Proverbs 26 - Ohiatonhseratokénti

¹ Thahserénhsaron ónhka nón꞉kwe teiakotenonhwarorí꞉tonte iáh teió꞉nakte, ne shá꞉ka ne táhseren óniehte akenhnhà꞉ke tókaʼ ó꞉ni aiokèn꞉nore tsi niieienthókwas.

² Aiesakenhrenʼserón꞉ni iáh thaiesakaré꞉wahte tsik tókaʼ tesatèn꞉tshon. Tsi ní꞉ioht ne otsítenha kotitse tánon iáh thaʼtakontà꞉senhte.

³ Ó꞉nenk tsi enhsenonʼwáreʼke ne akohsá꞉tens, ó꞉nenk tsi enhskonshotárhroke ne tewahónhtes, tánon ó꞉nenk tsi entshenonhwenhserário ne tehotenonhwarorí꞉tonte.

⁴ Tókaʼ tenhserihwaʼserá꞉ko nahò꞉ten ne teiotenonhwarorí꞉tonte í꞉se kiʼ ó꞉ni saʼteseninonhwaró꞉ri ne ónhka waʼesariʼwahnón꞉tonhse.

⁵ Tahserihwaʼserá꞉ko nahò꞉ten ne teiotenonhwarorí꞉tonte, sók ne ónhka wahariʼwanón꞉ton, enháttoke tsi iáh kwáh thaʼtehoʼnikonhráthe tsi ní꞉ioht tsi ranonhtónnions.

⁶ Tókaʼ entsheríhon ne tehotenonhwarorí꞉tonte naharihwakaré꞉ni ne orihwaʼshón꞉ʼa, shaʼté꞉ioht ne àhshiaʼke sahsiʼtà꞉ke; seriʼwanóntha ne tahsaʼnikonhrhá꞉ren.

⁷ Ne tehotenonhwarorí꞉tonte iáh tshiaʼteioríhonte ne á꞉ratsteʼ karihonnienníhtshera, ne aontaionteʼnièn꞉tenhste nónhka rahsináksen iáh té꞉reʼs.

⁸ Tasherènhsaron nónhka iáh tehotiʼnikonhraientátskon iáh tshiaʼteioríhonte, ne táhseren ahswànerenke onén꞉ia sehsnonhsà꞉ke iensá꞉ti tánon iáh káneka tshiá꞉we.

⁹ Ne tehotenonhwarorí꞉tonte í꞉rehre wattokhahtsherí꞉io tsi nahò꞉ten tahawennínekenʼne sehiahrahkwén꞉ni tsi kwáh né꞉ne rohné꞉ka rateʼniéntha ohí꞉kta ahróhtshi rasnonhsà꞉ke.

¹⁰ Raténhnhaʼs ne tsik ónhkaʼk enhshakóhnhaʼne ne tehotenonhwarorí꞉tonte akwé꞉kon enhshakokarón꞉ni.

¹¹ Ne tehotenonhwarorí꞉tonte tekeníhaton tenhaʼnióhskenʼne ne shá꞉ka ne è꞉rhar eʼthó niaʼonsá꞉we én꞉wake tsi nón꞉we tiotstí꞉kon.

¹² Nónhka ne kwáh tehotenonhwarorí꞉tonte ráonha sénha ioiánere raorihwà꞉ke tsi ní꞉ioht ne ónhka rón꞉nehre ronttókha tánon iáh tho té꞉ioht.

¹³ Oh nontié꞉ren ne ronnentóhrha iáh nonwén꞉ton tshiehatiiá꞉kenʼs ne raotinónhskon? Nahò꞉ten ratitshá꞉nis? Kèn꞉reʼks kenh?

¹⁴ Ronnentóhrha kwáh nek ne enhsontkahrhátho kanaktà꞉ke. Thok niió꞉re iehatikarenhrákwas tsi kahnhoká꞉ronte tenwatehnhohóntieʼs tánon ensewatehnhó꞉ton.

¹⁵ Ótiaʼke nón꞉kwe só꞉tsi ronnentóhrha nahontátenonte.

¹⁶ Nónhka rentóhrha í꞉rehre ráonha sénha tehoʼnikonhráthe tsi ní꞉ioht ne tsá꞉ta nihá꞉ti naontahónhtkaʼwe tsi nihotiʼnikonhrò꞉tenʼs ne tkarihwaié꞉ri.

¹⁷ Tókaʼ iahsatatiaʼtó꞉roke nónhka tehonaterihotáhrhon ne iáh oʼthé꞉nen tesarihwà꞉ke ne shá꞉ka ne ahsenatókten tánon è꞉rhar tahtshahontatirón꞉ten.

^18-19 Nónhka nakó꞉ren tahsherihwaierónnion tánon ahsì꞉ron, “Nek ne wakatswà꞉ton,” ne shá꞉ka nónhka tehanonhwahrawénrie iontswaʼtáhkhwa rotatonniaʼtén꞉ni ne iakohnonhwarhiakons.

²⁰ Tókaʼ iáh teká꞉ienhtaien enwá꞉swaʼ tsi iotékha; tókaʼ iáh thaʼtahserihwenhá꞉wihte tenká꞉taʼne ne tahsaterihwakén꞉ni.

²¹ Ohswèn꞉ta katsí꞉rakatste, ó꞉iente enhshientóntho eniotékhake kiʼ tánon ó꞉ni ne ronnéhsaks ne tahonterihotáhrho ratinón꞉weʼs aiónhnheke ne taionterihwakén꞉ni.

²² Iawékon ne taierihwenhá꞉wihte! Kwáh ionkwé꞉kas ne iaietewahnéhkwane!

²³ Ne iáh teiorihwí꞉io tsi sáhthare, wahséhtha tsi nahò꞉ten kwáh tokén꞉ʼen sanonhtónnions. Ne shá꞉ka aontahsateʼnièn꞉tenhste ne kwáh tioiánere tsi tekastarathé꞉ton kátshe ionniá꞉ton ne iáh tekanawaʼtstí꞉io.

²⁴ Nónhka teiekonhsotáhkwen ionséhtha atswènhsera, karenhsarónhtshera owennaʼshón꞉ʼa énhontste.

²⁵ Tókaʼ nón꞉wa ioiánere tsi sathón꞉te, tóhsa kiʼ tatshéhtahk, ne tsi rawerià꞉ne titkáhere ne atswènhsera.

²⁶ Enwá꞉ton enhatkonwaró꞉roke tsi ráhtswens, akwé꞉kon kiʼ ienieièn꞉tereʼne tsi wahétken tsi nihatiéhrha.

²⁷ Nón꞉kwe shakonaterístaiens ronnónha kiʼ enhshonatkarenhrákwaʼse. Nón꞉kwe nónhka enthontáhsawen tenhothitarenhne ronnónha ne tenhshotiiaʼtó꞉rarake.

²⁸ Ó꞉nenk tsi enhshehswénhsheke ónhka í꞉sehre atskaré꞉wahte tsi sanowenhtánions. Owennaʼshón꞉ʼa áhsatste ne iáh tho té꞉ioht ne tkáhas naiakokarón꞉ni.