Proverbs 6 - Ohiatonhseratokénti

Ísiʼ Nón꞉we Sahonwatihronká꞉ten

¹ Konién꞉ʼa, wahsehrhá꞉ratsteʼ kenh ashatátnerenke akó꞉ren iakotká꞉rote?

² Ó꞉nen kenh wahshiaʼtotahrheneʼ ne kwáh í꞉se sawenna꞉okonʼs ne wesateristaienhase tsi nahò꞉ten sarihwisaʼáhnion?

³ Ó꞉nen ká꞉ti, konién꞉ʼa eʼthó nón꞉we nisathatenhron raoshatstenhserá꞉kon netho rónkwe, kenh ká꞉ti nénhshiere nahonsashatiaʼtotá꞉tishi: tesasteríhen tánon tsheʼné꞉ken ne aonsahiáhtkaʼwe.

⁴ Tóhsa satatenaktóthahs naiesèn꞉taʼwe, tóhsa téstaʼn nahsatoríshen.

⁵ É꞉ren í꞉seht tsi nón꞉we waterístaien tsi ní꞉ioht ne otsiʼtén꞉ʼa tókaʼ ó꞉ni ohskenón꞉ton ioteʼkwenhátie ne tóhsa rató꞉rats ahaié꞉na.

⁶ Né꞉ʼe ne ronnentóhrha ahontewéienhste tsi ní꞉ioht ne tsikeʼnhontstókhwi tsi ronnónhnhe.

⁷ Iáh tehotí꞉ien ne ónhka ahonwatihèn꞉tenʼse,

⁸ nok kiʼ ronteweién꞉tonhs ne raotíkhwa tsi niwakénhnhes, rontateweiennén꞉taʼs tá꞉we nakohserà꞉ke.

⁹ To nikarí꞉wes ne rentóhrha enhaiaʼtión꞉nike? Kátke nekén꞉ʼen enhatkétsko?

¹⁰ Rá꞉ton, “Kenʼnikarihwésha enwakí꞉taʼwe. Tenkanihsnonhsá꞉seren tánon enkatoríshen.”

¹¹ Tsi ká꞉ti nikarí꞉wes ró꞉taʼs, kentèn꞉ha tenhóhkwaʼte tsi ní꞉ioht ne ranenhskwasʼkó꞉wa nahonarénhten.

¹² Iáh shaʼtékena té꞉ken tsi nihatiiaʼtó꞉ten ne rotirihwaneraʼákskon ne tsi tió꞉konteʼ ronnonwenhtánions.

¹³ Rontkahrokeríkhons tánon tehonnisnonhsaieronnionhá꞉tonʼs naiesaʼnikonhrhá꞉ten.

¹⁴ Tió꞉konteʼ nek ronnonhtonniónkwas nahò꞉ten ioʼtáksen nahshakotikarón꞉ni tsi nón꞉we nienhón꞉ne.

¹⁵ Ne tiorí꞉wa iáh ohén꞉ton thaontonthró꞉ri iaʼtenhonatierónnionʼse, tánon enhonʼwèn꞉taʼne.

^16-19 Tsá꞉ta niiorí꞉wake ne Roiá꞉ner rarihwáhswenhs, tánon kwáh shakorihwáhswenhs ó꞉ni roriʼwáhston: Nónhka iontatón꞉ni tsi niieiaʼtò꞉ten, nónhka ionnowenhtánions, nónhka nahshakotinonhwarhiakon ne iáh oʼthé꞉nen teiakohnhí꞉kon, nónhka kaʼnikonhráksen ionnonhtonniónkwas, nónhka teiakosteríhenhs ne wahétken naióntiere, nónhka ne iakonowénhton tsi nahò꞉ten iakorihwahnirá꞉ton tánon ieiakokontáhkwen, tánon ne nónhka teierihwenhawíhtha ne karihwakaʼténhtshera tsi naʼtehónteron natenró꞉sera.

Ne Aiontatahronká꞉ten Ne Kanahkwaiesáhtshera

²⁰ Konién꞉ʼa eʼthó ná꞉tsehr tsi nahò꞉ten iaʼníha iahró꞉ris tánon tóhsa sasaʼnikónhrhen tsi nahò꞉ten saʼnisténha iesarihonnién꞉ni.

²¹ Tió꞉konteʼ ne raotiwennaʼshón꞉ʼa serià꞉ne nón꞉we naʼsateweién꞉ton.

²² Tsi nahò꞉ten iesarihonnién꞉ni ensaianénhawe tsi tesatstikafenhátieʼs tánon ensanónhstate tsi niwahsón꞉tes tánon ensateʼnikòn꞉ron tsi niwenhnísereʼs.

²³ Tsi nahò꞉ten iesahró꞉ri ne shá꞉ka ne teiohahseráthe; ensaháharahte ensahró꞉ri tsi ní꞉ioht tsi tkariwaié꞉ri nahshónhnheke.

²⁴ Enwá꞉ton é꞉ren enhsatatiaʼtenhá꞉wihte ne iáh tetiotirihwaié꞉ri, ne kí꞉ken iotiniáʼkhon aotiwennaʼshón꞉ʼa naiakonahskanékten ne ronnón꞉kwe.

²⁵ Tóhsa ká꞉ti iesahskanékten tsi niiotiiaʼtáhskats; tóhsa ne akarihón꞉ni aiesaié꞉na tsi kontkahrokeríkhonhs.

²⁶ Enwá꞉ton ne rón꞉kwe enháhnhaʼne iáh tewattókha tsik nikanó꞉ron ne kaná꞉taro, aseʼkénh nenhatenahkwaié꞉saʼte akwé꞉kon enhóhtonʼse tsi nahò꞉ten ró꞉ien.

²⁷ Enhskwé꞉ni kenh ne ó꞉tsire áhsren sentsweʼnà꞉ke ne iáh thaʼóntsha ne satsherónnia?

²⁸ Enhskwé꞉ni kenh tsi nón꞉we nikaké꞉ron ne iohswenʼtataríhenʼs tho nón꞉we nenhsahtén꞉ti ne iáh thahsatiaʼtátsha sahsiʼtà꞉ke?

²⁹ Ne ká꞉ti shaʼteiótteron skátne aietsà꞉rate akó꞉ren ró꞉ne. Ónhka ká꞉ti tho nenhátiere wé꞉so tsi enharonhià꞉ken.

³⁰ Nón꞉kwe iáh thahonwáhswen ne ranénhskwas tókaʼ ratonhkáriaʼks tánon atenná꞉tshera enhanénhsko.

³¹ Ók kiʼ tókaʼ enhonwahá꞉raʼse, tsá꞉ta nateiotiá꞉sere tsi akwé꞉kon enhshakáriaʼke—enháhtkaʼwe tsi nahò꞉ten ró꞉ien.

³² Tókaʼ ká꞉ti ne rón꞉kwe enhatenahkwaié꞉sahteʼ ne kén꞉ton iáh tehoʼnikòn꞉ra. Kwáh nek ne enhatatkarón꞉ni tsi rónhnhe.

³³ Enhatatshennáksaʼte tánon enhonwário; ienwatkón꞉tahkwe tsi enhatéhen.

³⁴ Aseʼkénh ne ronià꞉kon thó꞉non tiaonhá꞉ʼa enthoná꞉khwen nó꞉nen tehonwanahkwáhkwen né tsi roteʼkéhfen, iáh tshieió꞉toʼkte tsi ní꞉ioht tsi ensehshakokáriaʼkshe.

³⁵ Iáh thahaié꞉na nahò꞉ten ahotkáriaʼkse; iáh ò꞉niʼ nahò꞉ten ahonwà꞉ion thahawerienʼtí꞉io naonsahotenaʼkhwenná꞉wenhseʼ tsi niió꞉re tsi ronaʼkhwén꞉ʼen.