Proverbs 27 - Ohiatonhseratokénti

¹ Tóhsa só꞉tsi orihwí꞉io són꞉ni tsi kén꞉ʼen ahsé꞉sheke nenióhrhenʼne aseʼkénh iáh tesaterién꞉tare oh nieniá꞉wenʼne nón꞉wa tánon ne thó꞉ne.

² Sheríhon nakó꞉ren naiesahsennakará꞉tate—ók ó꞉ni ne iáh tesheienté꞉ri; tóhsa nonwén꞉ton í꞉se tesataterénhsaron.

³ Tsi niiókste ne onén꞉ia tánon oʼnehsarónhkhwa iáh ne shá꞉ka té꞉ken, táhseren kaʼnikonhrharáhtshera tsi tkáhas ne teiotenonhwarorí꞉tonte.

⁴ Kanaʼkhwénhsera iakokarón꞉nis tánon enkahwatsirahríhsi iáh kiʼ ne thaʼtáhseren ne ateʼkehfáhtsera.

⁵ Ne sénha ioiánere nónhka ahtsherihwakwaríhshien tsi ní꞉ioht ne ahréhrheke iáh tetshenón꞉weʼs.

⁶ Atenró꞉sera rón꞉nehre iáh oʼthé꞉nen teiotié꞉ren naiesaʼnikonhrakaré꞉wahte nok nó꞉nen ónhka iesáhswenhs entiesahnénhsa—seʼnikón꞉rarak ká꞉ti!

⁷ Nó꞉nen sáhton, iáh tháhseke otsiʼnahkontahkwá꞉ne ótsikheta, nok nó꞉nen satonhkáriaʼks, iawerohátien ne iotskà꞉ra ne kákhwa teiotsikhè꞉tare tsi énhseke.

⁸ Nónhka iáh tho té꞉tienʼs tsi nón꞉we tiè꞉teron, ne shá꞉ka ne otsítenha iáh tho té꞉wes tsi nón꞉we tiottsiʼnhahkón꞉ni.

⁹ Iontiaʼtakonʼonhstáhkhwa tánon wenhserákonʼs kén꞉ie entkáhawe enhsatonhnhá꞉ren, ók ne kaʼnikonhrharáhtshera enkaríhsi tsi skén꞉nen sanonhtónnions.

¹⁰ Tóhsa sheiaʼtaʼnikónhrhen ne sewatenroʼshón꞉ʼa ó꞉ni ne iaʼníha ronatenroʼshón꞉ʼa. Tókaʼ oʼthé꞉nen tesaʼnikónhrhare, tóhsa sheriʼwanón꞉tons nónhka tsatátenonhkwe aiesaiaʼtakéhnha; né꞉ne tetsanonhsané꞉ken sénha wé꞉so eniesaiaʼtakéhnha tsi ní꞉ioht ne sewatátenonhkwe ne í꞉non thón꞉nes.

¹¹ Tesaʼnikonhrátheʼk, konién꞉ʼa, tánon enkatonhnhá꞉ren; enwakatateʼweienentá꞉ʼon takerihwaʼserá꞉ko nónhka naionkerihwáhrhoʼse.

¹² Nón꞉kwe ionttokhahtsherí꞉io eniónttoke nó꞉nen tá꞉we ne kaʼnikonhrharáhtshera tánon eniontatiaʼtohtáhrho, nónhka iáh thaionnonhtonnión꞉ko entierihó꞉kaʼte tánon ohnaʼkèn꞉kha entsontateriʼwáhsten.

¹³ Nón꞉kwe ne iáh tshiaʼtekaié꞉ri thaʼtehoʼnikonhráthe tókaʼ enhotatshennáhrhase ónhka iáh tehoienté꞉ri tsi rotká꞉rote, tehotèn꞉tshon kiʼ ne akwé꞉kon enhotkaraièn꞉taʼne nahò꞉ten ró꞉ien.

¹⁴ Shaʼté꞉ioht niaʼté꞉kon ahsheiénhahse sewatenroʼshón꞉ʼa tsi ní꞉ioht ne ohrhonʼkéhstsi iorakaré꞉ni taiesahén꞉rehte tsi ahsheiehtánion.

¹⁵ Ró꞉ne ne iakotewennaientón꞉tskon ne shá꞉ka ne ohné꞉kanos watshá꞉rhonhs, watshá꞉rhonhs, watshá꞉rhonhs, nó꞉nen iokennó꞉ron.

¹⁶ Oh nénhshiere nahshéhsweke? Ó꞉nen kenh sateʼnién꞉ten táhstahste ne ówera tókaʼ ó꞉ni ahsateʼnién꞉ten ahshié꞉na sewahtsà꞉na kén꞉ie?

¹⁷ Nón꞉kwe teiontaterihonnién꞉nis ne shá꞉ka ne karístatsi kahioʼthí꞉ions ne karístatsi.

¹⁸ Tesahrhó꞉ton kí꞉ken tsionʼnionwarontonhakowa kehrite tanon enshahianenhtane nashaiake ne tsionʼnionwarontakowa. Ratihnhá꞉tshera tehshakotíhshnie ne ratiiaʼtakweʼní꞉io enhonwatikwénienhsteʼ.

¹⁹ Í꞉se satatkónhsakenhs nohnekà꞉ke tánon sonhà꞉aʼk enhsatátken tsi tenhsatatiaʼtó꞉rehte ne serià꞉ne.

²⁰ Nón꞉kwe nahò꞉ten ionhská꞉neks, ne shá꞉ka taié꞉ren tsi nón꞉we tionhonsaien ne kenhé꞉ion—tiótkon ne shé꞉kon ionáktote.

²¹ Tsi iotékha ne ó꞉tsire enwahthró꞉ri tókaʼ kenh aóskon ohwistanó꞉ron tókaʼ niʼ kenh kahwistarà꞉ken. Ne ká꞉ti shá꞉ka nón꞉kwe enwathró꞉ri tsi naiakohsenniióhake.

²² Ók ó꞉ni tókaʼ wahonwanonwenhserário tsi niió꞉re ne kenheiá꞉tne, ne tehonatenonhwarorí꞉tonte shé꞉kon kiʼ iáh thaʼtahsheté꞉ni tsi tehonatenonhwarorí꞉tonte.

²³ Tehshéhshnieʼn ne satshenenʼó꞉kon, teiotinaʼkarontón꞉ʼa tánon ne tiohnhónskwaron tsi nisakwénion,

²⁴ aseʼkénh ahtshoʼkowáhtshera iáh thaʼtekahwiʼshátsteʼ, iáh ó꞉ni tsi kanakerahseraké꞉ron.

²⁵ Enhsenekerí꞉iaʼke thó꞉ne enhshathóntiaʼke tsi tionontatsnénhton tsi nikarí꞉wes ne ó꞉ia tsonatehiaróntie ne awennékeri.

²⁶ Enwá꞉ton enhsatakweʼnion꞉ni ne énhsatste karisé teiotinaʼkarontón꞉ʼa tkontká꞉waʼs, tánon enhshonhwentsahní꞉non ne énhsatste ohwísta tsi enhsatenhní꞉non ne satshenenʼó꞉kon kontiiaʼtákerahs.

²⁷ Sók ne kontiiaʼtákerahs ionatatén꞉ron entié꞉son onòn꞉ta ní꞉se tánon sahwá꞉tsire ó꞉ni ne konnón꞉kwe iesaióʼtenhse.