Proverbs 30 - Ohiatonhseratokénti

Raowennaʼshón꞉ʼa Ne Agur

¹ Ne kí꞉ken Agur, Jakeh roién꞉ʼa, iorihwahní꞉rons raowennaʼshón꞉ʼa teharihwathé꞉tha tsi nihotiianerenhserò꞉tens: “Rawenni꞉io iáh teiakenikwé꞉kon, Rawenni꞉io iáh teiakenikwé꞉kon, iáh kiʼ thakkwé꞉ni akatatiaʼtakéhnha iáh tewakeʼshatstenhserá꞉ien.

² Katshé꞉nen sénha tho nitiaʼtò꞉ten tsi ní꞉ioht ne ón꞉kwe; iáh tho té꞉ioht tsi wakeʼnikonhraién꞉taʼs tsi ní꞉ioht ne tsón꞉kwe.

³ Iáh nonwén꞉ton tewakeweientehtá꞉ʼon ne attokháhtshera, tánon iáh oʼthé꞉nen tewakaterién꞉tare nen né꞉ʼe ne Rawenni꞉io.

⁴ Ónhka kenh ó꞉nen akwé꞉kon tiakorihwahsaʼáhton ne karonhiaʼkéhkha kaweientehtáhtshera? Ó꞉nen kenh ónhka iehsnonsà꞉ke ionhtsaʼnénhawe ne ówera? Tókaʼ ó꞉ni oniaʼtaraʼá꞉ke ohné꞉ka ahsweʼnón꞉ni? Tókaʼ ó꞉ni ahskwatá꞉ko tsi kaieronnítston tsi ionhwentsá꞉te? Ónhka ká꞉ti, tókaʼ saterién꞉tare? Ónhka ká꞉ti shakotiienʼokón꞉ʼa?

⁵ “Rawenni꞉io iáh nonwén꞉ton thaonsahoʼnikónhrhen nahò꞉ten enhahrhá꞉ratsteʼ. Tho kiʼ í꞉rate nahshakoiaʼtanónhstate nónhka ionhská꞉neks.

⁶ Tókaʼ sá꞉ton oʼthé꞉nen wahèn꞉ron ne iáh netehá꞉wen, enhsiahsnó꞉rahkweʼ tánon wé꞉ne enhrón꞉ni tsi sanó꞉wen.”

Shé꞉kon Ne Attokháhtshera

⁷ Sewenní꞉io konʼnekén꞉nis, teiorí꞉wake aontáhskon ohén꞉ton tsi niió꞉re enkíheie:

⁸ Tóhsa aonkenowénhake, tánon tóhsa aonkkwatshéhake tóhsa ó꞉ni aonkiténhton. Thok ní꞉kon aontáhskon atenná꞉tshera tsik ní꞉kon teiotonhwentsóhon.

⁹ Tókaʼ só꞉tsi wé꞉so aontáhskon nón꞉wa, enkí꞉ron iáh thaʼteskoniatonhwentsó꞉ni. Nok tókaʼ wakí꞉ten, tókaʼ nón꞉wa enkenénhsko tánon enhiiatéhaʼte Akení꞉io.

¹⁰ Tóhsa nonwén꞉ton enhserí꞉wakwaʼse ne kontihnhá꞉tshera raohén꞉ton ne raiaʼtakweʼní꞉io. Ensatkenhrenʼserón꞉ni tánon enhsatkarón꞉ni ne aorihwà꞉ke.

¹¹ Ótiaʼke nón꞉kwe enhshakotikenhrenʼserón꞉ni ne kaʼníhsera tánon iáh tehshakotikweniénhstha ne kaʼnisténhsera.

¹² Ótiaʼke nón꞉kwe tsi ronnonhtónnions iáh oʼthé꞉nen tehotihnihserá꞉ien, tánon iaohetstáhkwen tsi naʼteióʼtson ne raonatónhnhets.

¹³ Ótiaʼke nón꞉kwe tsi ronnonhtónnion kwáh í꞉ken tsi thonnonkweʼtaié꞉ri—tsi rontatkaʼén꞉ions kwáh í꞉ken tsi thotirihwaié꞉ri!

¹⁴ Ótiaʼke nón꞉kwe shakotinonhwaroriʼtón꞉nis ne iakó꞉ten, ó꞉ni ne teiakotkárien; tho kiʼ ní꞉ioht tsi ronnonhnhétie.

¹⁵ Iakonekwenhsoʼtsi꞉reks tékeni teioiaʼtaseʼtsherá꞉ien, tetsà꞉ron “Táskon!” konwatí꞉iats. Kaié꞉ri niiorí꞉wake ne iáh nonwén꞉ton tshiataiotiié꞉rihseʼ:

¹⁶ tsi ionhwentsá꞉te ne kenhé꞉ion, tánon iakón꞉kwe ne iáh teiakowí꞉raien, tánon iaonhwentsàthen ne teiotonhwentsóhon naiokén꞉nore, tánon ne iotékha ioʼniakenhátie.

¹⁷ Tókaʼ thentshié꞉ron ne iaʼníha tókaʼ ó꞉ni enhshéhswen saʼnisténha nó꞉nen eniontiaʼtísa, kwáh orihwà꞉ke wenheión꞉taks én꞉wake tsi sónhnhe tókaʼ ó꞉ni tsokaweʼkó꞉wa aiesakahratàhko.

¹⁸ Kaié꞉ri niiorí꞉wake tsi só꞉tsi teioterihwatierónnion naonkeʼnikonhraièn꞉taʼne:

¹⁹ ne á꞉kweʼks tsi kátieʼs karonhiaʼkéhshon, ò꞉niare tsi watoriahnerónkwas otstenhrà꞉ke, ne kahonweiaʼkó꞉wa tsi kaniataratátie katshénrieʼs tsi nón꞉we wáhe, tánon ne rón꞉kwe tánon iakón꞉kwe kanoronkhwahtsherá꞉kon tahiatatiaʼtatshén꞉ri.

²⁰ Ne ká꞉ti kí꞉ken iakón꞉kwe iakonià꞉kon ne iáh teiakorihwakwaríhshion, eniontenahkwaié꞉sahteʼ, sók eniontá꞉wen, tánon eniaʼié꞉ron, “Iáh oʼthé꞉nen tewakatié꞉ren ne iáh tetkariwaié꞉ri!”

²¹ Kaié꞉ri niiorí꞉wake tsi ionhwentsá꞉te iáh thakarihwaié꞉na:

²² ne rahnháhtshera ronontí꞉io ahà꞉ton, ne tehotenonhwarorí꞉tonte tiótkon ahoién꞉take tsi ní꞉kon tehotonhwentsó꞉ni à꞉rake,

²³ ne iakón꞉kwe iakotswèn꞉tskon naiakóniake, tánon ne iehnhá꞉tshera taiontatenaktáhkwen ne ienonhsakweʼní꞉io.

²⁴ Kaié꞉ri nikón꞉ti kenʼnikonná꞉sa kontírio ne kwáh í꞉ken tsi konttókha:

²⁵ Tsikeʼnhontstókhwi iáh tekontiʼshátste nok kiʼ tsi niwakénhnhes konteweién꞉tons naonatenná꞉tshera.

²⁶ Ohriò꞉ken iáh ó꞉ni tehatiʼshátste nek tsi tho nón꞉we nihontenaʼtón꞉nis otstenhraʼkéhshon.

²⁷ Tsistá꞉rare: iáh tehotí꞉ien ne ronontí꞉io nek tsi ratinenhrahserón꞉nis kiʼ tsi rón꞉ne.

²⁸ Tó꞉tis: enwá꞉ton enhshié꞉na sehsnonhsà꞉ke nok enhsheiaʼtatshén꞉ri tsi nón꞉we ne ronontí꞉io tsi ronónhsote.

²⁹ Kaié꞉ri niiorí꞉wake ne kwáh ionehrákwa tahská꞉nerake tsi kón꞉ne:

³⁰ kèn꞉reʼks ne aonhá꞉ʼa thatiʼshátste iáh oʼthé꞉nen tehatitshá꞉nis;

³¹ kaiaʼtákerahs, kítkit rá꞉tsiʼn roraʼsehstonhátie, tánon rotinontí꞉ios ne rontatkweniénhstha tsi rón꞉ne raotihén꞉ton nonkwehshón꞉ʼa.

³² Tókaʼ iekaié꞉ri wahsatatenonhwaroriʼtón꞉ni tánon satatón꞉ni ó꞉ni ahsatateweiennón꞉ni nahò꞉ten ne karihwanéren, tesatáthahs tánon sanonhtonnión꞉ko!

³³ Tókaʼ ne kawistohserókwen tahsawénrie, owistóhsera ienwá꞉ton. Tókaʼ ónhka enhsheʼnionhsáiaʼke, entkanékhwa. Tókaʼ ónhka enhshenaʼkón꞉ni, enhsataterihwaká꞉tatshe kiʼ.