Psalms 145 - Ohiatonhseratokénti

Tsi Nateotenonhiá꞉ton Ó꞉ni Roiá꞉nere ne Rawenni꞉io

Né꞉ne Táwit raorénhna.

¹ Kwáh enkonsenhnakará꞉tate, akení꞉io tánon akenonhtí꞉io, tánon thenkatenonhweráton ne sasénhna né꞉ne tsi nienhénwe tánon tsi nénhwe enkénhake.

² Niaʼtewenhniseráke tsi kwáh thenkonhnonhweratónsehke, tánon thenkatenonhweráton ne sasénhna né꞉ne tsi nienhénwe tánon tsi nénhwe enkénhake.

³ Tehotenonhianíton ne Roiá꞉ner, tánon teiotonhontsóhon ne iawetatʼtsáni tsi tahonwanonhweratónhsehke; tsi natehotenonhianíton iáh thahónton ne kwáh iakaiérike aiakonikonhraiéntaʼne.

⁴ Ne tsi ratiwatsiratátie kwáh tehontenonhweráton ne sahiothénseras tanon nonàken tahatiwatsiratátie, tánon enhontʼró꞉ri ne iorihowánen sahiothénhsera.

⁵ Thóh nón꞉we ne iorihwanerákwat kaswatʼthétsera ne shashastsʼténhsera, tánon thóh nón꞉we ne iorihwanerákwat kaiothénhseras, kwáh enkatéweienste.

⁶ Né naoshaststénhsera ne iorá꞉se kashaststénhseras kwáh enwatroríheke, tánon kwáh enkatróri tsi natesatenonhianíton.

⁷ Kwáh enhonnenhtanóronste tsi nikasenhnowánen ne sáwenk iawethatsáni kaianeréh꞉tsera, tánon enhiorahkareníhake thenhatiríhwakwe ne sahrihwakwahrishiónhtsheras.

⁸ Ne Roiá꞉ner thorihwaiéri tánon rotanitenhráts꞉kon, iatehanakwastó꞉re tánon titkáhere ne iorihwatóken kanoronhkwáhtshera.

⁹ Ne Roiá꞉ner onhkwetakwékon tsi torihwaiéri í꞉ken, tánon sakothénren ratikwékon tsi nisakohiatíshon.

¹⁰ Ratikwékon ne shehiatísons thenhiesanonhweráton, O Saiá꞉ner, tánon ratikwékon ne rotirihwatókens thenhiesanonhweráton.

¹¹ Né enhatithárakwe nahohiatanerahkwáhtshera ne sanakerasehrákon, tánon enhontró꞉ri ne shashaststénhsera,

¹² nahonwenenésthen onhkwetakwékon ne tehiotenonhianíton sahiothénhseras, tánon ne iorihwanerákwat aioswatʼthétshera sanakeráhsera.

¹³ Ne sanakenásera né꞉ne tsi nénhwe enkátake, tánon ne sanonhtiʼiótshera enkátake tsi wahewatsiratátse. Né Roiá꞉ner kwáh rorihwatóken akwékon tsi nihorahráts꞉ton; tánon kanoronhkwahtsherákon renéstha ne rahohiothénhsera.

¹⁴ Né Roiá꞉ner sakoiénawase tsi nihiákon ne iakonikonhroktáhon, tánon shesakoshaststenhseráwis tsi nihiákon ne iáh tehierhiashásaste.

¹⁵ Ratikwékon í꞉se teiesakánere, tánon í꞉se sehnónhtens nóhnen ronhtonhkáriaks.

¹⁶ Watesathatsakwáhrite, washeiéritʼtse tsi nihonskáneks ratikwékon ne ronhnonnhéhnion.

¹⁷ Né Roiá꞉ner akwékon tkarihwaiéris ne raoweiénhnas, tánon thorihwaiéri akwékon tsi nihatseránions.

¹⁸ Ne Roiá꞉ner kwáh ratiʼiatátʼtha í꞉res tsi nihiákon ne ienhonwanáton, né꞉ne ratikwékon nienhonwanáton ne tewethákwen í꞉ken.

¹⁹ Raná꞉nons tsi nihionskáneks tsi nihiákon ne ronhwakweniénstha; kwáh ó꞉ni rothónhtes tsi natehionsénhtʼthos, tánon sehsakonónstats.

²⁰ Ne Roiá꞉ner sakonikonhraráhtses ratikwékon ne ronhwanorónhkwa, ók ratikwékon ne ronhnonkwetahétkens tsi ensakótonhte.

²¹ Ne tsitʼsakáronhte ne enwatáti ne raononhweratónhtshera ne Roiá꞉ner, tánon onhkwetakwékon ne iakónnhe tenhionhtenonweráton ne raosenhnatokentiʼtsherákon né꞉ne tsi nienhénwe tánon tsi nénhwe enkénhake.