Psalms 21 - Ohiatonhseratokénti

Tahiontenonweráton Natesenhniétshera

Ne Raterenhnathentsátha. Né꞉ne Táwit raorénhna.

¹ Sashaststenserákon ne ronhnontí꞉io nón꞉we nihatsenhnonniatákwah, Ó Saiá꞉ner, tánon sahienawasehtsherákon nón꞉we nihatatsenhnakarátats!

² Tetsáwi tsi nitaskanékskwe ne rawerhiáne, tesarihwaʼserákwen tsi niharihwaʼnóntonskwe. Selah

³ ʼI꞉se Ní꞉io waʼtionkáron ne ronnontí꞉io tánon waʼtsiawíhon ne ioiáneres; waʼtsianonwaróhroke ne kwáh kawistanoronhtserí꞉io.

⁴ Waʼhiarihwanóntonse natónnhets; tánon thá꞉tion— waʼtienhnisehretstenhniónhase tsi ienhénwe, tánon tsi nénhwe enkénhake.

⁵ Né raohiatanerahkwáhtshera tsi natehiotenonhianíton né tsi tsenawáhse; thetsáwi nahasenhnowána tánon nahasháststeke.

⁶ Né saiathateríhtsera nikwékon tsi nénhwe enkénhake; tánon ne tsi senikwé꞉kon ne aoríhwa rotsenhnónhni.

⁷ Asèken ne ronnontí꞉io tawethákwen ne Roiá꞉ner, tánon éhʼthoh nón꞉we nitewé꞉tha ne iorihwatóken raonoronkwahtserákon ne kwáh é꞉neken tót꞉te tsi iáh éhʼren tahonwaʼhiathenháwite.

⁸ Né ronnontí꞉io kwáh ratikwé꞉kon ensahkoiéna ne ronwáhsons; kwáh ratikwé꞉kon ensahkoiéna ne ronwathakwásons

⁹ Kwáh éhʼtho ní꞉ioht tsi ensahkó꞉thonte tsi ní꞉ioht ne kwáh tehiotsienhanón꞉hiani ne nakwé꞉kon waʼtsahátha nó꞉nenh enhathotási. Né Roiá꞉ner raonakwatierákon tsi iensakotiatanékwane, tánon ótsire enhiakotsatátʼtsahate.

¹⁰ Kwáh ensehwatsiráhthonte ne iesehsakotihiohokónha ne tsi ionwenhtsáte, tánon ne ronnontí꞉io kwáh ratikwé꞉kon tsi ensakononwariákon.

¹¹ Nahontenikonrón꞉ni, tánon aiesateristaiénhase; tó꞉ka othènen ahontenikonronniánion nahonwakaré꞉wate iáh kíʼ tahonateríhwathentsiase.

¹² Asèken kwáh ensehʼhiónien nahontèko; kwáh ratikonsáhke tsi ensehtakwahríshien ne saiénkweri.

¹³ Sattsenhnakarathatónhak, Ó Saiá꞉ner, thóh sashaststenserákon! Kwáh kíʼ thenhiakwaríhwaʼkwe tánon tenhʼiakwatenonweráton ne sashaststénhsera.