Psalms 36 - Ohiatonhseratokénti

Ónkwe ne Iakonkwetatsénkwa tánon ne Rawenni꞉io tsi nihoiánere

Ne Raterenhnathentsátha. Né꞉ne Táwit raorénhna, ne roiothense ne Roiá꞉ner .

¹ Nó꞉nen nón꞉kwe enhieriwáʼnerake, kwáh éhʼtho ní꞉ioht tsi shí꞉ken ní꞉ioht nón꞉kak ahiontattharáhnike nakawerhiáne; tsi ionhnontónhnions iáh thatehiotonhontsóhon nahitshaníhsehke ne Rawenni꞉io.

² Tsi nió꞉re tsi éhʼneken iakotatóhare iáh tehiotʼthó꞉kas nakoterientaweriéntsera tánon nahierihwáʼshon.

³ Nó꞉nen enhontáti akwékon tehiotsákton í꞉ken tánon kanikonhráton; iáh ó꞉nen né teshotihiótens nahó꞉ten ne tkarihwaʼiéri tánon ioiánere.

⁴ Karihwaʼhetkénsera ratenikonhrón꞉nis tsi nikaríhwes rohthoríhsen; tsi nihatséra kwáh iáh othènen tehiohiánere, tiotʼkonhónwe né ken niehaiéra ne karihwaʼhetkénsera.

Né Raorihwaʼkwahrihshión꞉tsheras Ne Rawenni꞉io

⁵ Né iorihwaʼtóken sanoronkwáhtshera, Ó Saiá꞉ner, né thiʼtiorohrókston ne tsi karonhiáte, ne sarihwaʼtokentítsera iéhwas ne tsi iotsiatarón꞉nion.

⁶ Né sarihwaʼkwahrihshión꞉tsera thóh ní꞉ioht tsi ní꞉ioht ne kwáh tiotenonthatónhnion, né sarihwenhthátseras thóh ní꞉ioht tsi ní꞉ioht né kwáh tsionó꞉tes; Kwáh satéhiot tsi Í꞉se tesehiatkawénhnis nonkweʼshónha ó꞉ni ne kontitshénens, Ó Saiá꞉ner.

⁷ Tsi niwé꞉so satèkena ne iorihwaʼtó꞉ken sanoronhkwátshera, Ó Ní꞉io! Tèsehnes nonweshónha kwáh tsi ní꞉ioht ne kítkit tsi iakohiataséhtha nakohiohokónha ne kanerahontsiókon;

⁸ Né rónhneks tsi niʼiawetowáhne ká꞉khwa tesakʼkáwas ne Sanonsatokentikó꞉wane, tánon ne senekanóntens tsi kaniataratátsie ne serientiʼiósta.

⁹ Asèken í꞉se tesatkáwas nahontón꞉nhete norihwaʼkwékon; né꞉ne saswatʼthétsera tehionwasʼwatʼtheténhnis tsi natsiónnhe.

¹⁰ Ó iaskóntat sehnorónkwat tsi nihiákon ne iakawerhiaʼsí꞉io, tánon tasehiateweientónhas tsi nihiákon ne iakorihwaʼkwaríhshion!

¹¹ Tó꞉sa sehríhon ne rontatkowaʼnátha nahontahionkatsatónhti, khés ne ronhnonkwetaʼhétkens nahionkón꞉nien akatèko.

¹² Sehiatkátho ne ronhnonkwetaʼhétken ne rotiʼiatienénhen; ronhwaʼtisénhnion tánon iáh tehatikwénies tahonsahatítaʼne.