Psalms 27 - Ohiatonhseratokénti

Waʼtsennonhniatserowá꞉nen Nakariʼowanhátonke ne Tewetákwen

Né꞉ne Táwit raorénhna.

¹ Né Roiá꞉ner rahón꞉ha nakswatthétshera í꞉ken ó꞉ni natiatakenhátsera; ónhka ká꞉ti atkhetshánike? Né Roiá꞉ner rahón꞉ha thá꞉nes ne tsi kónnhe; ónhka ká꞉ti akhetshánike?

² Nó꞉nen ne ratinikonráksen entionkatiatón꞉ti ne tahionkinárihte— né hionkenikonráswenhs ó꞉ni ne hiónkswens— ronhnón꞉ha enthonasítsiake tánon enhatihiatsénenhne.

³ Eʼthohʼsáne ne ronterí꞉ios tahionkehonwarónhni, nakwé꞉ri iáh kíʼ thahió꞉teronhne: eʼthohsáne tó꞉ka naterihió꞉sehra ahontkétsko nahonthonkatiatónhni, né kík sá꞉ka enwakenikonhrahníronke.

⁴ Tioríhwa riʼrihwanonhtónhni ne Roiá꞉ner, nètho kwáh enkésahke: né꞉ne raonónskon ne Roiá꞉nerakiterón꞉take kwáh tsi niaʼtewenhniseráke tsi nikónnhes, né nakatkátho ne é ne Roiá꞉ner, ne nahirihwaʼnón꞉tonhse ne Rawenni꞉io nahakerihwakwahríshiaʼse akwé꞉kon tsi nihiotónhase.

⁵ Asèken kwáh enhatiatásehte ne tsi rohtaskwáhere né tewenhniserónh꞉te ne tehionikonhráhrat; kwáh enhatiatásehte ná꞉kon tsi ioteró꞉ron ne raothó꞉sehra; kwáh thóh nón꞉we ienhakíteron tsi nón꞉we ne kwáh tionitsténhrate.

⁶ Nón꞉wa ne kenontsíne kakétskwe éhʼneken í꞉ken tsi rón꞉nes né iónkswenhs kwáh tehionkatiathataséhton, tánon né iéntʼtate ne raothosehrákon enkatienkwahrón꞉niate tsi natenhwakkhénrehte nattienhnonhniátsera; Kwáh tenhkerihwakwáhnion tánon enkaterenhnotónhnion rahohénton ne Roiá꞉ner.

⁷ Satthóntek; Ó Saiá꞉ner nó꞉nenh iorakarén꞉ni tsi thenkasént꞉tho, tasharihwaiérik nakonhá꞉ke tánon teskerihwasehrákwahs!

⁸ “Káts,” wáʼton nakwé꞉ri, “séhsak ne tsi rakonsón꞉te.” Tsis konhsón꞉te, O Saiá꞉ner, né késaks.

⁹ Tó꞉sa takatkonsaséhten. Tó꞉sa kanhakwahtserákon tsi tonsatskarahténi ne sanhátshera, Í꞉se né tiókonhte tatsiénawase. Tó꞉sa takatewéntet, tó꞉sa takatiakwahríhsi, Ó Sewenní꞉io í꞉seke nón꞉we niwaʼkatienawáston!

¹⁰ Tó꞉ka né rakeníha tánon nakenisténha nahionkatewénhthete, ne Roiá꞉ner kwáh kíʼ tenshatiáthaʼkwe.

¹¹ Takerihón꞉nien ne sahweiénhna, Ó Saiá꞉ner; tánon taʼkashá꞉rih tsi nón꞉we nihiotʼthahakwahríhshion né꞉ne iónkswenhs raotirihón꞉nia.

¹² Tó꞉sa iatakatsakwahríhsi rononháke ne iónkswenhs asèken ronathétien, asèken ne rothinó꞉wenhs tehothitáhon nahontahionkatsatónhti, tánon né ronthonriétha ne iáh othènen takahianerenhseraiénthake.

¹³ Tewakethákwen ká꞉ti tsi enkatkáto ne raoianeréhtshera ne Roiá꞉ner né tsi ionhontsáien ne iakónnhe!

¹⁴ Tatiethakwénhak ne Roiá꞉ner; sehsháststet, tánon sehríhon ne seriáne nahionikonraníronhke; tatiethakwénhak ká꞉ti ne Roiá꞉ner!