Proverbs 9 - Ohiatonhseratokénti

Attokháhtshera Tánon Ohnonhwarorí꞉ta

¹ Attokháhtshera iakotenonhsón꞉ni, tsá꞉ta ní꞉kon kaʼnawahatotons ne ioienawá꞉kon tsi karonhkweʼnáhere.

² Iakotenhnhá꞉ʼon katshé꞉nen akonwário, iekhwahrá꞉ne, onistaʼshón꞉ʼa teiakoiés꞉ton ne otsí꞉tsa ahatihnekí꞉ra, tánon waʼeksahrónnion.

³ Iaʼakoténniehte akohnháʼtsheraʼshón꞉ʼa kanà꞉takon niakón꞉ne tsi nón꞉we ne akwáh è꞉neken tiótte naʼtakontí꞉taʼne tánon iaionathonkarón꞉ti.

⁴ “Tasewatáweiaʼt ne iáh tesewattókha tánon ne sewanonhwaró꞉ri!” Tánon waʼí꞉ron,

⁵ “Kásewe, ísewak ne akékhwa tánon sewahnekí꞉ra otsí꞉tsa niaʼté꞉kon tewatiéhstanion.

⁶ É꞉ren sewatatiaʼtenhá꞉wit tsi nón꞉we nihón꞉neʼs ne iáh tehonttókha tánon entsónhnheke. Né꞉ʼe sewáhsehr ne karihonnienníhtshera.”

⁷ Tókaʼ enhsateʼnién꞉ten ahsherihwakwaríhshien ne rontatkweniénhstha tókaʼ ó꞉ni ne iáh tethotirihwaié꞉ri, kwáh nek ne eniesaʼnikonhrakaré꞉wahte.

⁸ Tóhsa nonwén꞉ton sherihwakwaríhshien ne iontatkweniénhstha; kwáh nek ne eniesatahkwáhswen. Sók ne ronttókha ahsherihwakwaríhshien kwáh nen né꞉ʼe eniesakwénienhste.

⁹ Iáh oʼthé꞉nen tewatsterístha nahò꞉ten ienhsheiatátiaʼse ne ronttókha sénha nen né꞉ʼe enhonttókhaʼne. Tsi nahò꞉ten enhsehró꞉ri ne rotirihwakwaríhshion ne karihwí꞉io sénha kiʼ enhotiʼnikonhrowáhnha.

¹⁰ Tókaʼ sahská꞉neks ahsattókhake teiotonhwentsóhon kiʼ ne ahtskweniénhsthake ne Roiá꞉ner. Tókaʼ ehtshienté꞉ri ne Roiaʼtatokénhti, saiená꞉ʼon kiʼ ne kaʼnikonhraientáhtshera.

¹¹ Attokháhtshera entison ne ahsonhnhé꞉son.

¹² Í꞉se sonhá꞉ʼa enhsatshennonniátahkwe tókaʼ sá꞉ien ne attokháhtshera, tánon tókaʼ iáh thahshié꞉na, í꞉se kiʼ enhsatatkarón꞉ni.

¹³ Ohnonhwarorí꞉ta ne shá꞉ka tsi ní꞉ioht ne ión꞉kwe teioterienʼtakária tánon iáh tekarihonnién꞉ni, ó꞉ni iáh teiotehenhserá꞉ien.

¹⁴ Eʼthó kéntskote tsi iotehnhoká꞉ronte tsi ionónhsote tókaʼ ó꞉ni tho nón꞉we nikéntskote ne kwáh è꞉neken tiótte ne kanà꞉takon,

¹⁵ tiakó꞉nonks nón꞉kwe ne iakotohetstonhátie, ók ronónha khók raotirihwà꞉ke tsi nahò꞉ten né꞉ʼe ronnonhtonniónkwas:

¹⁶ “Tasewatáweiaʼt, tsón꞉kwe ne iáh tekarihonnién꞉ni!” Ók wakèn꞉ron, kí꞉ken sewanonhwaró꞉ri,

¹⁷ “Né꞉ne kahnekanénhskwen sénha ne teiotsikhè꞉tare. Kanaʼtaranénhskwen sénha iawékon.”

¹⁸ Kí꞉ken nón꞉kwe ne waʼtiakoʼnikonhrakén꞉ni iáh tehonaterién꞉tare tsi enhonníheie nónhka aonónhskon ieniontáweiaʼte, ó꞉ni ónhka ó꞉nen ieiakotaweiá꞉ton tho kiʼ nón꞉we ieiá꞉ko tsi nón꞉we teiakotonhwentsaweʼéhston ne kenhé꞉ion.