Psalms 105 - Ohiatonhseratokénti

Rawenni꞉io Raoriwatokentí꞉tshera tsi Nokwáh ne Israel

¹ Ó tetsisewaʼnonweráton ne Roiá꞉ner, tsi sewaʼsénhnaien, ietʼtsirorhiánion nonhkweshón꞉ha ne raoioténhseras.

² Tetsisewaʼrihwákwas ne kanonweratónhtshera, akwékon sewatróri ne iorihwaʼnerakwahthénions tsi nihohiothénhen.

³ Ionkwatʼtsenhnonhníhak tsi raónha ní꞉i rahonkwé꞉tas í꞉ken; kwáh tsi niʼiákon ne tenhonwanonweráhton iakotonnárak.

⁴ Rahonháke ne Roiá꞉ner niaháseʼwe natsisewaʼiénawaʼse; tánon iehiokonhtakwénhak tsi sewaʼsenhnaiénsek.

^5-6 Sewakwe Abraham nón꞉we niʼtisewatwatsiríhnon ne ne Rawenni꞉io raʼonhatshera kenʼne, Jacob nón꞉we nitisewatwatsiríhnon, rahónʼa ne Rawenni꞉io etʼtsisewaʼiataráhkwen, seweiárak ne iorihwanerahkwahthénions ne Rawenni꞉io tsi nihoieráhnion tánon ne karihwenhthá꞉tsheras tsi nithotkáwen.

⁷ Rahónha ne Roiá꞉ner onhkwaʼNí꞉io í꞉ken; ne raorihwenhthátshera ohontsakwékon káien.

⁸ Tiókonte ne réhiare ne raoterihwaʼseronhniátshera, né nowenhnasónhas ne rótston tsi nisakorahratsténhni ne tewenhniawehetsherásen nío꞉re iatehiotereserá꞉ne,

⁹ né naʼterihwasehronniátshera tsi ró꞉son skát꞉ke ne Abraham, tsi niʼorahratsʼténhni ne Isaac.

¹⁰ Né Roiá꞉ner ró꞉son naʼterihwaseronniátshera skát꞉ke ne Jacob, né꞉tho tsi nènhwe enkátaʼke.

¹¹ “Entʼkónhion non꞉ontsa ne Canaan nón꞉we,” wahénron. “Kwáh í꞉se ensakwenhkónweʼke.”

¹² Né꞉ne arèko sihonatsiokowánenh, kénk nihátiʼkwe, tánon thóh nón꞉we nihotiwaʼhétston,

¹³ rotinatenháwisʼkwe tsi ienakeré꞉nion nonkweshón꞉ha, tehotiʼnakerasehrawénhron tsi ratinakeréron nonkweshón꞉has,

¹⁴ Ók kíʼ ne Rawenni꞉io iáh tehothontáʼton nón꞉ka ahonwaʼtironhiakénton; tsi tashakó꞉ne, waʼsakoronhkáten ne rotinontí꞉ios:

¹⁵ waʼton, “Tó꞉sa iasehiéna ne kehiatará꞉kwen; tó꞉sa sehkaréwat nakonkwetaʼshón꞉has ne rotitó꞉kenʼse.”

¹⁶ Nó꞉nen shontahaténieʼte natonkarhiákon ne tsi ionwenhtsáte, akwékon waʼhahiá꞉ke tsi nihotiʼientʼthó꞉seron nonátsia,

¹⁷ né nasakonónsthate ne rahonkwetaʼshón꞉has ohénton ne rón꞉kwe Egypt shiahoténieʼte, né꞉ne Só꞉se, wahonwaʼthenhnínon nenhnéʼe ne nahonwaʼtenaskónhniaʼte.

¹⁸ Waʼhositakaréwaʼte né tsi oronkwáhsa tehonwaʼsitanerékton, né raniaráke karístatsi né ronwaʼniasaniákton;

¹⁹ kwáh tsi ní꞉ioht tsi niehorihwáken akwékon thóh nahawénhseron, né꞉ne tsi nahoténsons ne Roiá꞉ner rororhiánion ne Só꞉se.

²⁰ Ethóhʼne ne Egypt ronhnontí꞉io sahononhtónhko; ne sakotikóras nonkweshón꞉ha sahonwaʼtatewenhniʼiótseron.

²¹ Rahón꞉ha waʼhorihónten ne raokorasehrákon, tánon waʼhokóraste akwékon tsi níkon roienhtatsheráien,

²² asakorihónhnien ne rahonkwetaʼshón꞉has kwáh tsi nenhthanónhweʼne, tánon roianerenhseráien nasakorihónhnien ne sakonatenikonhráwis.

²³ Eʼthóhʼne ne Jacob Israeronónhke niaháre; ne Jacob tihahóntsate tsi ní꞉ioht tsi iehenterón꞉taʼkwe ne tsi waʼtonhontsáien ne Ham.

²⁴ Tánon ne Roiá꞉ner waʼsakahónhnien ne rahonkwetaʼshón꞉has nahonatsokowáʼna, tánon ró꞉nonha sénha waʼhatisástenhne tsi ní꞉ioht ne tehontátʼtions,

²⁵ waʼsakahónhnien ne Egyptró꞉nons nahonwaʼtíson ne rahonkwetaʼshón꞉has, ne tsi rahónha ronhwaʼhiótenhse, ne ká꞉ti nahonwanateweienhnatʼsáten nʼIsraerʼró꞉nons tsi enhonwatinikonhrá꞉ten ne raonatserashón꞉has.

²⁶ Ethóhʼne ne Roiá꞉ner Egypt iahoténieʼte ne rahoná꞉tshera Mahís, skát꞉ne ne Aaron ne nónh꞉ne rohiatará꞉kwen.

²⁷ Tsi ratinákere ne Egyptró꞉nons ne waʼhiaterihwathénhtsate nanéneste, ne iorihwaʼnerakwahthénions ne Rawenni꞉io tsi nisakonáhon nahotiʼióten ne Ham nón꞉we.

²⁸ Tetsókaras tahaténieʼte, tánon tahakáraste ne tsi hionwénntsaien; wahathitátsaʼte ne raowenhnaókons.

²⁹ Nonkweshón꞉ha raotinekashónhas onekwénhsa ónhton, né kiʼ waʼkarihónhni né waʼhotírhiote ne kentsonʼshón꞉a.

³⁰ Né raononhontsákes né tonhtahatírahne nʼotskwáhrhe, iehióhe ne ronnontí꞉io raonónskons.

³¹ Tahatáti, tánon otsíʼks rotihonwaʼráhratse tsi waʼhónhnewe, tánon iakotsinonwaʼhahrástha wahtonréhni ne raotinakerasehrákon.

³² Né tahatkáwe waʼhowisónhti tsi ní꞉ioht naiokénhnore, tánon waʼotesehrontsésheron ne raononhontsáke.

³³ Waʼhakaronhniánion ne rotinenharaientʼthó꞉sehron ó꞉ni ne raotirontatónhas ne tsionionwaʼrontonhakówa, tánon oshá꞉tara waʼrónhni ne raotironthasónhas ne raotiʼnakerasehrákon.

³⁴ Tahatáti, tánon tsistá꞉rare waʼkónhneʼwe, tánon ne kenhnikonhná꞉sas tsistá꞉rare iáh tahónton nakonwaʼnásehte tsi nihionatiokowáʼnen;

³⁵ akwé꞉kon waʼhontekhwí꞉sa ne kaientʼthótshera ne raononhontsákes, tánon akwé꞉kon wahónhiake ne rotihiaientʼthó꞉seron ne raononhontsáke.

³⁶ Ratikwé꞉kon wasakótonte ne thonatierénhton ronanakeráton rotiskenrakéte ne tsi iohontsáte, kwáh ratiwaʼtsirakwé꞉kon ne Egypt tsi thóh nashakoiéraʼse.

³⁷ Ók kwáh skennónk tsi tontasakoiatínekenhwe ne rahonkwetaʼshón꞉has ne Egypt, né ratihawinónhtse ne kawistarákens tánon nowistanórons, tánon kwáh ratiʼkwé꞉kon ronatakaríte tánon ratisháststes.

³⁸ Né Egypt tsi niʼiotʼtsenhnónhni nó꞉nenh satontahonténhnti, asèken kwáh í꞉ken tsi sakotitʼtsániskwe.

³⁹ Né Rawenni꞉io éhʼneken waʼhatʼtsátaien tsi rónhne né ahotiró꞉rohke, tánon ótsire né tahiakoswaʼthéten nokarasnéha.

⁴⁰ Kákʼkhwa waʼhatirihwaʼnónhton, kíʼ okwesenhtaríhwaʼse tashakotenietase, tánon iawetatsá꞉ni tsi ní꞉ioht tsi waʼsakokwáhnonte karonhiáke nontáwe.

⁴¹ Waʼhatstenhranontónhko, tánon takanekóten; iahonwenhtsiatʼthénhake niahontʼnekíne tsi shí꞉ken ní꞉ioht ne akaniataratátse.

⁴² Asèken rehiá꞉re ne iotokénti í꞉ken tsi nihorahratsténhni, ne Abraham, né꞉ne raonhátshera í꞉ken.

⁴³ Káti aktsenhnonniatserákon tsi tontasakohiathénhaʼwe ne rahonkwetaʼshón꞉has, né꞉ne rotonkwetarákwen kwáh tehotirihkwakwenhátse.

⁴⁴ Né waʼsakahonhtsawí꞉hon nakorénshons raononhontsashón꞉has, tánon né waʼhatiʼientʼwakwenháton nakorénhshons rotiʼientʼthó꞉serons,

⁴⁵ né káti nahontewénhnarakwe ne raoianerénhseras tánon akwé꞉kon ahatíhawaʼke ne raorihwatátʼtseras. Tehonwaʼnonweráton ne Roiá꞉ner!