Psalms 143 - Ohiatonhseratokénti

Naterénnaint Nahonsahiontsiatotaríhsi tsi nokwáh ne Tehiontát꞉tsions

Né꞉ne Táwit raorénhna.

¹ Satthónhtet nakaterénhnaiat, Ó Saiá꞉ner; satahónsatat tsi niwakahterénhnaien thóh ne sarihwatokenhtiʼtsherákon; teskerihwasehrákwas thóh nón꞉we nítewe ne sarihkwahkwahrihshiontserákon.

² Tó꞉sa tseríhwent ne sanhátsera, asèken iáh ónhka ne iakónnhe teiakoiánere ne sahénton.

³ Asèken ne iónkshons ionkahtó꞉rats ohontsáke tehionkaskwahseronhkwáhtha, ionkonhniénhnis nakáhtsien ne tsi tetsiókaras nón꞉we kwáh tsi ní꞉ioht ne wahónhnise ahontonhkenhéionhke.

⁴ Ká꞉ti wakatateweienhnenhtáhon nakatsakwahríhsi; kwáh í꞉ken tsi tewakanikonhróhkwen.

⁵ Kéhiare ne wahónhnise tsi niʼiohtónhne, skanonhtonhniónkwas akwékon tsi nisatseránion, skatatehiarakwénhni akwékon ne sahiothénhseras.

⁶ Iatkanenhtsá꞉thate ne shonháke; nakatónnhets ioniatatʼthéntha í꞉sehke kwáh tsi ní꞉ioht ne iahonwenhtsiatʼténhake tsi ioniatátʼtens nahiokénhnore. Selah

⁷ Teskerihwaserákwas iostóre, Ó Saiá꞉ner; katesasthenserót꞉tha. Tó꞉sa takatʼkonshaséhthen, nontsérek thóh nenhwatsátawen tsi ní꞉ioht ne osónhwakon iehatihiáthens.

⁸ Takeríhon nahonkatʼtónhtene ne iorihwatóken sanoronhkwáhtshera noronhkéne, asèken í꞉seke nón꞉we nihtewaketákwen. Takerihónhnien tsi nihiohahóten akatʼthahíta, asèken í꞉seke nón꞉we nikaterénhnaiens.

⁹ Takenónstat, Ó Saiá꞉ner tsi nòkwah ne iónksons; í꞉seke nòkwah niaháke nakatekwáhsen.

¹⁰ Takerihónhnien nahontakonhnikonhraiérihte, asèken í꞉se nakení꞉io í꞉ken. Takeríhon ne sashaststénhsera ahonkasárine tsi nón꞉we nihiothahakwahríshion.

¹¹ Né꞉ne sasénhna aorihwáke, Ó Saiá꞉ner, senónstat tsi kónnhe. Thóh ne sarihwakwahriʼshionhtsherákon eʼren sáwit tsi naʼtewakanikónhrahre.

¹² Thóh ne iorihwatóken sanoronhkwahtsherákon séhiaks ne iónksons, tánon sehiátont ratikwékon ne hionkát꞉konte, asèken í꞉i ne shonkwéta í꞉ken.