Psalms 34 - Ohiatonhseratokénti

Kanonweratóntshera Nahonsahiontatewenní꞉ione tsi nokwáh ne Teiakonikonrare

Né꞉ne Táwit raorénhna. Nó꞉nen tarete tsi ahontahotonhniottake rahohénton ne Abimelech, tsi rahónha sahotekwate, tanon éhren sarete.

¹ Kwáh kíʼ tiókonte tsi tenhinonhweratónhsehke ne Roiá꞉ner; kwáh iáh nonwénton takát꞉kawe tsi tehinonhweratónhnions.

² Kwáh thenhinonhweráton tsi nahothénsons tsi nihoierán꞉nion; aiáwenhs tsi niiákon ne ionthateronhiakéntha ahiontahónsathate tánon ahiontʼtsenhnónhni.

³ Takatsiátaras tsi ahitiatáti tatsitinirénhsaron ne Roiá꞉ner, tánon á꞉nion skát꞉ne tsi etʼtsitinisenhnakarátat.

⁴ Rahonháke ne Roiá꞉ner iakaterénhnaien, tánon waʼthakerihwasehrákwahse, akwé꞉kon éhʼren sahaháwite nakteronhkwáhtshera.

⁵ Né ionhtatwisátha thonwetakwénhak tánon iakotsenhnonhníhak; iáh kíʼ nonwénhton thatahonwananikonhrhiáthen.

⁶ Kíʼ iáh othènen teharihwástha waʼthaséntʼto, tánon ne Roiá꞉ner waʼhothóntene, tánon sahonónsthate akwé꞉kon éhʼren waʼhaháwite tsi natehonikónhrare.

⁷ Ne raoronhiakerónon ne Roiá꞉ner thensakotsiatáton tsi nihiákon ne ronwaʼsénhnaiens, tánon sahkoniakéntha.

⁸ Sewaʼrihwaienhtérat tánon sewatkátho nètho Roiá꞉ner tsi nioiánere; iakotáskats tsi nihiákon ne rahonháke nón꞉we nenhiontaséhthakwe.

⁹ Tsi sewaʼsénhnaien ne Roiá꞉ner, ratikwékon ne rahonkwetaʼshón꞉has, asèken tsi niʼiákon ne ronhwaʼsénhnaiens akwékon niehiakó꞉ien tsi nateiakotonhontsóni.

¹⁰ Shé꞉kon kíʼ né kénreks ronhtonhká꞉rhiaks kíʼ asèken thonatetkhoktáni kíʼ, ók tsi nihiákon nenhonwahwénhnarakwe ne Roiá꞉ner iáh kíʼ thaʼóthen thahontahonatókʼtase ne ioiánere.

¹¹ Ká꞉sewe, Ó sewaksaokónha, takwatahónsatat; kwáh enkwarihónhnien tsi ní꞉ioht tsi atsisewaʼsénhnaien ne Roiá꞉ner.

¹² Ónhka tsi nítion ionská꞉neks nahiakónnheke, tánon ionskáneks karíhwes ahiakotakaríhteke tsi ní꞉ioht tsi ahiakónnheke?

¹³ Tó꞉sa sathennashákʼsat, tánon tó꞉sa sahnowenhthánion.

¹⁴ Éhʼren í꞉set tsi nòkwah ne kariwahetkénsera, tánon ne sahióten tsi nahó꞉ten ne ioiánere; né séhsak ne skénnon í꞉ken, tánon sasteniáronk.

¹⁵ Ne Roiá꞉ner né sahkonikonhrahráties ne tionkwetaiéris, tánon rotahónsate tsi natehonséntʼthos.

¹⁶ Né Roiá꞉ner kwáh í꞉ken tsi sakoteniakatsténhnis ne waʼhét꞉ken tsi nihiontiéra, ensahkó꞉iatse ne ronhnonwenhtsakeró꞉nons ne tó꞉sa ahonsahonwenhnehiárake.

¹⁷ Nó꞉nen ne tionkwetaiéri tenhionʼsén꞉tho nasakoiénawase ne Roiá꞉ner, roʼthóntes, tánon sehsakohiatotaríhshions akwékon tsi natehonanikónhrahre.

¹⁸ Né Roiá꞉ner ratihiaták꞉ta í꞉res ne teʼhonerhiasaríhon, tánon sehsakonónstats ne tehiakonikonhrahríhon.

¹⁹ Wé꞉so ne karihwaʼhét꞉kens tsi nihiakohiátawenhs ne tionkwetaiéris, ók Roiá꞉ner kíʼ sehsakohiathákwas akwékon tsi nihioterihwaʼtsiéren.

²⁰ Rahónha raʼnikón꞉rahre akwé꞉kon ne raotistsiensónha; iáh né skastiéntha tathahontsáke.

²¹ Né karihwaʼhetkénsersa ne ronhnonkwetahétkens kenhéion tsiakohawithénhnis, tánon tsi nihiákon ne ronhwaʼtísons ne tionkwetaiéris kwáh enhiontréwate.

²² Né Roiá꞉ner sahniakéntha ne tsi ronhnón꞉nhe ne raonhatserashónha; kwáh iáh ónhka tsi niiákon ne rahonháke nón꞉we nihiakoniahesáhon iáh kíʼ taʼhiontréwaʼte.