Psalms 106 - Ohiatonhseratokénti

Kariwaniráttshera ne Israel Aoriwanerahatʼtsheras

¹ Tehonwaʼnonweráton ne Roiá꞉ner! Ó tetsisewaʼnonwerá꞉ton ne Roiá꞉ner, asèken ne tsi nithorihwaʼiéri; asèken ne iorihwaʼthó꞉ken raononronhkwáhtshera tsi nénhwe enkátake.

² Ónhka aiekwéni nahiontró꞉ri ne iorihowáʼnenhs tsi nioieránion ne Roiá꞉ner, khés ne iatakaiériʼke tahonwahnonweratónseke?

³ Iakotáskats tsi niʼiákon ne tkarihwaʼiéri tsi niʼionhtséra, tiókonte né꞉ne karihwaʼkwahrishiontsherákon tsi nihiontséra.

⁴ Takehiá꞉rak, Ó Saiá꞉ner nó꞉nenh ensehiénawaʼse ne shonkwetaʼshón꞉has; thowaʼtiatawénhtet nó꞉nenh ensehsehiatáko;

⁵ né nakatkátho ne raotiʼkwahsestsherákon ne seiatarákwen, tánon ahontiaténheste ne raonatʼtsenhnonhniatsherákons ne sehiatará꞉kwen ne nakatonnáren nonʼnhí꞉i tsi ne nihonatʼtsenhnónhni ne shonkwetaʼshón꞉has tánon ahontiatáheste ne raotinaieserákon ní꞉se shonkwetaʼshón꞉ha.

⁶ Hionkwahrihwáʼneren kwáh kíʼ tsi ní꞉ioht ne iakishotʼthonkonhkénʼen; tehionkwahterienhtawenhréhon, tánon hionkwahníkon.

⁷ Né iakishotʼtonhkonhkénʼen, né Egypt siehónhnes, iáh karíhwa tehonónhni ne iorihwanerákwat tsi nisonhkwahtserá꞉se ne Rawenni꞉io; iáh teshoneiaráhon ne iawetowáʼnenh í꞉ken ne iorihwaʼtóken sanoronhkwáhtshera, ók waʼhonwaʼwenhnón꞉ti ne kwáh roshaststenhserowanenkówa né Red Sea nón꞉we.

⁸ Nek kík sá꞉ka waʼsakonónsthate né꞉ne raosénhna aorihónʼniat, né kíʼ nahóntonh aréneste ne teiotenonhianíton raoshaststénhsera.

⁹ Waʼhatewenhnaiéntonʼwe ne Red Sea, tánon honstátʼthen; tánon iasakosárihne tsi nón꞉we nihionó꞉tes tsi shí꞉ken thóh nahiontón꞉hake tsi ní꞉ioht ne iahonwenhtsiát꞉thenhake.

¹⁰ Káti waʼsakoiatanonsthá꞉te thóh ronhtsaná꞉kes tsi nó꞉kwah ne tehontatʼtions, tánon sashakoniákente tsi thonshasakoshiotarísi ne tehontátʼtions.

¹¹ Oné꞉ka thontahiakoró꞉rokste ne tehontátʼtions; iáh ne saiáta tsateshothaténhron.

¹² Ethóhʼne ó꞉nenh tahonhné꞉takwe ne raowenhnaʼókons; waʼthatirihwaʼkwáhnion ne raononweraʼtónhtshera.

¹³ Ók iostóre sahotinikonhrénhseron ne raohiothénhseras; iáh teonaterahrá꞉ton nasakothenhnikónhron.

¹⁴ Ók tsi nahatikwahnónhwaʼke ne iahonwenhtsiatʼthénhke nón꞉we, tánon waʼhonwateniénhthen ne Rawenni꞉io ne iahonwenhtsiatʼthénke nón꞉we;

¹⁵ taʼshakáwenh tsi nahatirihwaʼnónhton, waʼsakonikonhraiérihte kwáh tsi nió꞉re tontahónstike.

¹⁶ Ronhwaʼnhósaskwe ne Mahís tsi nón꞉we nihonanathaiéntakwe thóh nón꞉we ne iahontsiathénhake, ó꞉ni ne Aaron, né roiatatokénti ratsihénstatsi ne Roiá꞉ner rahonkwéta í꞉ken

¹⁷ né kí꞉ken waʼkarihónhni tewaʼthakáron waʼtonwathonhontsóren thóh iahahiáthenhne ne Dathan, tánon né nonnéʼe tahoiatháta ne Abiram ó꞉ni ne raowáʼtsire.

¹⁸ Né Rawenni꞉io ótsire tahathénieʼte né waʼotírane ne tsi niháti ne ronwaʼnonterátsesʼkwe; tánon ne waʼhakotsatátsahate ne ronhnonkwetaʼhétkens.

¹⁹ Owistanó꞉ron nahó꞉ten tionhnónskwahron owíra tonhtakonhwateniénstenste tsi waʼhontsatonhnisehrónhni ne Horeb nón꞉we tánon né wakonhwasénhnaien nètho kahiatón꞉hni.

²⁰ Né waʼthonthatawístakwe ne Rawenni꞉io raoiatanerakwátshera asèken né rotiʼiatonhniserónhni ne thethonhwaʼtenienténston ne teoná꞉kares, rahóntats nenhnéʼe.

²¹ Waʼhonwaʼhiatanikónhren ne Rawenni꞉io, ne seshakoskontákwen, tsi rahónha ne iorihowáʼnenhs rohiothénhen ne Egypt nón꞉we,

²² Iorihwaʼnerakwahthénions rohiothénhen ne tsi waʼtonhontsáien ne Ham, tánon iorá꞉ses ne kahiothénhseras rohiothénhen ne Red Sea nón꞉we.

²³ Né káti aoríhwa wahén꞉ron kwáh kíʼ ensakótonʼte— tó꞉ka iáh ne Mahís, ne roiatará꞉kwen, thaʼtahontahotáhon né tahotiʼtharáhon ne Rawenni꞉io tánon nahó꞉re, ne tahonsahakarahténi ne raonakwátshera ne tó꞉sa asakononwaʼrhiákon.

²⁴ Waʼhonterahiátaʼkwe niahontáwehiaʼte ne tsi waʼthonhontsáien, iáh tehotí꞉ien ne tewetákwen ne raorarahtsherákon.

²⁵ Rotirihwaʼkathénhen ne raonatosehrákon, tánon iáh tehonatewenhnarákwen ne Roiá꞉ner raowenhnasónha.

²⁶ Né kíʼ waʼkarihónhni waʼhanentʼtsakétsko tánon waʼsakorihwaʼníratʼtse tsi ne ensakahónhnien nahonhní꞉heʼie ne iahonwenhtsiatʼthénke nón꞉we.

²⁷ Tánon waʼtesakotiokwahríhten tsi nithonatwaʼtsiríhnon tsi nónhwe nihatinákere nonkweshón꞉has, waʼtesakoré꞉niate ne tsi iohontsakérons.

²⁸ Ethóhʼne thóh ionhsahontsátaren raotiókwahkon tsi nihonwaʼsénhnaiens ne Baal né꞉ne Peor nón꞉we, tánon né waʼhónhneʼke ne ronhwaʼnateskonhtáni ronhwaʼtitáti ne ronenhé꞉ions kahiatonhnisónhas;

²⁹ Sahonwaʼnakwísa ne Roiá꞉ner né tsi nihatiweienó꞉tenhs, tánon waʼtewaʼthentʼraré꞉ni tsi natehóntere.

³⁰ Ethóhʼne ne Phinehas waʼthá꞉tane tánon waʼsakoteriwatsterístaʼse, tánon ne kannhratarihnétshera wakʼkátaʼne.

³¹ Tánon ehʼnithonwáʼtekwe ne rahónha tsi rorihwiʼióstonse thóh nenhonwaʼtharákwahke né꞉ne tsi nénhwe enhkénhake ó꞉ni tsi niatenhonterehseranétharon.

³² Né tsi tsonaweró꞉te ne Meribah thóh nón꞉we naʼhonwanakwísa ne Roiá꞉ner, tánon waʼhorihwahetkénten ne Mahís ronónha wahatirihónhni;

³³ asèken kwáh í꞉ken tsi waʼhonwanakónhni ne Mahís, tánon tsiathoskénhniaʼse tsi wahatáti.

³⁴ Iáh tesakonathónhton nonkweʼshónhas, tsi nisakonhá꞉hon ne Roiá꞉ner,

³⁵ ók khèʼkhok waʼthontateniatʼthenhniónhase. Tánon waʼthonwanateweiénhnaʼkwe ne kahiatonhnishón꞉has ratisénhnaiens.

³⁶ Né waʼkonwahiótenhse ne raotihiatonnisónhas ne Canaanró꞉nons, tánon né waʼhonwanateristaiénthaʼkwe.

³⁷ Iekaníhare ne iahonwaʼtítate ne raotiʼnekenteronhtsherashónhas ó꞉ni ne raotiʼiatasehtsherashónhas tsi waʼshakonatsiatatʼtsaháten ne iotinó꞉wenhs niʼiohokónhas.

³⁸ Waʼsakotinonwarhiakónhnion ne iahothènenh tehotistón꞉ton ratiksaʼokónhas, tánon ne raotinekenteronhtsheraʼshónhas ó꞉ni ne raotiʼiatasehtsheraʼshónhas, tánon ne iahonwaʼtíthate nahonwaʼnatsatátʼtsahaten ne raotiiatón꞉nishonhas ne Canaanró꞉nons; kí꞉ken sakotinonwaʼrhiaʼkhónhnion ne waʼhonhontsiatʼsáte.

³⁹ Iáh teshonatʼkwénienskwe ne waʼkarihón꞉ni tsi nihatiʼweienó꞉tens, tánon tsi nahatiweienótenhne né꞉ne kwáh tsotakwahkaré꞉ni í꞉ken.

⁴⁰ Eʼthóhʼne ne raonakwáhtshera ne Roiá꞉ner né wahatʼtsenhanétakwe tsi nòkwah ne onhkweʼshón꞉ha, tánon waʼshakokénhron ne kwáh rahónha raʼhonkweʼtashón꞉has;

⁴¹ iashakotsakwahríhsi rahotiʼshaststenhserákon ne iáh tehatiʼsitaheró꞉nons, né káti tsi nihiákon ne ronhwaʼtíshons ne ahontahonwaʼtiniarotárohke.

⁴² Né ronhwaʼtíshons waʼhonwatironhiákenʼte, tánon né waʼhonwanátsten ne kaniakatsténhsera raotiʼshaststénhsera.

⁴³ Wé꞉so iorihwáke seshakoiatákwen ne rahonkweʼtashón꞉has, ók kwatʼthahonhnikonhrónh꞉ni tsi iáh tehonatewenhnará꞉kwen, tánon né wahakonónhwaien ne raotirihwaʼnerahát꞉tshera.

⁴⁴ Nek kík sáka waʼsakóthenhre tsi nihotironhiáken nó꞉nen sahothón꞉tene tsi tehonséntʼthos.

⁴⁵ Asèken rohnónha raotirihwá꞉ke tsi rehiá꞉re ne raoterihwaʼseronniátshera, tánon sahatatiéna ne tahioianénhaʼwe ne iawetatʼtsáni ne iorihwatóken raonoronkwáhtshera.

⁴⁶ Waʼsakahónhnien nahonwaʼtítenhre tsi nikáien ne ronhwaʼtinhó꞉tonkwe.

⁴⁷ Saskwahiatanóns꞉tat, Ó Saiá꞉ner onhkwahNí꞉io, tánon sakwahiataróhrok tsi natehionkwahrénion nonkwéhne, ne nahónton taiakwahtenonhweráton ne sasenhnatokénti tánon ahiakwahtonnáren tánon takwahnonhweráton.

⁴⁸ Tehonwaʼnonhweráton ne Roiá꞉ner, né꞉ne sakoní꞉io í꞉ken nʼIsraerʼró꞉nons, né꞉ne tsi nienhénwe tánon tsi nénhwe enkénhake. Tánon onhkweʼtakwé꞉kon ahiaiéron, “Éhʼtho niʼiáwenh.” Tehonwaʼnonhweráton ne Roiá꞉ner!