Psalms 107 - Ohiatonhseratokénti

Wískʼkhaton Kahiatónhsera Tkaroron Ne Tehierihwaʼkwáhtha (Teharihwaʼkwáhtha 107—150) Teiontenonhweratónkwa tsi tsakotatewenhní꞉iohon tsi niwéhson Tekanikonraráhkwe

¹ Ó tetsisewaʼnonweráton ne Roiá꞉ner né tsi nithoriwaʼiéri; asèken né ioriwaʼtóken raonoronkwáhtshera tsi né nénhwe tsi thenkawisasteke.

² Ánion ne sheʼsakohiathákwen ne Roiá꞉ner tetsiontʼnanéhtha tsi ne aiaiéronh, né꞉ne tsi nihiákon ne sheʼsakohiathákwen tsi nòkwah ne tehontátʼtions

³ Tánon thetetsisewaʼhiathénha ne aktenón꞉we tionhontsaiéntons, né꞉ne tsitkarakwínekens tánon ne tsi iatewatʼtsénthos, né nothoréke tánon nentiéne.

⁴ Ótiakes waʼhontsiathá꞉ton ne iahonwenhtsiatʼthénhake nón꞉we tsi iáh othé꞉nen tehiohaténion, iáh tehatitʼtsénhreskwe thóh niahónhne tsi nón꞉we tsenakeréhnion ne kanatowaʼnénhke;

⁵ ronhtonkárhiaks tánon rotiniatátʼtens, ó꞉nenh thó꞉wa ahonhníheʼie.

⁶ Eʼthóhʼne ó꞉nenh iathonséntʼtho rahonháke ne Roiá꞉ner ne tsi naʼtehonanikónhrahre, tánon waʼsakonónsthate né tsi tsehotirihwaiéwasʼkwe;

⁷ Waʼsakohéntenhse ne iotʼthahakwahríhshion, kwáh iahontʼtakwahríhshiaʼte ne tsi tsenákeres ne kanatowaʼnénhke.

⁸ Ánion tehonwaʼnonhweráton ne Roiá꞉ner asèken ne tsi niʼiorihwaʼtóken ne raonoronhkwáhtshera, asèken ne tsi niʼiorihwaʼneráhkwát tsi nisakohióthenhse nonkweshón꞉has.

⁹ Asèken sakoniatanawénhtha ne iakoniatátʼtens, tánon sakothaténhni ne iontonhkáriaks.

¹⁰ Ótiakes nonkweʼshón꞉ha thóh nón꞉we nihiakonnhétie tsi nón꞉we ne kwáh tetiókaras, ratinhó꞉tons oronhkwáhsa ratineréntston,

¹¹ asèken iáh teonatewenhnarákwen ne Rawenni꞉io raowenhnaókons, tánon wahatikénron ne raorihonhnienhnítshera ne kwáh thoʼshaststenhserowánenh.

¹² Né꞉ne iohiothenhseranírons waʼthotinikónhriahke; waʼhatihiatsénenhne, iáh ónhka tehonwaʼtisniénon ne tahonsahonwaʼtítaste.

¹³ Eʼthóhʼne ó꞉nenh iathonséntʼtho rahonháke ne Roiá꞉ner ne tsi naʼtehonanikónhrahre, tánon waʼsakonónsthate né tsi tsehotirihwaiéwasʼkwe;

¹⁴ thontasakohiatínekenhwe ne tsi tetiókaras ó꞉ni tsi ratinhó꞉tonhkwe, tánon waʼtharonkwahshiá꞉kon ne ratineréntstonhne.

¹⁵ Ánion tehonwaʼnonhweráton ne Roiá꞉ner asèken ne tsi niʼiorihwaʼtóken ne raonó꞉ronhkwahtshera, asèken ne tsi niʼiorihwaʼneráhkwát tsi nisakohióthenhse nonkweshón꞉has.

¹⁶ Waʼtharistorénhsehron ne otsínekwar nikaristótens ne iotenhenhrenhtónhnions, tánon asénhnon waʼthahiákon ne tekaristhahrenhwaniónkwen.

¹⁷ Ótiakes rotinonwatʼtánikwe né rotironhiakénthakwe ne raotirihwaʼnerahák꞉tsheras, tánon né karihónhniskwe ne raotirihwaʼnerahák꞉tshera tsi tekawisátste tsi rotinonhwatʼtaníhakwe;

¹⁸ kwáh rononhnatsátakwe ne kwáh tsitʼnikakhóten ahontʼkátho, tánon ákta roʼnetonhátie tsi iotenhenrahkáronhte ne kenhéion.

¹⁹ Eʼthóhʼne ó꞉nenh iathonséntʼtho rahonháke ne Roiá꞉ner ne tsi naʼtehonanikónhrahre, tánon waʼsakonónsthate né tsi tsehotirihwaiéwasʼkwe;

²⁰ iahaténieʼte ne raowenhnaókons tánon shasakótsenhte, tánon shasakohiatáko iáh tehothontháton nahonhníheʼie.

²¹ Ánion tehonwanonhwerá꞉ton ne Roiá꞉ner asèken ne tsi niʼiorihwaʼtóken ne raonoronhkwáhtshera, asèken ne tsi niʼiorihwaʼneráhkwát tsi nisakohióthenhse nonkweshón꞉has.

²² Tánon áhnion ne iehatítat tsi tenhontenonweráton tsi enkonhwateskónten katʼtsénen, tánon ne rontrórhiat ne raohiothénhseras né tsi thenhatiríhwaʼkwe natʼtsenhnoinhniátshera.

²³ Ótiakes waʼhontʼtsiró꞉ten kahonhiowáʼnenhs ne kaniatarakekó꞉wahne, kaniatarakekowáʼnen nón꞉we nihontonnísaks;

²⁴ waʼhontʼkátho ne Roiá꞉ner raohioténhseras, tsi nihatséra ne kaniatarakekó꞉wahne.

²⁵ Asèken tahatáti tánon watʼkawerákwe, tsi nahonontakwahronhtatséʼson ne kaniatarakekó꞉wahne.

²⁶ Ne kahonwehiakówa kwáh tehionitskaronhtawetonhátse, tánon iathensewatʼnekáwehesʼte; Thóh nió꞉re tsi iótʼteron ne ronhnónkwe waʼhonhnikonhrók꞉ten;

²⁷ rahtihiatsénenhs tánon tehotihiathénhtons tsi ní꞉ioht ne iakoné꞉ka, tsi nahotirenhnahónhake kwáh ó꞉nenh iahonatók꞉taʼse.

²⁸ Eʼthóhʼne ó꞉nenh iathonséntʼtho rahonháke ne Roiá꞉ner ne tsi naʼtehonanikónhrahre, tánon waʼsakonónsthate né tsi tsehotirihwaiéwasʼkwe;

²⁹ waʼrón꞉nien ne tsi teioweratáse ne sák tahonshón꞉ton, tánon ne tsi iononthakwahronhtónhtses ne kaniatarahkhekówahne kwáh sák thonshón꞉ton.

³⁰ Eʼthóhʼne tsi nonhsahontsenhnónhni tsi kwáh sák thonshónhton, tánon thóh nón꞉we nionshasakohiathénhaʼwe tsikonhthonwaienthákwah tsi ne tehonatonhontsónhiʼne.

³¹ Ánion tehonwaʼnonhweráton ne Roiá꞉ner asèken ne tsi niʼiorihwaʼtóken ne raonó꞉ronhkwahtshera, asèken ne tsi niʼiorihwaʼneráhkwát tsi nisakohióthenhse nonkweshón꞉has.

³² Áhnion ronhwaʼsenhnakaʼrá꞉tat ne tsi iakoterénhnaien nonkweʼshón꞉has, tánon tehonwaʼnonweráton tsi ronatkenhníson ne rotikstenʼokónhas.

³³ Né Roiá꞉ner rónhnis ne tsi kaniataré꞉nions nahonstátʼthen, tánon ne tsi ionawerótons ranekanó꞉tons káti ne tsi ionwenhtsiáte ahonhontsóskon wáʼtons ne iahonwenhtsiatʼthénhake,

³⁴ né kwáh tiohontsí꞉ios kwáh kíʼ káiase ienhwáʼton né entioróhroʼke ne iotenatentásta tánon tsioiótsis, tsioríhwa né nón꞉we nihatinákere tsi nihonhnonkwetahétʼkens.

³⁵ Né rónhnis nakanekón꞉nionhne ne iahonwenhtsiatʼthénhake, tánon rahnaweronniánions ne tsi nón꞉we nihiahontsiátʼthens,

³⁶ Tánon thóh nón꞉we nisakorihwáʼwis ne ionhthonkárhiaks nahiená꞉kereʼke, tánon waʼhontenatónhni né nón꞉we nahatinákerehke;

³⁷ waʼhatiʼientʼthó꞉sehron, tánon waʼhatiʼnenharaientʼthóhseron, tánon iawetatʼtsáni tsi ní꞉ioht tsi waʼhatiʼientʼtwáko.

³⁸ Ne tsi waʼhahiathatériste iawetatʼtsáni watkaiasehrón꞉nion, tánon iáh tehothontháton tsi iotitsiókwaiens ne rahothitsenenhókons tionhnónskwahrons, kaiatákeras, teiotinakaronhtónhas ne nakanenhrásthoʼne.

³⁹ Né nó꞉nenh ionenhrastó꞉hon tánon tehonenhtsotáhon ne tsi nihonwatironhiakéntha, rotinikonhraronhiáken, tánon rotinikonráksenhs,

⁴⁰ né thesakowerónhse nahotinontánake ne rotinontí꞉ios tánon sakahoniénhnis nahontsiatháton né iáh othènen tehiohaháken ne iahonwenhtsiatʼkénhake nón꞉we;

⁴¹ ók sehsakokwahtakwénhnis ne tehiontʼkárias tánon shotiʼianerasthénhnis, tánon né srónhnis ne raotiwáʼtsires thóh nahonahtiokowáʼnah tsi ní꞉ioht ne kontitsénens.

⁴² Né tionkwetaiéris ró꞉nahteriéntare kíʼ nahorihothénsons tánon kíʼ ronattsenhnónhniʼ né ionhkwetahétkens iáh othènen tahatikwéni né othènen ahonhníron né nón꞉we nihiorihwáʼke.

⁴³ Aiáwenhs tsi nihiákon ne iontenikonhratʼtókha ahionhnonthonniónhko kí naorihothénhsons, aiáwenhs ne ahonhnontónhnionwe ne Roiá꞉ner raonoronhkwáhtshera ne iorihwaʼtóken.