsi nenháiere; Tóhsa sehiaskanétsek tsi niháti ne rotihianerasténni tsi nihatiweienhnóten, Tó꞉ka ní ó꞉ni tsi niháti né꞉ne raʼtihá꞉wi tsi nihonatenikonríhshon ne karihwaʼhetkénsera.

⁸ Sahtaʼtiéna ne tóhsa aisanákwen, kwáh satewénhtet ne kanakwátshera. Tó꞉sa sehnoshásek nék khók nenʼné꞉e iewahtihéntʼthos ne kaʼrihwahét꞉ken.

⁹ Asèken ne ronhnonkwetahét꞉kens kwáh kíʼ nenhné꞉e enhonwaʼnátonʼte, ók tsi nihiákon ne Roiá꞉ner thonwethákwen kwáh kíʼ enhontsatakweʼní꞉ioste nonwéntsia.

¹⁰ Kénk nikaríhwes ne rotiriwahnerákskon tsi enhatihiatáton; eʼthohsáne kwáh waʼsasteniáron tsi waʼsehiatisá꞉khe, iáh kíʼ thasehiatatʼtsénhri.

¹¹ Ók kíʼ ne iakonikonhrí꞉io akó꞉wenk enwáʼton nonwéntsia, tánon kí ne enhontaterientí꞉iosten ne iawetowánen í꞉ken kakwaséhtsheras.

¹² Ne ronhnonkwetahétkens tesakonaskotánis ne tionkwetaiéri, tánon kwáh tenhonnokaraniéhon tsi nisakotíshons

¹³ Nók ne Roiá꞉ner shakosterístha ne rotiriwahneraʼákskon, asèken roteriéntare tsi enhonatenhniserók꞉taʼse.

¹⁴ Ne ronhnonkwetaʼhét꞉kens rahtihweiennénthas ne rahonáshares tánon ronsherihiethotároks ne rahonahénnas né nashakonawéntʼtho ne iakóthens ó꞉ni ne teiotʼkárias, né nashakonahwéntʼtho tsi niháti né nón꞉we nihiakothahí꞉take ne tkariwahiéri;

¹⁵ ók nék khók né rahonáshares né enhotiríhʼiothe, tánon ne rahonahénnas tenwahtsiáʼkonh.

¹⁶ Tsík nikónha ahiakoiéntahke ne tionkwetaiéri sénha ne iawetowáhne sahtèkena íken tsi ní꞉ioht ne iawetowáʼnenh rotiʼiénton ratikwékon ne ionkwetahetkenʼokónhas.

¹⁷ Asèken ne Roiá꞉ner ensakó꞉kwah ne raotiʼshaststénhsera ne ionkwetahét꞉kens, ók entesakóneh ne tionkwetaiéri.

¹⁸ Ne Roiá꞉ner sakoiénawase tsi nihiákon ne ronwahwennaráhkwah, tánon tsi nihiontatsatakweniʼióston tsi né nénhwe tsi enkátake;

¹⁹ Iáh tahóthen tahotinorónsten nó꞉nen enwáh꞉we ne tahiontkári, ne tewenhniserónhte natonhkarhiá꞉kon kwáh enhiotsénike tsi nenhothikwaiéntake.

²⁰ Ók ne ionkwetaʼtsenshonkónha kwáh nenhné꞉e enhonníheie, tánon ne ronwáshons ne Roiá꞉ner enhatiʼhiatháton tsi ní꞉ioht noienkwáhra kénk tsienhónhne. Thóh nihatiʼiató꞉ten tsi ní꞉ioht ne kahentáke wattsitiónhnis, ne kwáh iorakwataríhen enwastatʼthate.

²¹ Ne ionkwetaʼtsenhokónha ronwahtiwistaníhas, tánon iáh tehatikwénies nahonsahatí꞉ien, nók ne tionkwetaiérih kwáh ne íken tsi totirihwahiéri tsi nahoténsons sakonawíʼons.

²² Tsi niʼiákon ne Roiá꞉ner shakoiatateríston enhonawenkhónweke nowéntsia, nók tsi niʼiákon ne shakorewáhton kwáh kíʼ nenhné꞉e enhonwaʼnátonhte.

²³ Ne Roiá꞉ner shonkwanikonrahrháties tsi niʼiohahóten tsi niaʼíhtewe tánon theshakónes tsi niʼiákon ne entʼtonwahnikonraiérithe.

²⁴ Tó꞉ka enhatihiatiénenne iáh kí tiahontʼkóntaʼkwe, tsoríwah ne Roiá꞉ner enshakosniénon ne tahonsahatítaʼne.

²⁵ Niʼtewatiónhaʼkwe tánon ó꞉nen tewáhtion, karíhwes shiʼkónnhe, nók iáh nonwénton tewahkatʼkáton ne tiokwetaiéri ne Roiá꞉ner asakotewénteʼthe khés ó꞉ni ne shakotiʼiohokónha ne tahontiárithe ne káhkhwa.

²⁶ Kwáh tiotkonhónwe tsi iáh tatehotirihóron ó꞉ni tsi shakotiníhas nakorénshon, tánon ne rotiwiraiéntons né꞉ne ratiksaʼokónhas aoríhwa tsi ronhwatiʼhiathateristhákwen ne ronhwatiʼiohokónha.

²⁷ Éhʼren í꞉set tsi nòkwa ne kariwahhetkén꞉ke, tánon ioianeréhak tsi natsátser; tánon ne tsi nienshatʼwahtsiríne kwáh tiotʼkonhónwe tsi onwentsiáke enhatinákerehke;

²⁸ asèken ne Roiá꞉ner né ranónwes nahóten ne tkarihwaʼiéri; tánon iáh tashakotiakwaríshons ne rotirihwaʼtó꞉ken raonkwetaʼshónha. Kwáh tsi nénwe tsi enteshakóʼne, ók ne sakotiʼiohokónha ne ronhnonkwetaʼhétkens kwáh kíʼ nenhné꞉e enhonwanátonhte.

²⁹ Ók ne tionkwetaiéri enhonawenhkhónhweke nenhné꞉e nonwéntsia tánon tsi nénwe tsi éhtho enhatiʼnákerehke.

³⁰ Ne raotiʼwennahókons ne tionkwetaiéri kwáh íken tsi ronthokhatsherí꞉io; tánon kwáh tiókonthe tsi tkariwahiéri í꞉ken.

³¹ Ne Ronwahní꞉io raoianerénseras ronerianésons nónwe nihonatewehieʼénton; tánon iáh nonwénton tahontewénteʼthe.

³² Nʼé ronhnonkwetahétkens shakotinikónrahre ne iakoiánereh tánon ronteniéntʼtha nah shakotinonwahriákon;

³³ nók ne Roiá꞉ner iáh nonwénton tsiashakotewéntethe tsi nòkwah ne ronwahtíshons raotisatstenserákon iáh ó꞉ni tashakoríhon nahonwahtiréwahthe nónen tenhonwahtihiathórethe.

³⁴ Roiá꞉ner nòkwah shariwahnirónhak tánon shatewénhnarak ne raotiawenráhtshera; enhiakwéniensthe tsi éntʼthion nonwéntsia, tánon enshé꞉ken ne rotiʼriwahneraʼákskon tsi enhonwaʼnátonhte.

³⁵ Énska riʼienterínhe ne roriwahneraʼákskon kwáh íken tsi raniakátstekwe; tánon kwáh ratikwékon niesakoneiakénhnion tsi ní꞉ioht ne onentakwénte ne Lebanon tsoterontónni;

³⁶ ók ishiʼnonwéha éhʼtho nón꞉we nonhsakatóhetsthe, tánon iáh éhʼtho thésresʼkwe; Wahiʼhiathíshaʼke, nók iáh tehihiatatʼtsénrion.

³⁷ Tsi sehwaʼteniénhtents ne iáh tehoníkon, táon tsi sewaʼthenhnikonhráren ne tionkwetaʼiéri, ne ónkwe ne skénnonk thíʼken iakowahtsirahiénthas,

³⁸ nók ne iakoriwáhneren kwáh nenʼné꞉e iehiatátons, tánon ne iesheshakotiʼienokónha kwáh ronwahnatónthon.

³⁹ Ne Roiá꞉ner shakonónstats ne tionkwetaiéri tánon teshakóʼnhes nónen thé꞉nen tekanikónrahre.

⁴⁰ Shakoiénawashe ó꞉ni shakoniakéntha; shakotiaʼtatiskwáhtha tsi nòkwah ne rotiriwahneraʼákskon, tsoríhwa tsi raonháke nieiéntha nahiontekwáhsen.