Proverbs 31 - Ohiatonhseratokénti

Ronwaʼnikonhrá꞉wis Ronontí꞉io

¹ Ne kí꞉ken iorihwahní꞉ron nowennaʼshón꞉ʼa Ronontí꞉io Lemuel roʼnisténha wahonwahronká꞉ten:

² “Í꞉se konién꞉ʼa ne kwáh konnorónhkhwa, waʼtewaterihwaʼserá꞉ko nakwaterennaientáhtshera. Nahò꞉ten ne kén꞉ʼen akonhró꞉ri?

³ Tóhsa satié꞉saht saʼshatsténhsera ne kenʼtéhtshera akarihón꞉ni tánon ne sahwísta akwé꞉kon konnón꞉kwe iakontíhsaʼahte; iakotiʼnontiiohtsheraríhshions.

⁴ Satahónhsatat, Lemuel. Rotinontí꞉ios iáh teioterihwíson ne otsí꞉tsa nahatihnekí꞉ra tókaʼ ó꞉ni ahatinón꞉wake ne iohnekahní꞉ron.

⁵ Nó꞉nen rotihnekí꞉ren, enshotiʼnikónhrhen ne kaianerenhseraʼshón꞉ʼa tánon enhshontateʼnikonhrhénhten raotiianerenhseraʼshón꞉ʼa nonkweʼhó꞉kon nahshakotiiaʼtakéhnha.

⁶ Kí꞉ken iohnekahní꞉ron nenʼné꞉ʼe raoná꞉wen ne ronnihé꞉ions tánon rotiʼnikonhráksenʼs.

⁷ Sheríhon nahatihnekí꞉ra naonsahotiʼnikónhrhen tsi rotí꞉ten tánon iáh tehotí꞉ien natonhnhahráhtshera.

⁸ “Iaʼsheiatátiaʼs nón꞉kwe ne iáh thahatikwé꞉ni ne tahontateriʼwakéhnhase. Sheiaʼtanónhstat ne raotiianerénhsera ne iáh thahatikwé꞉ni nahontatiaʼtakéhnha.

⁹ Sheiatátiaʼs tánon tkariwaié꞉rik tsi tenhshiaʼtó꞉rehte. Tsaʼtanónhstat raotiianerénhsera ne rotí꞉ten tánon ne tehonatkárien.”

Ró꞉ne Ne Ieweienní꞉io

¹⁰ Tho niwentó꞉re nahsenahkwatshén꞉ri ne ieweienní꞉io! Akaónha sénha wé꞉so shaʼtékena tsi ní꞉ioht ne ohwistanoronʼshón꞉ʼa!

¹¹ Ró꞉ne shakoniahé꞉sen, iáh nonwén꞉ton thahoténhtaʼne.

¹² Tsi nikarí꞉wes iakónhnhe nek thonwá꞉wis ne nahò꞉ten ne ioiánere iáh nonwén꞉ton thahonwakarón꞉ni.

¹³ Tió꞉konteʼ teiakoweienhnhará꞉ʼon, karisé tánon kaniaʼtarí꞉io oniatará꞉ʼa iakón꞉ni.

¹⁴ Atenná꞉tshera tieión꞉tha raotinónhskon tsik nón꞉we tiéhas tsi ní꞉ioht tsi niaʼté꞉kon kontíhes kahonweiaʼkó꞉wa.

¹⁵ Ohén꞉ton tsi niió꞉re enwén꞉teʼne iontkétskwas iekwatákwas nahò꞉ten enhón꞉neke nakohwá꞉tsire tánon enkonhwahró꞉ri nakonhnhá꞉tshera nahò꞉ten kenʼniaká꞉iere.

¹⁶ Iakéhsaks onhwéntsa tánon waʼehní꞉non, ne wá꞉ʼontste ohwísta ne akaónha teiakotèn꞉tshon ó꞉ni skahéhta oʼnénhare waʼeiéntho.

¹⁷ Iakotshá꞉ni, ieʼsháhtste tánon iáh teiontoríshenhs.

¹⁸ Iakoterién꞉tare orihwakwé꞉kon tsi nahò꞉ten iéhsaʼahs tho shaʼtékena tánon thok nitiokará꞉ʼon iakoió꞉tenʼs.

¹⁹ Akaónha iehseriieʼtón꞉nis tánon ieniaʼtarón꞉nis.

²⁰ Iakotennitenrá꞉tskon tsi nenká ne rotí꞉ten tánon ne tehonatkárien.

²¹ Iáh thaʼteiakoʼnikónhrhare nó꞉nen enwá꞉kerenʼne ne tsi nakohwá꞉tsire ronahkwéniaien ne iohtánawen.

²² Iontenaktorókstha iakón꞉nis tánon iakohkwenní꞉ioʼs arihwawaʼkonhnéha niwahsohkò꞉ten ne kwáh kaniaʼtarí꞉ioʼs ionniá꞉ton.

²³ Akwé꞉kon niehonwaienté꞉ri ne ró꞉ne ne tsi roteríhonte ne raotiná꞉takon.

²⁴ Ionhkwenión꞉nihs tánon atiaʼtáhnha iakón꞉nis ronwanatkehrón꞉nihs ne rontké꞉rons.

²⁵ Ieʼshátste tánon iakotonkweʼtatkwénienhs iáh teietshá꞉nihs nahò꞉ten tsi naiawenhátie.

²⁶ Ionttókha tánon skén꞉nen tsi ní꞉ioht tsi iontà꞉tis.

²⁷ Tiótkon teiakoweienhnhará꞉ʼon tánon tehonwatíhshnie nakohwá꞉tsire.

²⁸ Ronwatiienʼokón꞉ʼa shakotinaʼtón꞉nis tsi shakotirihwakweniénhstha, ók ó꞉ni ne ró꞉ne shakohsennakará꞉tats.

²⁹ Rá꞉ton, “Wé꞉so ne konnón꞉kwe kontenahkwanorónhkhwa, nok í꞉se kiʼ tiaonhá꞉ʼa konhsennakará꞉tats.”

³⁰ Tsi niieweiennò꞉ten enkakwé꞉ni ensaʼnikonhrhá꞉ten nok ne iakoiaʼtáhskats iáh tiótkon thenkénhake, nok ne iakón꞉kwe ronwahsennakará꞉tats ne Roiá꞉ner kwáh orihwà꞉ke aietsihsennakará꞉tate.

³¹ Tashé꞉ion ne tahsherènhsaron tsi niiontiéhrha. Teiakotèn꞉tshon akwé꞉kon aiethikweniénhsthake.