Psalms 122 - Ohiatonhseratokénti

Karén꞉na Teiotenonhweronkwáhtha o꞉ni Konwaterenhnaiénhnis Ne Jerusalem

Né꞉ne Táwit raorénhna ne ienonhtarástha.

¹ Tsi nakatʼtsenhnónhni sahontkónkahron, “Thóh iehiákwe Raononsatokentiʼkówahne ne Roiá꞉ner.”

² Tánon ó꞉nen kénʼen iákwes, thóh iákwahte atenhenrákonʼne Jerusalem.

³ Né Jerusalem—tsi kanatónhni né꞉ne ienákereh enwátonh thóh nónh꞉we skát꞉ne nahontsiatarohrók꞉sehke.

⁴ Kénh kí nónh꞉we nonhkweʼshónha nénhtsien, né꞉ne raotsiókwah ne Roiá꞉ner. Né tsi nikonwaʼianerenhseronhniénhni ne Israel, né꞉ne tahontenonhweráton ne raosénhna ne Roiá꞉ner.

⁵ Asèken thóh nónh꞉we niwanitskwahratseró꞉tons ne ierihwenhtákwah, tsi wanitskwarahtseró꞉tons ne raonónskon ne Táwit.

⁶ Sewaterénhnaien ne skénnenk takénhake ne Jerusalem: “Aiáwenhs tsi niʼiákon ne iesanorónhkwah aiakoianerástenh

⁷ Skénnenk kénhak ne tsi sathenhenró꞉tons, tánon ahiorihwaníronhke ne tsi satenikatótons.”

⁸ Né raotirihwáke ne iakwahtátenons ó꞉ni nakaterosehraʼsónhas kwáh kí enkí꞉ronh, “Skennon kénhak ne shonháke.”

⁹ Asèken ne aorihwáke ne tsi ronónshote ne Roiá꞉ner onhkwahNí꞉io, Kwáh enkésake ne saianeré꞉tsera.