Proverbs 28 - Ohiatonhseratokénti

¹ Ne iáh tetionkweʼtaié꞉ri enhonté꞉ko nó꞉nen iáh ónhka tehonwatíhsere, nok ne tionkweʼtaié꞉ri tho nihotiʼnikonhrahtshá꞉ni tsi ní꞉ioht ne kèn꞉reʼks.

² Nó꞉nen ne kanakeráhsera enkarihwanéraʼke, tenhonttenión꞉ko ne ronaterihón꞉ton. Enkaʼshátsteke tánon enkatátie ne kanakeráhsera tókaʼ tehotiʼnikonhráthe tánon ronateʼnikonhríhson ne ohén꞉ton tenshatí꞉taʼne.

³ Nónhka iakoteríhonte ne aiontatwíhsate ne iakó꞉ten ne shá꞉ka ne kwáh ioʼshátste aiokèn꞉nore akentáksaʼte ne kaienthóhsera.

⁴ Tókaʼ iáh tehskweniénhstha ne kaianerénhsera, tho kiʼ nonkwá꞉ti tisaiatén꞉ton tsi nonkwá iáh tetionkweʼtaié꞉ri; tókaʼ enhsatewèn꞉narahkweʼ, enhserihwáiaʼke kiʼ.

⁵ Nón꞉kwe ne ionkweʼtáksenʼs iáh tehatiienté꞉ri nahò꞉ten nen né꞉ʼe aterihwakwarihshiónhtshera, nok nón꞉kwe ronwahsèn꞉naiens ne Roiá꞉ner kwáh tokén꞉ʼen nen né꞉ʼe rotiʼnikonhraién꞉taʼs.

⁶ Ne sénha ioiánere naiesenténhton tánon aiesarihwakwarihshiónhake tsi ní꞉iot ne aiesakwahtshéhake tánon iáh thaʼiesarihwakwarihshiónhake.

⁷ Kenʼnithotiién꞉sa tókaʼ rontewennaráhkhwa ne kaianerénhsera, tehotiʼnikonhráthe kiʼ. Tókaʼ rontenroʼserón꞉nis ne iáh tehonatonkweʼtatkwénienʼs enhshakonatéhaʼte ne ronwatiienʼokón꞉ʼa.

⁸ Tókaʼ ensakwáhtsheʼne ne tsi shenaʼtonhkwén꞉nis nónhka ahshehwístani wé꞉so nahatikáriaʼke nowí꞉ra, sakwahtshéhsera akó꞉ren enieié꞉na né shakotinorónhkhwa ne rotí꞉ten.

⁹ Tókaʼ ne kaianerénhsera iáh thahsatewèn꞉narahkwe, Rawenni꞉io enhàhswen ne saterennaientáhtshera iáh thahatahónhsatate.

¹⁰ Tókaʼ tenhsherihwaierónnion nónhka tiakorihwaié꞉ri karihwahétken kenʼniaié꞉iere, í꞉se kiʼ entisatkarenhrákwaʼse; nok ne ónhka iáh oʼthé꞉nen tehotihnhí꞉kon tenhonaterihwaʼserákwahse.

¹¹ Nón꞉kwe ne rotikwáhtshe tiótkon rón꞉nehre ronteʼnikonhrattókha, nok ne ró꞉ten rakaʼenionhtsherí꞉io tenhaiaʼtó꞉rehte tsi nihatiweiennò꞉tens, ráonha kiʼ sénha shakoʼnikonhraienté꞉ri.

¹² Nó꞉nen ne thotirihwaié꞉ri enhonterihón꞉ten, akwé꞉kon ronatonhnháhere, nok nó꞉nen ne iáh tethotirihwaié꞉ri enhonterihón꞉ten, nón꞉kwe enhontahsehtanion.

¹³ Iáh nonwén꞉ton thaiesaterihwahténtiaʼse tókaʼ enhsateʼnién꞉ten ahsáhsehte tsi sarihwanéren. Sasatathré꞉waht tánon é꞉ren shá꞉wit, tho ne ó꞉nen Rawenni꞉io énthion kaiaʼtateríhtshera.

¹⁴ Tiótkon tshewén꞉narakhwak ne Roiá꞉ner tánon enhsatonhnhá꞉rake. Tókaʼ seriahsahní꞉ron, wé꞉so kiʼ ensáhtonʼse.

¹⁵ Nón꞉kwe ne rotí꞉ten iáh tehotí꞉ien nahontatiaʼtakéhnha tókaʼ ne raianerenhserón꞉nis iáh tetionkweʼtaié꞉ri; ne shatehonatiaʼtátteron ne kèn꞉reʼks iotonriá꞉ien tókaʼ ó꞉ni ne ohkwá꞉ri tewahkwataséhonhs.

¹⁶ Ne rakó꞉ra iáh tehó꞉ien ne wattokhahtsherí꞉io shakowihshá꞉tha, sók ne ónhka ráhswens nahò꞉ten iáh tetkariwaié꞉ri karí꞉wes rakó꞉ra enkénhake.

¹⁷ Nónhka rohnhí꞉kon tókaʼ shakohséhton, tho niiohsnó꞉re tsi raʼshonhionhnia tsi nón꞉we nenhonwaiaʼtà꞉ta. Tóhsa sateʼnién꞉ten tahtstáhste.

¹⁸ Sarihwakwarihshiónhak tánon enhsheʼniá꞉kenʼne. Tókaʼ iáh tesarihwakwaríhshion thontaiawénhstsi enhsatkarón꞉ni.

¹⁹ Raiénthohs ne rotsteʼniá꞉ron roká꞉te nahò꞉ten à꞉rake. Nón꞉kwe iontehniserakaiónhstha tiótkon eniakoténhton.

²⁰ Nón꞉kwe ne iakorihwakwaríhshion tiótkon eniakotonhnhá꞉rake tánon enká꞉nahne tsi iakónhnhe. Tókaʼ tesasteríhens naiesakwáhtsheʼne tsi nonkwá꞉ti iáh tetkariwaié꞉ri ensatré꞉wahte.

²¹ Iáh tetkariwaié꞉ri ne iakotkenhronniá꞉tskon. Ótiaʼke ne tehatiiaʼtoréhtha tenhatiʼnióhskenʼne tsi ni꞉iot tsi enhatirí꞉wenhte ohnaià꞉wenʼne ne ók ó꞉ni kenʼk ní꞉kon nahonatkáriaʼkse ne kaʼnikonhrhá꞉ton.

²² Ne ronnónhaʼk khók rontaté꞉iahre tehotisteríhens nahotikwáhtsheʼne, iáh tehonttókhas kátke kententéhtshera tahotíhkwahte.

²³ Ónhka enhsherihwakwaríhshien, sók ohnakénhkha ne sénha enhonerienʼtí꞉io tsi ní꞉ioht ne tahsherènhsaron.

²⁴ Ónhka tsi ranonhtónnions iáh thaʼtehoʼniohskén꞉ʼen tókaʼ enhshakonénhsko ne ronwaién꞉ʼa, ne aontahonwateʼnièn꞉tenhsteʼ ne kwáh ranenhskwahtsheráksen.

²⁵ Sonhà꞉aʼk sataté꞉iahre nek tkáhas kaʼnikonhrharáhtshera. Ne sénha ioiánere sarihwà꞉ke tahtshéhtak ne Roiá꞉ner.

²⁶ Teiotenonhwarorí꞉tonte ne áhtshere tsi nisaʼnikonhrò꞉ten. Satatiaʼtanónhstat: íhtshehr ne tehotiʼnikonhráthe raotirihonnienníhtshera.

²⁷ Tashé꞉ion ne iakó꞉ten tánon iáh nonwén꞉ton thaiesenténhton. Tókaʼ saʼnikonhrón꞉nis tsi iáh teshé꞉kenhs ne iakó꞉ten, wé꞉so nón꞉kwe tsi eniesateraʼswaksá꞉ten.

²⁸ Nonkwehshón꞉ʼa ronatahséhton nó꞉nen ne iáh tetionkweʼtaié꞉ri enhonterihón꞉ten. Nó꞉nen enhshonwatiià꞉tenhte né꞉ne thotirihwaié꞉ri iontonkweʼtakwaríhshion ohén꞉ton tenhshatí꞉taʼne.