Psalms 10 - Ohiatonhseratokénti

Né Naterénhnaien Nahonsahiontatsiatáko Tsi Nòkwah Ne Tehiontátʼtions

¹ Nontiéren, O Saiá꞉ner, tsi ahínon nióre tésehte? Nontiéren tsi satasehton nó꞉nenh thènen tekanikónhrahre?

² Tsi rontatkowaʼnáhtha ne ionhkwetahétʼkens sakotironhiakéntha ne iakóktsien— né ronwatironhiakéntha ne rotiʼiénas tsi nihonaterístaien ne ionkwetahétkens tsi nionatenikonrónhni.

³ Asèken ne ronhkwetahétken ne tehaterenhsaronkwáhtha tsi nithaskáneks ne raweriá꞉ne tsi nikáien né ronwatinénskwas nakorénson rontewenhnaksátha tánon ronwakenrónhni ne Roiá꞉ner.

⁴ Né ronkwetahétken tsi nihotatkowaná꞉thon tsi nihanontónhnions né Rawenni꞉io iáh othènon thahakerihwatsiénriase iáh othènon tehatsterístha.

⁵ Tsi nihaweienó꞉ten kwáh tiókonte tsi roʼhianerasthénis; ne sarihwenhthátseras kwáh í꞉ken tsi tiótʼte, aí꞉nonh nió꞉re ítken ne rahonháke; tsi nòkwah ne tehontátʼtions, sahkonitskeró꞉seras.

⁶ Í꞉rehre, “Iáh seh nonwénhton tahoriwaʼnó꞉ron; kwáh tiókonte tsi nihanekwensatátse iáh sèh nonwénhton tsiatahonhnikónrare.”

⁷ Ne tsi raʼshahkáronhte ne titkáhere ne karihwanirát꞉tsera tánon kanikonrá꞉ton ó꞉ni karonhiakénsera; né renhnasákon né꞉ne iotakónhta tánon karihwahetkénsera.

⁸ Renskwáhere roráre nashakonénhrenhte ne aktónhtsie kanataiéntons; tsi nón꞉we nihatasehtákwah thóh nón꞉we nisahkoséhtha ne iahʼothènen teiakoníkon. Sahkohterihwató꞉ras ne iáh othènen teiéstha;

⁹ rahiatakwénhtare nahanénhrenhte tsi nón꞉we nihiotashé꞉ton nihorihwaʼsehton tsi ní꞉ioht ne kénreks tsi nón꞉we nihosónhwaien; rahiatiónhni né nasakonénhrenhte né nasakoiéna ne iontateronhiakéntha; washakoiéna ne ionthateronhiakéntha tsi nontahatihénttho né rahohá꞉re tsi wahanhóton.

¹⁰ Ronitionkónhni, tehanónsaien, né sakoiénen né rotiʼiénen né tsi niwahaharashástste né raóʼahre.

¹¹ Í꞉rehre, “Né Rawenni꞉io iáh othènon tehatsterístha, rotkonsahséhton, iáh nonwénhton thatehakánere.”

¹² Tétann, Ó Saiá꞉ner, Ó Sewenní꞉io, í꞉tsient; tó꞉sa sehiatanikónhren ne iontateroniakéntha.

¹³ Nontiéren ne ronhkwetahétken tsi rohiatanikónhrens ne Rawenni꞉io, tánon ráton ne rawerhiáne, “Iáh seh tasekréhwate”?

¹⁴ Ók í꞉se kwáh satkáthos né atkaronhniátshera ó꞉ni karonhiakénsera, né iakokarewáton tsi nihiakoiátawens í꞉se tiesáwis; iʼséke sheshehiatákwas ne tehiontonhnakáriaks; í꞉se teshenes ne teiontonnahkarions.

¹⁵ Tetsehshaststensériaks ne ionkwetahétken tánon ne karihwahetkénhsera rohiótens; kwáh tsenontának tsi nihahiothenseráksen, né tsi ní꞉rereh iáh tasehrihwatʼtsénri.

¹⁶ Né Roiá꞉ner né꞉se Nonkwahnontí꞉io í꞉ken né꞉ne tsi nénhwe tánon iáh tsahontótʼten. Nonkweʼshónhas kwáh kíʼ éʼrenh enhiontatsatenháwite ne rahohontsáke.

¹⁷ Ó Saiá꞉ner, kwáh sathontéhon tsi nihatirihwanóntons né iontateronhiakéntha; í꞉se sehionhniénhnis né skénhnonk thakénhake né shónhnis né sahontáke nahisathónhtene.

¹⁸ Kwáh kíʼ í꞉se tésehnes né tehiontonhnakáriaks tánon né tehonwatinenstsiákon, né ká꞉ti ne ronhnonhontsakeró꞉nons iáh shé꞉kon tahonsahsakotinenrakári.